فطيرة جبنة ملوكى من بواقى الرقاق المكسر
من مطبخ ردينى
السلام عليكم ورحمة الله وبركاته سبحان الله بحمده عدد خلقه ورضا نفسه ومداد كلماته وزنة عرشه
إزيكم يا أحلى صحبة فى أحلى مدونة
كل سنه وكلكن بخير بمناسبة دخول شهر شعبان واللهم بلغنا رمضان
اتفضلوا الفطيرة المتواضعة دى معايا
مش حتصدقوا عملتها ازاى
تعالوا أحكيلكم الحدوتة بتاعتها
النهاردة لقيت عندى بواقى رقاق مكسر حوالى اتنين أو تلاتة ما ينفعوش فى حاجة خالص
طب والعمل ما ينفعش أرميه ماما –ربنا يشفيها-لو عرفت انى رميته حتزعل منى كتير ومش حتجيبلى رقاق تانى وأنا ما قدرش على زعلها لإنى عايشة بحسها المهم شغلت الفهامه وافتكرت حاجة كانوا بيعملوهالنا زمان واحنا صغيربن وكانت بتعجبنا كتيير جبت طاسة تيفال وبعدين غيرت رأىى وجبت الشوايه ودة لإن الرقاق كان على شكل مستطيل ودهنتها سمنة سايحة وابتديت أبل الرقاق بمية من الحنفية وأرص الرقاق المكسر بس خليت اللى حالته كويسة شويه فى قعر الشواية وبعدين دهنته سمنه زى ما الصور موضحة
لحد أما وصلت لنص الكمية
حطيت جبنه رومى
وكملت رص الرقاق
المكسر جامد خليته فى النصف بعد ما حطيت الجبنة الرومى
كل حته أرصها أبلها الأول بالمية وأدهنها بالسمن لحد أما خلصت الكميه كدة
بقى عندى مشروع فطيرة …. يا رب يكمل وبعدين بليت الرقاق اللى عالوش كويس بالمية ودهنت حبة سمنة حلوين وركنت الصينية شويه حوالى نصف ساعة كدة
وعلى نار هادية خالص حطيت الشوايه عالنار وغطيتها
ولما احمرت الفطيرة من تحت قلبتها عالوش التانى ورشيت عالوش شوية ميه
صغيرين وغطيتها تانى لحد أما احمرت من الناحية التانية قلبتها مرة تانية وبرضه رشيت شويه ميه صغيرين عالوش وقلبتها مرة تانية عشان كنت عايزاها تحمر شويه كمان من الناحية التانيه وطبعا رشة الميه دى خلت الفطيرة طريه
وبعدين قطعتها
ودة شكلها لما قدمتها
كان ممكن أساويها من على الجناب بسكينة مشرشرة بس أنا فضلت أسيبها زى ما هية كدة واحتفظت بيها متغطية لحد أما جه وقت الأكل ودة عشان تفضل طرية وما تنشفش
بصراحة كان طعمها خطيييييييييييير
وكل واحد من ولادى طلب منى أعملهاله المرة الجاية بمكونات مختلفة
ما يعرفوش انها كانت وليدة الموقف وممكن قوى ما تتكررش تانى وأحب أعرف رأيكم بمشاركة صغننونة منكم لو عجبكم الموضوع قيموه مش تشوفوا الموضوع وتسيبونى وتمشوا
وقبل كل دة حاستنى دعاءكم ليا بصلاح الأحوال وراحة البال ولولادى بالهداية والتفوق والنجاح
وخصوصا الزغلول الكبير اللى فى الثانوية العامة اللى مورينى فصول السنه كلها فى يوم واحد مواضيع هذا القسم برعاية
ردينى ردينى 107140_3.gif فتكات ست الكل Fatakat 107140 الرماية – مصر