السلام عليكم ورحمة الله وبركاته
ازيكم يا فتوكات عاملين ايه كل سنة وانتم طيبين ورمضان كريم النهارده هانزل لكم صور عزومة كده ع السريع أخويا أتصل الساعه 12 الضهر وقال انه جاي ع الفطار واخويا ده نباتي مش بياكل غير اللحمة المفرومة بس
معلش بقى انا هانزل صور الاكل والتحضيرات السفرة النهائية مالحقتش اصورها اصل المغرب أذن وانا لسه ماخلصتش
المنيو بقى
مكرونة بشاميل
كانيلوني
فراخ بانيه
سبرينج رولز
سمبوسة وبطاطس فارم فريتس
سلطة طحينة
شوربة كريمة الفراخ
العصاير كانت مانجه وبطيخ باللبن
والحلو كنافه بالقشطة وقطايف بالمكسرات
ندخل بقى ع الصوردي المكرونة بشاميل
انا بعمل المكرونة بالصلصة عادي وبعدين اقسمها طبقتين واللحمة المفرومة في الوسط
البشاميل بقى بقلب الدقيق والمرقه في السمنة وبعدين اضيف اللبن والميه وبعدين اي نوع جبنه رومي او كاسات او مثلثات
وبعدين احط البشاميل ع الوش وعليه نقط زبدة
وده شكلها بعد الغرف
الكانيلوني بقى
العجينة كل كوب ونص دقيق عليه بيضه وكوباية لبن وملح وفلفل وحاشيتهم لحمة مفرومة
الصلصة اللي ع الوش هي صلصة +زعتر +سكر اوكاتشب + ملح وفلفل وبابريكا
وبعدين رشيت عليها جبنة شيدر مبشورة
سبرينج رول حشيت جزء جبنة وجزء خضار سوتيه بسله وجزر مبشور معلش ماصورتش بقية الخطوات
السمبوسه
انا بعمل عجينه (دقيق وملح وسكر وبيكنج بودر وملعقه لبن بودرة وماء واعجنهم كويس وافردهم واقطع الاشكال اللي عايزاها
الشوربه
جوزي بيحبها جدا وبيقول احلى من اللي بناكلها برة
المقادير
الطريقة
بصله متقطعه ناعم جدا او مبشورة نقلبها في سمنه لحد ما تبقى شفافه كده ماتحمرش ابدا وانزل بالمرقه وبعدين الدقيق وبعدين اضيف الميه او الشوربه واقلب كويس وبعدين اضيف اللبن وبعد كده الفراخ اللي متقطعه مكعبات
الفراخ دي باقيه من امبارح كنت عاملها بالليمون والسماق
دي بعد الغرف ده المج بتاعي زينته بالبابريكا اتفضلوا
ودي سلطة الطحينة انا بعملها بالزبادي بتكون تحفه
وزينتها بالسماق
معلش بقى مالحقتش اصور الفراخ البانية ولا السفرة كامله يلا بقى قولولي رأيكم
ومش ها أوصيكم بقى دعوة حلوة كده في العشر الأواخر أن يرزقني الله واياكم الجنة بغير حساب ولا سابقة عذاب
والتقييم بقى اوعو تنسوا
مواضيع هذا القسم برعاية
سمراء النيل 210 سمراء النيل 210 فتكات نشيطة Fatakat 445799 قاهرة المعز – مصر ام الدنيا
سبحان الله و بحمده