السلام عليكم ورحمة الله وبركاته
النهارده جايه بموضوعي فالمسابقه بصراحه انا اول مره اشترك بمسابقات فالمنتدي
معلش بقي هما كم صنف قليلين اصلي ما حبتش اعمل اصناف كتيير لان انا وزوجي واولادي اكلنا قليل جدااا وبصراحه بستخسر اكلف الحاجه وتبات تاني يوم وما حدش يرضي ياكلها فعملت الحجات الاساسيه اللي بنحبها
اول حاجه الاصناف اللي انا عملاها
سلطه خضراء
بسله بالجزر
ارز مفلفل بالشعريه
فراخ مشويه عالفحم
الحلو كريم كراميل
اول حاجه جبت الفرخه غسلتها كويس بالميه والملح والخل وقطعتها علي اربع
وخليت الفراخ من العظم وخدت العظم وخدت الحوايج بتاعتها اللي هما القنصه والكبده والزور والارجل حطيتهم فميه بتغلي ومعاهم بصله وورق لورو وحبهان وملح وفلفل اسود وعملت عليهم شوربه علشان هنحتاجها في عميل الرز والبسله
بعد كده جهزت التتبيله للفراخ المشويه صدقوني يا بنات كانت روووعه بتخلي طعم وريحة الفراخ المشويه حاجه تانيه خالص
اللي هي بصله كبيره مبشوره ناعم +ملعقة قرفه +ملعقة بهارات +ملعقة فلفل اسود +ليمونه معصوره +فصين توم مفروم +ملح +طماطمايه كبيره معصوره
ادي كمية التتبيله
الفراخ وهي فالتتبيله ونسيبهم ساعتين عالاقل انا سيبتهم 4 ساعات وبعد كده نشلتهم من التتبيله وشوينهم علي شواية الفحم اخدو نصف ساعه
هتكون دلوقتي عملنا الشوربه اللي قلنا عليها وبقت جاهزة للطبخ
جيبت كيلو بسله ونص كيلو جزر جهزتهم وغسلتهم
وروحت عامله لها الصلصه اللي هي …
نحضر بصله متوسطه مبشوره مع 3 ملاعق سمن في حله مناسبه توضع علي النار لحد ما تحمر خالص اوعي تشيط منك عايزنها تحمر بس علشان الطبيخ يبقاله وش واول ما البصله تحمر تنزلي عليها بنص كيلو طماطم معصوره فالخلاط
تغطيهم بغطاء الحله لحد ماتتسبك
اول ما تتسبك تحطي فيها البسله وتقلبيها 5 دقايق وبعدين تزوديها شوربه وتسيبيها تستوي
علبال بقي ما تستوي البسله هنعمل الرز المفلفل
هنجيب الرز اللي هنعمله ونغسله ونصفيه بالمصفي وبعدها علطول نجيب حله ونحط فيها معلقتين كبار سمنه بلدي ونحط شوية شعريه وتحمري الشعريه بقي اول ما تحمر تنزلي عليها بالرز وتقلبيه 2دقايق لحد ما تسمعي صوت طقطقه وبعدين تزودي الشوربه المغليه لاااااااازم بتغلي علشان الرز يطلع مفلفل اول مالشوربه تغلي بالرز تروحي مهديه النار اققل من المتوسط بكتيير ..وتسيبيه يتشرب الشوربه لازم مقدار الشوربه يكون مغطي الرز وتكون الشوربه فوق الرز بمقدار قليل قد نص صابعك مثلا
وبعدين عملت سلطه عاديه طماطم وخيار وكزبره وبقدونس وطرنشات بصل وفلفل اخضر وملح وخل
الاكل جاهز
معلش بقي الصور لو مش واضحه الكاميرا مش مساعداني لانها وحشه
والسفره بقت جاهزه
يتبع يا قمرات ………….
الحلو كريم كراميل فالمشاركه الجايه ………….
[] مواضيع هذا القسم برعاية
التفاح الاخضر. التفاح الاخضر. 955004_6.gif فتكات رائعة Fatakat 955004 ارض الله الواسعه – مصر