السلام عليكم
صباح الخيرعلي احلي فتوكات ……………
النهارده ان شاء الله هاعمل منسف علي الغدا ودي الطريقه ال اكلتها عند صديقتي الاردنيه وكمان اتعلمتها منها لان جوزي بيحبه ما شاء الله….وممكن يكون في منكم كتير عارفينها بس انا قولت اكتبها يمكن بردوا يكون في ناس مش عارفاها………نبدا بسم الله
1-لحمه حسب ما بتعملي
2-ارز مصري او بسمتي
3-لبن – دقيق – عيش
4-كركم
5-بقدونس-لوز للتزيين
الطريقه…
اولا هتعملي اللحمه زي ما بتعمليها في ناس بتشوحها وفي ناس بتغلي الميه وتحطها فيها
زي انتي ما متعوده تعملي هتعمليها وتسبيها علي النار تغلي وبعدين تعملي الرز انا بنقعه قبلها بنص ساعه وبعمل رز عادي بحط شويه زيت مع معلقه سمنه واول ما السمنه تسيح انزل بالرز واشوحه معاهم شويه واكون مجهزه مايه فيها شويه كركم عشان يديه لون اصفر وممكن تحطي مرقه ماجي بتدي للرز طعم جميل اوووي واظبط الملح واسيبه يغلي وبعدين نهدي النار لغايه ما يستوي
اجيب اللوز واحط عليه مايه وعلي النار يا خد غلوه واطفي عليه واصفيه من المايه عشان لما بيقعد فيها بيكون طري شويه وبعدين اقطع عيش مكعبات صغيره واحطه في طبق التقديم وبعد كده اجيب اللبن واحط عليه معلقتين دقيق واضربهم بالخلاط اول ما اللحمه تستوي بحط الملح وتاخد غلوه معاه وبطفي وانشل اللحمه من الشوربه بتاعتها واجيب حله صغيره احط فيها كوبايتين شوربه وعليهم كوبايه اللبن انا بعمل كوبايه العصير الشوب وبتعملي علي حسب الكميه ال انتي عيزاها وبعدين تحطيهم علي النار مع التقليب المستمر عشان اللبن ميقطعش واول ما تغلي حطي فيها اللحمه وتاخد غلوه واطفي وسبيهم علي جنب وتعالي حطي معلقه سمنه في طاسه وحمري اللوز فيها يدوب لونه يصفر شيليه علي طول وحطيه علي ورق نشاف طبعا هيكون الرز استوي وهنقطع شويه بقدونس صغير …………نيجي بقي لتجهيز الطبق هنجيب طبعا الطبق ال فيه العيش ونحط عليه شوربه ال باللبن علي كل العيش وبعدين نفرد عليه الرز ونرش شويه بقدونس ونحط اللحمه في نص الطبق ونرش باقي البقدونس عليها ونرش اللوز بشكل جميل وتقدم مع جرجير وطبق شوربه بيكون طعمها حلو وبالف هنا
علي فكره في حاجه اسمها جميد ساءل او جامد بس انا جربته مره واحده ومعجبنيش باللبن احلي منه
سلام يا احلي فتوكات
عايزه اشوف ردود حلوه زيكم مواضيع هذا القسم برعاية
hams free hams free فتكات حبوبة Fatakat 856104 الشارقه – الامارات العربيه المتحده