السلام عليكم ورحمة الله وبركاته
انا بقى كنت جعانه فقلت لما اشوف اى حاجه اعملها ليا ولبنتى بما انى جوزى مسافر وقاعده بخانق دبان وشى
فقلت اعمل عجينه واحشيها اى حاجه فملقتش عندى خميره فقلت برده هعملها وزى ما تيجى منا جعانه بقى
المقادير
كوب ونص دقيق
شوية ملح
معلقه بيكنج بودر
ماء دافىء للعجن
وعجنتها وسيبتها ترتاح شويه
وجيت ادور على اى حشو ملقيتش ولا جبنه ولا حاجه
فطلعت حته فرخه من بتاع البانيه وقطعتها صغير
ومعاها بصل جوانح وفلفل اخضر جوانح(ولو فيه زتون وجبنه كمان تبقى جميله)
وملح وفلفل وبهارات وبصل بودره وتوم بودره
يعنى زى شاورمه كدا وشوحتها على نار هاديه وسيبتها تستوى ومبتاخدش وقت والبصل والفلفل بيكونوا مش مهريين يعنى
وبس
طلعت العجينه قطعتها 2 وفردت كل قطعه رقيق
وحشيتها بالشاورمه دى وقفلتها زى القطايف كدا وحطيتها فى صينيه دهنتها زيت فى فرن عالى الحراره ومسخناه من قبلها بشويه
ولما احمرت من تحت قلبتها على الوش التانى احمر برده وقعدت حوالى نص ساعه فى الفرن
وبجد طلعت حلوه(اصل الجوع دا بيعمل من الفسيخ شربات) ومش مكتومه زى ما كنت متخيله اكمن مفيش خميره
والدليل انى قاعده اكل اهو
بس للاسف مبعرفش احط صور
يلا بقى تخيلو وخلاص
السلام عليكم ورحمة الله وبركاته
سلاموز مواضيع هذا القسم برعاية
ام جنونه ام جنونه 632179_1.gif فتكات رائعة Fatakat 632179 المنوفيه – مصر