بصوا يا فتاتيك.. ربنا وحده يعلم أنا بحبكم قد ايه… وربنا يجعل كلماتكم الطيبة ونصايحكم في ميزان حسناتكم.. وأنا هاقول لكم على تجربتي مع ابني والاكتشاف اللي ربنا عترني فيه خلصني من مشاكل الكحة والصدر مع ابني بنية الإفادة وربنا يتقبل الموضوع ده مني ويجعله في ميزان حسناتي..
ابني أولا عنده حساسية على صدره.. لما بتجيله نوبة الكحة مش بيقدر ينام منها… حتى لو خد لبوس الكحة ممكن مينامش وينام تاني يوم بالليل.. ودايما بياخد مضادات حقن لإن المضادات العادية مش بتجيب معاه حاجة.. لازم كورس حقن ونكمل بالمضاد العادي.. امهات كتير اولادهم زيي وعارفين أنا باتكلم في ايه بالظبط…
أنا طبعا طول الوقت بخاف إنه يجيله برد.. عشان كده باحرص على قد ما أقدر إنه ياخد ثمرة كيوي في اليوم عشان فيها فيتامين سي قد 4 برتقالات.. والعسل طبعا مرة في اليوم…
بس برضه مش ده الاكتشاف.. أنا ابني لما بيجيله الكحة دي بتكون ببلغم.. لدرجة إنه نايم وعمال يبلع بلغم! ومناخيره تتسد فجأة يقوم صاحي من النوم عشان ياخد نفسه (مش بيعرف يفتح بقه وهو نايم.. غير ساعات بيكون فيه التهاب في زوره! فمش بيعرف ياخد نفسه لو مناخيره اتسدت).. جربت نقط الأنف للأطفال ولكنها بتريح حبه وترجع تسد أكتر من الأول والكحة برضه بتفضل مستمرة.. وفضلت على الحال ده سنين.. لحد من فترة قريبه جربت الفيكس.. ايوه دهان فيكس فابوراب اللي هو موجود تقريبا في كل بيت.. وفعلا فرق جاااااااامد معاه.. بادهن له صدره وأحط له حبه كده تحت مناخيره وهوه نايم… بيسلك له مناخيره وزوره وبياخد نفسه حلو ويخليه ينام.. مع السوايل الدافية بإذن الله الكحة تروح.. أنا كنت باحس بذنب فظيع على كمية المضادات اللي بياخدها.. لإنها بتضعف الجسم قوي.. بس كانت هي الحل الوحيد.. طبعا لو فيه سخونية لازم ع الدكتور والمضادات وكده.. إنما لو هو على قد الكحة والبلغم بإذن الله ده يكون الحل
ويا ريت الموضوع يتثبت لإنه فعلا مهم.. وسلامي ليكم وربنا يحفظ أولادنا وحبايبنا من كل شر
توتة في المطبخ توتة في المطبخ 618823_2.gif فتكات متميزة Fatakat 618823 الجيزة – مصر