السلام عليكم ورحمة الله وبركاته
ازيكم يا احلى امهات
كنت شفت موضوع من اكتر من شهر عن وحده بتعاني من ترهل في صدرها بعد ما فطمت رديت عليها لكن النت فصل وانا برد فقلت هبقى اكتب موضوع عشان عدد اكبر يستفاد وبعدين انشغلت ولسه فاكره قريب
اقولكم تجربتي يارب تفيد حد
ابدأ الاول ازاي فطمت بنتي
الاول انا الحمدلله فطمت بنتي يوم ما كملت سنتين بالظبط منقصتش يوم ولا زودت يوم ودي نصيحه لكل ام بجد بلاش تفرطي في حق بنتك او ابنك في الرضاعه الطبيعيه حتى لو اللبن قل الرضاعه مش لبن بس الرضاعه احساس بالامان وزيادة ثقه بالنفس الا طبعا لو وحده عندها مشاكل وبأمر دكتور او وحده حملت مثلا غير كده مهما كنتي بتتعبي دي ايام بتعدي وبتحسي بعد كده بالفخر انك كملتي مدتك ومتعرفيش اجرك عند ربنا بيبقى عامل ازاي
انا كنت قريت قبل كده ان وحده امريكيه اجبرت انها تتجند في افغانستان وكانت بترضع فكانت بتعصر لبن منها كل يوم وتشحنه لابنها يروح امريكا وده كللل يوم تخيلي ؟
احمدي ربنا على اللي انتي فيه
اكملكم بقى فطمت بنوتي ازاي
انا كان كل همي انها متضايقش مني ومتفهمش اني بمنع عنها حاجه وكده لان بنتي حساسه جدا وممكن فعلا متصرش عليه لو اعترضت كذا مره لكن ده هيأثر في نفسيتها جدا وانا فاهمه بنتي كويس اوي فانا استغليت حساسيتها دي في حاجه تانيه جبت لزق طبي وحطيته على صدري ولما طلبته قعدت اقولها واوا يا لولو اه بيوجعني وكدا فهيا استغربت وسكتت وبعد شويه طلبته تاني فورتهولها فضحكت لما شافته كدا المهم سكتت برده وبعدين يا حبيبة قلبي طلبته تاني فانا اديتهولها وهوا عليه اللزقه طبعا مش هتعرف ترضع بس عايزه ابينلها اني مش قصدي امنعه منها وهي بتحاول توصل انا عملت نفسي بتوجع اوي وتعبانه وبصوت وكده فهي طبطبت عليا وقلتلي معس ماما معس يعني معلش وسابتني ومشيت جبتلها حاجات بتحب تاكلها وعصاير بتحبها وكده وقعدت الهيها طول اليوم وهيا كل شويه تبصلي باشفاق كده عايزه ترضع لكن مش راضيه تقول وجه وقت النوم وده اصعب وقت فكرت انيمها جنب ماما لكن رجعت في كلامي وقلت اجرب تبقى جمبي عادي هيا كانت مبتنمش الا عليه (وده غلط طبعا حاولي متعوديش طفلك ينام عليه )وعمرها ما خدت حاجه غيره لا ببرونه ولا تتنايه اللي بيسكتوا بيها الاطفال ولا اي حاجه يعني كانت متعلقه بيه جدا المهم نامت جمبي ومن غير ما تطلبه خدت جمب وقعدت تعيط انا خدتها في حضني وطبطبت عليها شويه ومشيت بيها شويه وكدا وبعدين نامت كانت المشكله الاكبر انها بتصحى بالليل ترضع بس المهم انك متضعفيش طبعا صحيت وعيطت وبرده خدتها في حضني وطلبته وريتهولها تاني واديتلها شوكولا وشربتها ميه ومرضتش تنام برده خدتها في حضني تاني وقعدت اطبطب عليها واقرألها قرآن وكده فحطت صباعها في بقها ونامت وطلعته من بقها بعد فتره ودي كانت اصعب ليله بعد كده بقى الحاجات دي بتتكرر بس على خفيف ووقت النوم بس لحد ما نسيته خالص طبعا لازم تعيط شويه وتسكت شويه ده شئ اساسي الرضاعه للاطفال بتبقى زي الادمان وصعب يتساب بسهوله بس المهم انك الاول متضعفيش والتاني اوعي تزعقيلها من كتر عياطها مثلا او كده لا ابدا كفايه اللي هيا فيه استحميلها وهاتيلها حاجات بتحبها وخرجيها وكده والاسلوب اللي استخدمته انها تسيبه بمزاجها حتى لو هيا عايزاه بس لاني صعبت عليها افضل بكتير من انك تجبريها تسيبه او تكرهيها فيه بانك تحطلها شطه ولا صبار ولا الحاجات دي والمهم كمان انك متبعديش عنها ابدا لانها هتبقى محتاجالك اكتر من كده مش هتبقي انتي والرضاعه يعني متسيبيهاش عند مامتك او حماتك او اختك لا خليكي معاها هتهدى اسرع واسبوع بالكتير وهتنسى تماما فطام الطفل ده مهم جدا وبيفرق في نفسيته حتى لما بيكبر والحمدلله انا متأكده اني متعبتش نفسيتها ولا بواحد في الميه وبالتالي نفسيتي انا كمان متعبتش وقبل كل كده استعيني بربنا وادعيه انه ييسر عليكي وعليها الموضوع
للملاحظه بس انا بتكلم عن اليوم اللي هتمنعيه فيه نهائي لكن لازم قبل قرار الفطام بشهر مثلا تبدأي تقللي في عدد الرضعات بالتدريج ده هيساعدك ان شاء الله وهيريح صدرك كمان
انا فطمت بقالي شهرين والحمدلله مفيش مشاكل ترهل ولا حاجه هقولكم ازاي بس في المشاركه الجايه عشان انا رغيت هنا كتير اوي
استنوني
سبحانك اللهم وبحمدك اشهد ان لا اله الا انت استغفرك واتوب اليك
Zyzy Zyzy 72191_5.gif فتكات رائعة Fatakat 72191 Al-Mansoura – Egypt