السلام عليكم ورحمة الله وبركاته
صلوا على اللى هيشفع فيكوا
بصوا بقى يا فتوكاتى يا حبيباتى
احيانا لما بنعمل عزومة بنحتاج ملوخية معاها لكن بقى بتكون الاعداد كبيرة ومافيش وقت مثلا او جت على غفلة العزومة
وطبعا مش هتفضلي تقطفي في الملوخية وتسيبيها تنشف وبعدين تخرطيها بالمخرطة ولا اى كان وبدل كل الوقت دا ممكن تستغليه في صوانى بقى ولا حاجات تانية
نفكر في الاكياس المثلجة بس مرة تظبط ومرة ما تظبطشي وتخافى تجبيها في العزومة وتكسفك قدام الناس
كتير بيعملوها وتقللك بتسقط منى واللى تقللك بتبقى كانها بايتة وريحتها مش عاجبانى وكذا مشكلة
النهردة بقى هاقللكوا تتصرفوا ازاى معاها علشان تطلع بالظبط زى المخروطة طازة وريحتها تجيب لاول الشارع
اول حاجة يا بنات اعملى حسابك على وزن الكيس
يعني لو جبتي كيس 400 جرام اعرفي هياخد شوربة اد ايه وايه الخطوات المطلوبة
اول حاجة هتجيبي الكيس وهو متلج ( خللى بالك لو نزلتيه في الشوربة سخنة هتسقط الملوخية لانه هيكون متلج وعلى ما يفك هيكون نصها ساح وغلى كتير ويسقط , وفي نفس الوقت لو لو سبتيه يفك خالص برده هتسقط ولو ما سقطتشي هتلاقيها اغمقت جامد وممكن احيانا تطلع ريحة كانها كمكمت )
يبقى الحل ايه؟؟؟؟؟؟؟؟؟؟
الحل انك اول ما تطلعيها من الفريزر تسيبيها شوية صغيرة بس كانها بتهدى من التجميد مش تفك
بعد كدا هتجيبي مقص وتقصي الكيس وتطلعى قالب الملوخية في طبق واسع مسطح وبالسكينة بقى تقطعى فيها مش هتلاقيها جامدة هتلاقيها سهلة جدا في تقطيعها عادى لانها مش زى اللحمة مثلا كتلة واحدة لا هيا اصلا فتافيت فعلشان كدا هتتقص مكعبات كبيرة وبعدين تفضلي تقطعى كل مكعب لاصغر فاصغر وهتلاقيها سريعة خالص وسهلة وهتقطعى لحد ما تبقى صغنتوتة هتاخد بالظبط 2 دقيقة بالكتير اوى وتبقى كدا جاهزة
هنروح على البوتوجاز بقى هنشغل 3 عيون بوتوجاز
سبق وقلنا لو الكيس 400 جرام هيحتاج حوالى 10 كبشات شوربة بس انتى بقى هتبتدي ب8 كبشات بس في كسرولة دي على عين
العين التانية هتحطي باقي الشوربة تغلي المهم ان الحلتين يغلوا مع بعض ولو الباقى اللي على جمب غلى الاول بحاجة بسيطة وطى عليه
العين التالتة عليها الزيت وفيه الثوم المفروم ناعم وخدي بالك سر ريحة الملوخية كمان بينجح هنا , دا غير انها مش هتسقط منك ازاى ؟ انك تخلى التوم يتحمر في نفس وقت اللى خلصت فيه الملوخية بالظبط يعني لو حسيتي ان الملوخية لسه عليها شوية صغيرين ما تقوليش مش مهم لا شيلي طاسة التوم على جمب كدا قبل ما يبقى دهبى
غليت الشوربة في الكسروة والحلة والتوم بدا يسخن زقي بقى الملوخية من الطبق المسطح نزليها في الكسرولة وقلبي بالمعلقة وشوفيها بقى غالبا ممكن تلاقيها تقيلة شوية هتزودى من الحلة بقى الكبشتين الباقيين اللي قلنا عليهم في الاول وتقلبي هتطلع ابيض على الوش هتشيليه بمعلقة هيكون التوم اتحمر والملوخية غليت من الحروف كدا وهتبدأ تدخل على جوة اطفي وطشي عليها التوم علطول هتطلع مية مية وريحتها واضحة جدا
ملحوظة مهمة لو نجحتى في ان الشوربة كللها تكون بتغلى علشان لما تزودى شوربة تكون زى بعضها وكمان نجحتى في انك تخللى التوم يحمر في نفس لحظة انتهاء الملوخية هتطلع ممتازة يا بنات
وطبعا لو زودتى وزن الملوخية هتزودي عدد كبشات الشوربة وهتفرق حاجة بسيطة من حجم كبشة كل بيت عن التانية بس حاجة بسيطة يعني واحدة ممكن تزود كمان كبشة وواحدة لا انا باعمل بالعادية مش الصغيرة ولا حاجة
اتمنى يارب يكون الموضوع سهل وواضح ولو اى واحدة مش فاهمة تقللى احاول اعدل بسرعة كلامى
اتمنى الموضوع يعجبكوا وردودكوا بتسعدنى اكتر بكتير من التقييم لانها بجد بتسلينى وهيا اول حاجة بادخل ادور عليها كل يوم ياترى حد رد عليا؟ 
اترككم في رعاية الله استغفروا الله وصلوا على الحبيب المصطفى مواضيع هذا القسم برعاية
Kazouzah Kazouzah فتكات ست الكل Fatakat 1115572 حتة كويسة – بلاد الله واسعة