السلام عليكم ورحمة الله وبركاته
إزيكم يا بنات
أنا لقيت بنات كتير فى المدونة بيسألو عن طريقه حلوه ومجربه
لتخليل الزيتون وكنت برد عليهم دايما بطريقتى اللى بنجربها بقالنا أكتر من 12 سنه
وبعدين لاقيت غيرهم وغيرهم بيسأل
قلت أعمل الطريقه فى موضوع الكل يستفاد منه
والطريقه هى
شوفى ياقمر
بتجيبى الزيتون وتشققيه كل زيتونه شق بالسكينه أو إتنين لو عاوزاه بسرعه
وبعدين بتنقعيه فى مايه بس لمدة 3 أيام
بتغيرى عليه مره أو مرتين فى اليوم عادى
وبعدين بتجيبى برطمان كبير وفلفل أخضر شطيطه وتحطى الزيتون وفوقه الفلفل
بتدى الفلفل شق صغنن يالسكينه حسب الكميه طبعا
يعنى 5كيلو زيتون حطيلهم كيلو إلا ربع فلفل أو كيلو حسب راحتك
وبعدين تجيبى لمون كتير حوالى كيلو ونص لل5 كيلو وتعصريهم فى حله تانيه ومترميش القشر
وبعدين ترصى القشر فوق الفلفل وتصبى عصير الليمون
وطبعا تحضرى ملح خشن ودوبيه فى مايه تغطى الزيتون والفلفل والقشر وتكون مالحه شويه مش كتير
بس ياقمر وتقفلى عليه
لو مشققاه شقين
إن شاء الله على 15 يوم يبقى زى العسل
ولو شق واحد
على 25 يوم أو شهر بالكتير ودوقى الجمال بقى
وبالهنا والشفا ياقمره
على فكره الطريقه دى من قلب سينا بيعملوه كدا
وماما الله يرحمها كانت بتخلل كتير
ونفترى فى أكله زى التسالى
أنا حاليا مخلله من أسبوع بالطريقه دى
وعلى فكره كمان ده بيبقى
أطعم وماسك نفسه عن طريقة النت
وعن الزيتون اللى بنشتريه من بره
وأنا صورته ليكم دلوقت هو بقالو حوالى 10 أيام
ومينفعش أمد إيدى فيه التعامل بيبقى بالمعلقه أو الكابشه
على فكره الطريقه دى للأخضر والإسود
بس الإسود مبياخدش وقت ومتقلقيش لو لاقيتى ريم على وشه
شيليه عادى بالمعلقه ده من الزيت اللى فى الزيتون
لو فيدتكم مش هوصيكم تدعولى
مواضيع هذا القسم برعاية
دوده حبيبى دوده حبيبى 431574_20.gif سوبر فتكات Fatakat 431574 سوهاج – مصر