إبن جوزي أتجوز في مصر و لما رجع هو و عروسته زمتهم و أنا كان نفسي أعمل أصناف كتير بس لأني بأشتغل و معظم المغتربين عارفين الشغل بيكون تقريبا يوم كامل برة البيت
الأصناف كانت عبارة عن : بط – رقاق باللحمة المفرومة – محشي ورق عنب – محشي كرنب – رول لحمة مفرومة محشي بالخضار – طاجن بطاطس محشية باللحمة – فراخ بانيه – سلطة فتوش – سلطة حمص
الصور
رول اللحم المفروم بالخضار
بتجيبي اللحمة المفرومة و بتتبليها زي الكفتة بالظبببط و أهم شئ يكون البصل معصور من المية عشان مش تتفكك منك
تجييبي صينية و تفردي فيا ورق فويل و تحطي عليه اللحمة المفرومة مفرودة خالص في الصينية فوق الفويل
لحمة مفرومة و عليها بصل مبشور و معصور ملح و فلفل و ورق بقدونس
و مجموعة خضار اللي موجود عندك جزر بطاطس كوسة فاصوليا خضرا بصل تعمليهم سوتيه ع النار بس يكونوا ماسكين نفسهم مش يتهروا منك و تحطي عليهم رشة ملح و فلفل أسمر ولما يهدوا شوية تحطيهم فوق اللحم من الطرف وتبدأي تلفي اللحمة روول زي السويسرول بالظبط بإستخدام طرف ورق الفويل ترفعيه و وتكملي بإيدك و لغاية ما يكون روول تروحي تلفيه بالفويل زي البونبوناية و تحطي كوباية مية في الصينية و تدخليه الفرن لغاية ما يستوي
لما يستوي أفتحي الفويل بالراحة و أفتحي الشواية ياخد لون دهبي
يطلع من الفرن حطيه في التلاجة ولو مستعجلة يبأة في الفريزر المهم مش تقطعيه إلا لما يبرد تماما عشان لما تبدأي تقطعيه ما يتكسرش منك أفتحية و بسكينة حامية قطعيه ترنشات و رصيه في الطبق و بألف هنا و شفا
الفراخ البانيه
تبلتها بمية البصل و الفلفل و الملح و معلقة مايونيز و هوت صوص و سيبتها في التتبيلة من قبلها بيوم
و طلعتها و حطيتها في دقيق و بقسماط عليه نشا و بيكنج بودر و بعدين دخلتها التلاجة ترتاح و طلعتها على التحمير
البط
البطة غسلتها كويس جدااا بالدقيق و الخل و الملح نقعتها في مية بلمون و شطفتها تحت المية و سيبتها تتصفى في مصفاة
جبت بصلتين كبار ودعكتهم بالفلفل الأسمر و الملح و سنة بهارات مش كتير و وحفنة زبيب و دة إختياري و حشيت بيه البطة و سلقتها عادي و أشيل الريم لغاية ما المية تكون رايقة تحطي بصل و ملح و فلفل و ورق لوري و حبهان وممكن جزر و سيبيها تتسلق كويس
طلعتها من الشوربة جبت في طبق غويط معلقتين كبار صلصة و شوية زعتر صغننين لومفيش مش مشكلة خالص و فلفل وملح و معلقة سمنة و شوية زيت و ممكن معلقة صغيرة عسل نحل ( إختياري ) لخبطت كل دة ودهنت البطة من كل ناحية ودخلتها الفرن بس
من وقت للتاني قلبي فيها لغاية ما تتلون من كل الجوانب و تقدم ……
سلطة الفتوش بالزبادي
في الوصفة دي أنا عاملة 2 × 1 يعني سلطة فتوش و سلطة شامي مع بعض
دي سلطة خضرا عادية خس جزر خيار طماطم متلخبطين على بض و يتبلوا تتبيل خفييف ملح و ليمون
في الخلاط بأة أو الكبة حطيت الآتي : زبادي – لبنة – معلقتين مايونيز – معلقة طحينة – 3 فصوص توم – عصير ليمون – زيت زيتون – ملح – فلفل ورشة خفيفة كمون و ضرتهم في الخلاط و صبيتهم فوق السلطة الخضراء و دة يكون وقت التقديم عشان الخضرة ما تدبلش وتطرا و رشيت عليهم عيش محمص………..
البطاطس المحشية
بطاطس متوسطة الحجم قورتها من الداخل و غسلتها كويس و سيبتها تتصفى من المياه و دحرجتها في زيت يادوب حاجة بسيطة و صفت من الزيت و برة عملت عصاج عادي و حطيت معاه عودين بقدونس على كزبرة على شبت و بهرت اللحمة بتاعتي كويس و حشيت البطاطس و رصيتها في الطاجن برة في الخلاط حطيت طماطم و توم و شوية ملح و فلفل بسيط و كوب مية و ضرتهم في الخلاط و نزلت على البطاطس و دخلتها الفرن و تاخد لون
المحشي أكيد كلنا أساتذة فيه و كل واحدة ليها طريقتها المميزة لكن أنا سبتكه و حشيت و سويت عادي
الرقاق
أنا مغتربة و مش عندنا رقاق لكن لقيت في السوبر ماركت نوع خبز خفيف طري قريب من الرقاق عملته كالآتي
حطيت في الصينية حوالي 3 طبقات منه بين كل طبقة و طبقة دهنت سمنة من غير ما أبله في الشوربة لأنه طري و خوفت يعجن مني بعد 3 طبقات حطيت العصاج و كنت حاطو معاه قرن لفل حامي و معلقة صلصة و كملت باقي الطبقات
قطعته و دهنت الوش بالسمن و دخلته الفرن و بعد ما أحمر حطيت عليه كوباية شورة مع لبن و فلفل أسمر و دخلته تاني الفرن و لما شرب الشوربة طلعته و غطيته عشان يفضل طري حاولت أصور بعض الخطوات
و أشكركم مواضيع هذا القسم برعاية
*** هداوة السر *** *** هداوة السر *** فتكات متميزة Fatakat 270933 أتمنى أن أعيش في قلب و عقل زوجي – قطر