مساء الخير يا حبايبى الحلوين
النهاردة عملت قرنبيط مقلى و قلت اقولكم انا بعمله ازاى و بقدمه ازاى برضه
اكيد انتم كلكم تعرفوا تعملوه و احسن منى كمان بس ادخلوا اتسلو معايا شوية كمان البنوتات الجداد فى المطبخ ينورونى
دى بقى الصورة المغرية
لقرنبيطة وسط
1 كوب دقيق / 2 بيضة
1/2 كوب لبن / 4 فص توم مفروم
1/4 كوب كسبرة خضراء مفرومة / 1/4 كوب بقدونس مفروم
ملح / كمون / شطة / فلفل اسود / زيت للقلى
للتقديم : عيش شامى مقطع مثلثات / سلطة طحينة
ممكن تضاعفى المقدار لو حجم القرنبيطة كبير
اول حاجة بنقطع العيش مثلثات و نرش عليها ملح و كمون و نقليهم فى زيت سخن و نطلعهم على ورق كلينكس علشان يشرب الزيت الزيادة
بنخرط القرنبيطة و نسلقها فى ميه و ملح و شوية كمون نص سوا علشان مش تتهرى لاننا لسه حانقليها و نبردها على طول بميه ساقعة علشان مش تكمل سواها لو سبناها سخنة .
بنخلط مقادير التغطية مع بعض كلها و نقلبهم كويس علشان مش يبقى فيهم كلاكيع
تغطس وحدات القرنبيط المسلوق براحة فى الخلطة علشان مش تتكسر و نهزها شوية علشان تنزل الخلطة الزيادة و نحطها فى الزيت السخن
و بعد شوية نوطى النار و نسيبه لحد ما يحمر نقلبه على الناحية التانية لحد مايحمر و نرفعه على ورق كلينكس
بنرص العيش المحمر فى طبق التقديم و نرص فوقه القرنبيط المقلى و فى النص نحط الصوصييرة فيها سلطة الطحينة و نرش شوية طحينة على القرنبيط و بقدونس مفروم
ده بقى طبقى انا مع الفلفل الحامى و الجرجير و الليمون المخلل و البصل الاخضر و سلطة الطحينة
ده كب كيك بنفس وصفتى اللى فى موضوع الرينبو كب كيك بس بالشيكولاتة [ بنشيل 3 معالق دقيق و نحط بدالهم 3 معالق كاكاو ]
و نفس طريقة كريمة الزبدة [ الفروستنج ] بس نصها ابيض و النص التانى مضاف ليه شيكولاتة سايحة بس باردة علشان مش تسيح كريمة الزبدة
ياسلام بقى على كوباية شاى سادة بعد القرنبيط و مع كب كيكاية
بااااااااى باااااااى يا حلوين مواضيع هذا القسم برعاية
شاي ساده شاي ساده 849519_1.gif فتكات ست الكل Fatakat 849519 القاهرة – مصر