السلام عليكم يافتكوات
انا جايبة لكم معلومة حلوة اوى يا رب تنفعكم . ازاى الدكاترة بيحسبوا الوزن الطبيعى ويعرفوا اذا كان وزنك طبيعى ولا زائد
احنا حنستخدم الألة الحاسبة شوية
اولا علشان تعرفى انت وزنك طبيعى ولا لأ اوزنى نفسك يوم الصبح بعد الحمام وقبل ما تاكلى او تشربى حاجة
ثانيا قيسى طولك بالظبط
ثالثا حنحسب العلاقة بين الوزن والطول حاجة اسمها مؤشر كتلة الجسم وهى بتساوى الوزن بالكيلو مقسوم على مربع الطول بالمتر(مش بالسنتيمتر)
يعنى مؤشر كتلة الجسم = الوزن (بالكيلو) / (الطول بالمتر)2
اديكم مثال علشان اللى كانت ادبى و الكلام اياه ده
لو واحدة وزنها 70 كيلو و طولها 165 سم (يعنى يساوى 1.65 متر سهلة)
يبقى مؤشر كتلة الجسم بتاعها يساوى 70 مقسومة على (1.65x 1.65) حيساوى 25.7
الرقم اللى طلع لكم بقى نقارنه بالارقام اللى جاية
لو مؤشر كتلة الجسم اقل من 18.5 تبقى نحيفة
لو مؤشر كتلة الجسم من 18.5 الى 24.9 تبقى وزن طبيعى
لو مؤشر كتلة الجسم من 25 الى 29.9 تبقى وزنك زائد بس لسة ما دخلتيش فى السمنة فألحقى نفسك
لو مؤشر كتلة الجسم من 30 الى 34.9 تبقى فى سمنة درجة اولى
لو مؤشر كتلة الجسم من 35 الى 39.9 تبقى فى سمنة درجة ثانية
لو مؤشر كتلة الجسم اكبر من 40 تبقى فى سمنة درجة ثالثة (سمنة مفرطة)
يعنى فى المثال اللى فات مؤشر كتلة الجسم 25.7 يبقى وزن زائد
يا رب اكون افدتكم بحاجة وان شاء الله نبقى كلنا وزن طبيعى
السلام عليكم
Ramadanaya Ramadanaya 277427_1.gif فتكات حبوبة Fatakat 277427 الاسكندرية – مصر