بسم الله الرحمن الرحيم
النهارده وانا بعمل الغدا قلت لنفسى
ما تصورى يا بت اللى بتعمليه وحطيه على فتكات علشان اسمع ردود حلوة منكم واتشجع كده واحس كده بنفسى
مع انى والله كنت مستعجله عشان اخلص الاكل بس قلت ابداااااااا لو يحصل ايه هصوره وهنزله ان شاء الله
مش هطول بقا عليكم كالعاده وهدخل على طول فى الموضوع
المقادير : نص كيلو لحمه مفرومه . 2 بصله صغيره او متوسطه . طماطمايه . بقدونس . ملعقه ونص فلفل اسود صغيره . 3 ملاعق ملح صغيره . 3 ملاعق ونص بهارات صغيره
الطريقه بقا : نبشر البصل والطماطم ونقطع البقدونس قطع صغيرة ونحط عليهم الملح والفلفل والبهارات ونقلبهم كويس مع بعض وده شكلهم
وبعد كده ناخد اللحمه المفرومه ونحطها على الخليط ده ونقلبهم كويس مع بعض كده
ونبدأ بقا نصبعهم ونحطهم فى الصينيه
انا فرشت الصينيه بورق فويل عشان متعذبش فى غسيل الصينيه واهى فرصة اريح دماغى من كركبه المطبخ
انا بصبعهم باستخدام ملعقه الاكل لو عندك سيخ يبقا زى الفل استمررررى بقا
وده بعد ما رصيت اللحمه كلها فى الصينيه وطبعا انا قصده اسيب الفراغ اللى فى النص ده عشان اعرف احط الكوبايه اللى هحط فيها الفحم
بكون قبل كده مسخنه الفرن وبحط فيها الصينيه وبسيبها على نار متوسطه لمده ساعه تقريبا او على حسب فرنك بقا
فى ساعات فرن بتكون ناره عاليه والعكس
اما بيكون قدامها زى 5 او 10 دقايق عشان تستوى بكون فى الوقت ده بسخن الفحم على البوتجاز
واحط الكوبايه فى وسط الصينيه وفيها شوية زيت مش كتير واحط فى الكوبايه دى الفحم اللى ولعته ع البوتجاز
انا معنديش كوبايه صغيره تدخل فى الصينيه فقلت لنفسى اتصررفى بقا
فعملت كوبايه باستخدام ورق الفويل وفكرتى نجحت وطلعت زى الفل
اكون محضره ورقه فويل اغطى بيها الصينيه عشان ريحه الفحم تكون فى اللحمه لانه بيدبها طعم تحفــــــــــــــــــه كأنك شوياها على شوايه فحم بالظبط
واسيبهم مع بعض حوالى 10 دقايق كده و اطلعهم بقا من الفرن وافضيهم فى الطبق
المفروض انى كنت اقطع بقدونس كفرش للحمه على الطبق وازوقه بحلقات الشيبسى
بس كنت مستعجله اوى لان جوزى كان عنده مشوار ضرورى وقالى يلا بسررررررعه فمعرفتش ازوق الدنيا وغرفت على طول بقا
اللحمه ممكن تتاكل بالعيش ويتعمل سلطه وطحينه ويتحط شيبسى بيكون حلو اوى
او ممكن تعملى معكرونه وتاكلى بالشيسبى والطحينه
وفى كل الاحول اللحمه اصلا طعمها تحففففففففه وتتاكل حاف من غير حاجه وبالف هنا وشفااااااا
ومتنسوش التقييم بقا دنا اتعذبت فى رفع الصور
مواضيع هذا القسم برعاية
enta.7beby enta.7beby 368044_3.gif فتكات رائعة Fatakat 368044 egypt – United Arab Emirates