السلام عليكم
بعد ما نزلت الجزء الاول فالعنايه الكامله بالاسنان و الحمدلله عجبكم و ده الرابط عشان لو حد مشافهوش
https://fatakat.univanet.com/#3636572قررت انزل العنايه باسنان الاطفال
اولا امتى نبدا نهتم باسنان الاطفال ؟ حقولكو اول ما البيبى يتولد يعنى قبل ما الاسنان تبدا تطلع
قبل ما الاسنان تطلع لازم نهتم بنضافه اللثه يعنى بعد الرضاعه لازم نمسح اللثه كلها بقطعه شاش طريه وده مهم جدا لتجنب الفطريات اللى بتسبب مشاكل كتيره
فى عادات غلط للاسف فى امهات بتنيم الطفل على ببرونه فيها عسل او قطعه عيش ففمه طبعا دى اكتر حاجات تسبب نمو الباكتيريا و الفطريات و تسبب تسوس و قرح
بعد كده حتبدا الاسنان تطلع عند 6 شهور تقريبا من اول سنه تطلع لازم نهتم بنضافتها ….. ازاى ؟
فى فرشاه بتتلبس فصوباع الام بتلبسها و تبدا تنضف اسنان البيبى بعد كل اكل او لبن او اى حاجه من غير معجون خالص وده شكلها و لو متوفرتش ننضف بشاش
عند سن سنتين بتبدا الام تغسله الاسنان و تعوده ان دى حاجه اساسيه و بتغسل بحركه دائريه على كل الاسطح يعنى مختلفه عن طريقه الكبار اللى عرفتهالكو فالموضوع السابق
وفى يا جماعه حاجه هايله تعليم الاطفال كل حاجه عن الاعتناء باسنانهم بتكون مفيده جدا فالمراكز الكبيره و انا شفتها و حضرتها كتير فاسكندريه بجد بتفرق كتير بتكون مره واحده و بيكون معاه اطفال كتير ففى تشجيع و امكانيات تعلم الطفل الاهتمام باسنانه
و بيتعلم على موديلات مكبره
طب كميه المعجون و نوعه لازم معجون اطفال عشان يكون امن لو اتبلع و الكميه اد حبه البسله منكترش عن كده
طب و مواصفات الفرشاه
لازم تكون ايدها طويله و راسها صغيره و ناعمه و طبعا اشكال عشان تشجع الطفل
نيجى لحاجه تانيه مهمه
الاكل و خصوصا الحلويات
لازم اعود الطفل ان بعد كل اكل يغسل اسنانه طب لو فالمدرسه و ده مش متوفر
بعد ما ياكل يتمضمض بالماء او يشرب
و ياريت يكون معاه فالمدرسه حاجه فيها الياف زى الجزر او التفاح ياكلها بعد الحلويات
و ياريت نعودهم على منع او تقليل السكريات خصوصا التوفى و الحاجات الستيكى اللى بتلزق عالاسنان
ولو حياكل حاجه حلوه تبقى كلها فوقت واحد مش تتجزا على مدار اليوم ودى اهم نقطه
و ياريت لو نعمل طبق الاكل الصحى بصوره كويسه عشان يتشجع للاكل الصحى و يبعد عن الحلويات
و طبعا مننساش الزياره الدوريه لطبيب الاسنان لان مشكله اسنان الاطفال انتشار التسوس فكل الاسنان و بيصعب علاجها جدا عشان كده نلحق الحاجه و منسبهاش و الوقايه طبعا اهم
ودى بقى مهمه جدا لتشجيع الاطفال لوحه صغيره تتعلق فاوضته للمتايعه اليوميه كل مره يغسل اسنانه الصبح و بالليل يعلم عليها انا عن نفسى جربتها مع كل الاطفال اللى بعالجهم و نتيجتها حلوه اوى فالمواظبه و التشجيع و فى منها افكار كتيره جدا
اتمنى اكون غطيت كل حاجه
ارجو عدم نقل الموضوع لمنتديات اخرى لانى تعبت جدا فيه
ولو عجبكو قيمو عشان غيركو يستفيد
و زى ما وعدتكو حبقى انزل موضوع تالت عن علاج اللثه و كل طلباتكو
متنسوش التقييم
د_دينا
بنوته اسنان بنوته اسنان 748229_3.gif فتكات هايلة Fatakat 748229 الاسكندريه – مصر