حبيباتى اليوم هقدم على سفرتى طبق خفيف و ظريف و خصوصا للأطفال بيحبوه جدا و خصوصا لما بيكون فى برام صغير محندق و معمول فى الفرن بيبقى خطير
انا علمتة امبارح و صورته ليكم و هكرره تانى النهاردة لان الولاد بيحبوه و طلبوه تانى
المقادير
*كمية لسان عصفور حسب احتياجك
*مقدرا من اللحم المفروم المعصج
* مقدرا عصير طمام او الصلصة
*ملعقيتن زبد او سمن فلاحى
*ملح و فلفل اسود مطحون
بصى يا فتوكة كمية لسان العصفور بصى هو الكيس ال 350 جرام اللى زى ده بيعمل 8 برامات صغيرة
انا اخدت نصف الكيس عملت بيه اربع برامات
و اللحمة المعصجة
و طبعا زى ما قلنا معلقتين زبد و ملح وفلفل اسود مطحون
نيجى بقى للطريقة
بمنتهى البساطة
اسلقى لسان العصفور عادى جدا زى اى مكرونة
طبعا لازم تكون المية بتغلى و تحطى فيها ملعقة ملح و ملعقة زيت علشان المكرونة مش تعجن و تكون مفرفرة
بعد ما سلقتيها طبعا هترفيعيها من على النار و تصفيها و تشطفى بماء بارد
و بعدين ملعقتين الزبد تسيحيهم على النار و عليهم ذرة ملح و فلفل و تحطى لسان العصفور يتشوح
يقوم ياخد طعم جميل من الزبدة و الفلفل الاسود
معرفتش اصور لسان العصفور و انا بشوحة فى الزبده معلش ايدى كانت مشغولة
نيجى بقى للبرام
تدهنى البرام خفيف بسمن
نبدأ نوزع كمية لسان العصفور على البرامات
وده شكل البرام
نحط بقى يا قمرات اللحمة المتعصجة و نوزعها على وش البرام
وممكن تحطى اللحمة فى نصف البرام يعنى طبقة عصفور ثم عصاج ثم عصفور
و ممكن طريقة ثالثه تخلطى العصفور و اللحمة مع بعض و تحطيهم فى البرام
و النتيجة واحدة فى كله الطعم الرااااااااائع
وعلى كل برام حطى معلقتين من عصير الطماطم أو الصلصة المذابة فى مقدرا ماء بسيط
ده شكل البرام قبل ما يدخل الفرن
يلا بينا بقى ندخله الفرن
هو مش بياخد وقت خالص لان طبعا كل المكونات مستوية احنا بس هندخلة ياخد لون و يشرب من عصير الطماطم
يعنى حوالى عشر دقايق كفاية اوى
و خلاااااااااااص معلش بقى معرفتش اصوره لما طلع من الفرن انشغلت خالص و كنت بجهز باقى الاكل
هو برام سهل و خفيف و طعمه جميل و الكل بيحبه
يارب اكون افدتكم و كل سنة و انتم طيبيبن
لا تنسونى من صالح دعائكم
مواضيع هذا القسم برعاية
om_yahia om_yahia 151437_8.gif سوبر فتكات Fatakat 151437 (( سيناء )) – -(( أم الدنيا ))