هتكلم النهارده على نوع فوط صحيه ويوميه جميل اوووى وفى نفس الوقت هقولك تكايه حلوه توفر معاكى وتريحك
النوع ده يا بنات اسمه برايفت Private صناعه لبنانيه قطن 100% كانت فتوكه هنا قالتلى عليها ربنا يكرمها وبجدد طلعت ووووهم
وبغض النظر عن موضوع ان فى ناس قالوا ان ألويز فيها مواد لقطع نسل المسلمين لأنى لا أعلم مدى صحة الكلام ده الا انها مش مريحه بالمرررره والماده اللى موجوده فيها اللى بتحول السائل الى هلامى دى مش كويسه ومش صحيه وبتسبب التهابات ورائحه كريهه
اما برايفت فعلى العكس تماماااا طبعا قطن 100% فمش بتسبب التهابات ولا روائح كريهه بعكس المواد اللى داخله فى تركيب الألويز اللى بتسبب ده غير انها صناعه لبنانيه فبفضل الله اخواتنا فمضمونه
وكمان شكلها كيووووووت جداااا حاجه تفتح النفس بصراحه وده لأن العنايه الشخصيه بتدى الواحد شعور لذيذ
طبعا هتقولوا ايه اللى بت جيباه ده كله هههههههههه
~ هقولكوا هنا تكمن التكايه ~
الأول أحب اعرفكوا بنفسى للى ما شافوش مواضيع ليا قبل كدا
انا بحب اتصرف فى ميزانية اى حاجه بطريقه لولبيه وهى انى مش ببص للسعر لوحده لأ ببص للسعر وبقيس عليه حاجتين كمان عشان أعرف السعر ده حتى لو كان عالى يعتبر معقول وموفر ولا لأه ..
والحاجتين دول هما: الجوده والحجم او الكميه ~
زى ما عملتلكوا موضوع قبل كدا كبييييير ومفصل عن التيكنيك ده
الـديـتـول غـالـى !!!! مـيـن قـال كـدا !!! بـطـلـى دلـع وهـو يـبـقـى رخـيـص P – :
https://fatakat.univanet.com/#5199769
~ نطبق بقى على موضوع النهارده ~
البرايفت فى منها 3 انواع من حيث الرقه والسمك الماكسى والماكسى بوكيت والألترا أو الاكسترا ثين
الأنواع اللى صورتها فى الأول الاتنين اللى بـ 9 جنيه دول ألترا او Extra Thin
ودول أحجام >> ..
الحجم اللى فوق Extra Thin/Super الـ 8 بـ 9 جنيه
وده شكلها كيوووووووت جددداااااا انا سنداها بحاجات جنبها عشان انتوا عارفين بتبقى متنيه جوا الغلاف
واللى تحته Extra Thin/Normal الـ 10 بـ 9 جنيه وهنا حطاهم على بعض موضحالكوا فرق الحجم
وده يا بنات الشكل القديم للماكسى بوكيت والماكسى واللى ممكن تكون اتغيرت هى كمان زى العبوه الاقتصاديه اللى صورتهالكوا دى ماكسى كانت قبل كدا شكلهم بس اخر مره جبتها لقيتها هى كمان بقت ملونه كدا وعالعموم هى بردو مش مليانه اوى ومريحه مش بتكلكع مش السمك اللى يضايق يعنى
عارفين يا بنات العبوه الاقتصاديه الماكسى الـ20 قطعه اللى مصورهالكوا عالشمال دى بكام !!!!
بـ 8 جنيه !!!!
قطن 100% مريحه جدااا 20 قطعه يعنى تستخدمى براحتك وتغيرى براحتك مره واتنين وتلاته فى اليوم وبالسعر ده
وبالنسبه للـ Freshdays دى الفوط اليوميه من Private فى منها انواع كتيير ده اللى لقيته ساعة ما كنت بشترى دول 24 واحده بـ 13 جنيه
كده كتبتلكوا الأسعار والجوده والكميه
أسعار الألترا تعتبر نفس رينج أسعار الألترا من اى نوع
والعبوه الاقتصاديه موفررررره جداااا
والفوط اليوميه اكترررر من رائعه فى الاستخدام للعرق والافرازات اللى هو تروحى تشيليها وتصلى على طول لو مفيش وقت او مرهقه مش قادره تغيرى
~ طيب انا ليه جايبه الحاجات دى كلها فى نفس الوقت ~
هل ده تبذير لأ انا بفضل الله من أشد الناس اللى ضد التبذير بس بحب أجيب جوده عاليه وفى نفس الوقت سعر معقول وهنا بيبقى لازم أشغل مخى وده اللى عملته فى موضوع الفوط
بدل ما كنت اما اشوف اى نوع فوط غالى استغلاه او اما البنات هنا يقولوا غيروا مرتين تلاته اربعه فى اليوم اقول ده خراااب بيوت لو هستخدم نوع كويس اجيب الأنواع اللى تحت السلم يعنى ولا أعمل ايه
وبدل ما كل شهر بتجيبى واحده تخلص منك وتيجى الشهر اللى بعده ماتلاقيش عندك وتتزنقى وماتبقيش عارفه تتصرفى ازاى لو الموضوع جه فجأه ..
اللى عرضتهم دول لو جمعتيهم هتلاقيهم 70 فوطه بـ 39 جنيه
باختلاف احجامهم واشكالهم ومش هقدر اقسم السعر على العدد لأنهم أنواع مختلفه عشان اقولك الواحده واقفه عليكى بكام بس ممكن تحسيبيها انتى لكل عبوه
ولو حسبتى هتلاقيهم هيعدوا معاكى 3-4 شهور وده لأنهم عدد كبير ما شاء الله
وكمان بتستخدمى كل حاجه فى وقتها ..
يعنى مثلا فى اول البيريود كمية السائل بسيطه استخدمى اليوميه او الموفررره انتى عندك منها بالهبل
وانتى جايه تنامى مثلا استخدمى السوبر او لو خارجه يوم هتبقى طول النهار بره عشان تبقى مرتاحه اكتر
ممكن بقية الفتره تستخدمى الموفره اللى هى الماكسى او الالترا العاديه
فى نهاية الفتره الكميه بتكون قليله حرام مثلا تستخدمى الالترا السوبر زى ما فى العادى بنستخدم هى نفس الفوطه طول الفتره فبنهدر جامد !! لأ استخدمى الاقتصاديه او اليوميه
* وغيرى كل يوم مره واتنين وتلاته الـ20 بـ8 جنيه يعنى خدى راحتك عالاخر وما تقلقيش الشهر الجاى ييجى وانتى مش راكنه جزء على جنب لأ انتى عاينه خزين كبير
وكمان بجوده عاليه قطن 100% وانتوا عارفين ان منتجات القطن بتقف علينا أغلى من كدا
انتى الأول اشترى العبوه الاقتصاديه هى فى منها ماكسى وماكسى بوكيت كمان على ما أذكر وكمان هتلاقى النورمال والسوبر الأكبر من كدا ما قابلنيش قبل كدا مش عارفه ..
الشهر اللى بعده هيبقى متبقى معاكى كتير ..
اعتبرى ان متبقاش وانك هتجيبى بتاعت الشهر ده وهاتى واحده الترا سوبر بـ 9 جنيه ..
الشهر اللى بعده نفس الشئ هاتى واحده الترا نورمال بـ 9 جنيه ..
اللى بعده بردو هاتى علبة فوط يوميه باختلاف انواعها اختارى النوع اللى يناسبك ..
وكدا هيبقى عندك الأنواع كلها تاخدى منها اللى يناسبك
ولو امكانيتك سامحه هاتيهم كلهم سوا بس انا حبيت اوضح ان الواحد لو شغل مخه هيقدر يجيب أجود انواع المنتجات مهما كانت ظروفه
وزى ما دايما بقول مش لازم تكونى ظروفك صعبه عشان توفرى احنا ديننا نهانا عن التبذير سواء كنتى ميسوره او مستوره وصدقينى اما بتخلى النيه دى جواكى ايا كانت امكانياتك انك مش عايزه تبذرى عشان ماتغضبيش ربنا بتلاقى الحاجه بفضل الله فيها بركه
وفى النهايه اتمنى موضوعى يكون فادكوا وانه يكون خفيف على قلبكوا ويا ريت تطمنونى على ده من تعليقاتكوا ~
وما تنسوش تقيموا الموضوع لو شايفين انه هادف وممكن يفيد بقية البنات اللى لسه ما شافتهوش
~~~ ويا ريت تدعولى باللى فى توقيعى ~~~
~ نورتونى ~
~’ فى رعاية الله ‘~
يا مؤمنين صلوا عليه يا مؤمنين صلوا عليه 567605_42.gif سوبر فتكات Fatakat 567605 لا إله إلا الله وحده لا شريك له، له الملك وله الحمد وهو على كل شئ قدير – لا حول ولا قوة إلا بالله. – سبحانك اللهم وبحمدك لا إله إلا أنت أستغفرك وأتوب اليك – لا إله إلا أنت سبحانك إنى كنت من الظالمين.