السلام عليكم و رحمة الله و بركاته
اهلا بكم في حلقة اليوم من مسلسل فتوك و فتوكة حول العااااالم في تلاتين يوم
النهاردة الحلقة الرابعة من المسلسل
الحلقة الأولى عملنا كبة الرز
الحلقة التانية كانت عن الأكل الصيني
الحلقة الثالثة كانت عن الأكل الليبي
و النهارضة الحلقة الرابعة حتكون عن الأكل التركي
و مش أي أكلة بقى
ده
الإسكندر كبااااااااااااااااااب
انا شفت وصفاات كتييييير على الانترنت للاسكندر و للأسف مفيش اي وصفة منهم زي الأصلية
حتقوليلي و انتي يعني جبتي الأصلي ده منين ؟؟
أقول لك انا كنت في تركيا شهر و اكلت اسكندر لما طلع من مناخيري
و غير كده جوزي جدته تركية و كانت هارية ابوه اسكندر و حمايا بقى بيعملها بإبداع
و انا تعلمتها طبعا
و الوصفة تمااااااماااا زي ما أكلتها في تركيا
طيب حتقوليلي قصري الكلام و هاتي الوصفة
أقول لك بما اننا مسلسل حسيبكم شوية مع الاعلاناااات
فاصل و نواصل
نظافة ايه … يا عيني عليه .. نظافة اوكسي البمبي .. بقعة ايه .. دي كركديه .. يشيلها اوكسي البمبي
بدل ما تكسي .. اغسلي بأوكسي
: sFun_bananaunripe::sFun_cheerleade r2:
عدنا من الاعلان
أول حاجة يا فتوكة الأكلة دي ممكن تجهزيها قبل بيوم أو يومين و لما تيجي تطبخيها حتاخد معاكي دقايق بس
و انا بعمل كده
اجهز اللحمة في يوم .. و دي تاخد تقريبا ربع ساعة تجهيز و احطها في الفريزر
تاني يوم بعمل العيش و انا بعمل العشاء .. و اهو ناخذ حتة نتعشى بيها و اشيل الباقي في كيس في التلاجة لتاني يوم
يبقى تالت يوم هو اللي حناكل فيه
بعمل بس الصلصة و اطلع اللحمة احمرها على النار اسخن الخبز في دقيقة و يكون الاكل جاهز على السفرة
يعني الاكلة دي تنفع للأخوات العاملات او ربات البيوت لو كنتي ناوية تعزلي البيت في اليوم ده او عندك خروجة الصبح و مفيش وقت للطبخ
نيجي للوصفة
أول حاجة حنحضر اللحمة
تجيبي ربع كيلو لحم بوفتيك و ربع كيلو لحم مفروم ( الربع كيلو مفروم ده يكون نصه لحمة و نصه شحمة بقى و الأفضل اغلبه شحم ) ( و ما تخافيش ده حيذوب كله في النار مش حتاكلي الشحم يعني )
ناخد أول حتة من البوفتيك و نحطها بين قطعتين نايلون و هوووووووب عليها ندقها لحد ما تبقى شريحة زي الورقة بالضبط و كل ما كانت أرق كل ما كان احسن .. و نشيلها على جنب و ناخد اللي بعدو و اللي بعدو لحد ما نخلص
نروح بقى للحمة المفرومة و دي نحطها في الكبة مع ثلاث فصوص توم و قرن فلفل و لو مش عايزاها مشطشطة حطي نص الفلفل او الغيه
و نتبلها بملح و فلفل اسود و بس
بعد ما هرينا اللحمة في الكبة نطلعها و ناخد اول شريحة بوفتيك و نحط عليها الخلطة العجيبة دي طبقة رقيقة جدا و نساويها و نحط فوقها شريحة بوفتيك تانية ثم لحمة مفرومة و هكذا لحد ما يخلص المقدار اللي عندي
و نلفها بنايلون و هووووووووووب على الفريزر
و دي لاااااازم تبقى في التجميد يوم كامل على الأقل
طبعا انا ما صورتش الخطوات دي لأن كانت ايدي مشغولة على الأخر و بعمل الأكل و انا في نقاش حاد مع الأخ فتوك و كنت ممكن أدق صوابعه بدل اللحمة لولا ان طعمها حيكون غريب شوية
دي بقى اللحمة لما طلعتها من الفريزر
و دلوقتي بقى نيجي للعيش
ده طريقته كبايتين دقيق على رشة ملح و ملعقة صغيرة خميرة و ملعقة صغيرة سكر و تعجنيها كده
تسيبيها لحمد ما تخمر
و بعدين تفرديها و تخبزيها على البوتاجاز من فوق مش بتدخل الفرن ابدا
و العيش ده احيانا بعمله مع الكباب او الفراخ المحمرة و الا مع الكبدة دي تبقى حاجة خرااااااافة
و احيانا بعمله على العشاء مع و احشيه جبنة قبل ما احطه على النار و ده بقى طعم تاني خااااااالص
المهم ده بقى شكل العيش
نيجي بقى لليوم الموعود و هو اليوم اللي حنطبخ في الاكلة دي
ابتدي الصبح اطلع اللحمة من التلج علشان تفك شوية و بعدين اروح اوضب البيت و انسى ان في حاجة اسمها غداء خااااالص و اشيله من دماغي
لحد ما اسمع الجرس ضرب و الأخ فتوك شرف
يقول فين الأكل يا ولية ؟؟
أقول له اصل حماتي قالت نيجي ناكل عندها النهارضة و انا ما طبختش ( لزوم التخويف بقى ) وشه يجيب الوان و اقول له دي امك حبيبتك معقولة تزعل كده طب انته بس ادخل اعمل شاور و غير هدومك البس حاجة حلوة على ما انا غيرت هدومي و نطلع
يروح المسكين على الحمام من غير كلام
ادخل انا اجري المطبخ
و اخد طماطمايتين احطهم في الكبة مع فص توم و بعدين هوووووب على الحلة و معاها شوية زيت و اخليها تستوي .. مش حتاخد وقت لأن مقدار صغير .. و اضيف لها شوية مية بعد كده و ملح و فلفل احمر و كله تمام يا ريس
اخد اللحمة
احطها على النار من غير لا زيت و لا حاجة لأن فيها شحمة و دي بقى حتدوب و نصفيها
كدة بقى تتحمر في حلة تيفال طبعاااا
و بعد ما تجهز اللحمة اخد العيش و اقطعة بالمقص كدة
و احط عليه اللحمة و فوقها الصلصة و ادوب ملعقتين زبدة لكل طبق و ارشهم على الوش و يجي الاخ فتوك لابس و متهندم علشان يخرج يلاقي الاكل على السفرة و من غير اي مقدمات و لا فرصة علشان أصور يهجم على الضحايا المساكين
ربنا يتولاهم بقى
مواضيع هذا القسم برعاية
الشيف إيمان الليبية الشيف إيمان الليبية سوبر فتكات Fatakat 599908 Santa Cruz – Bolivia