حبايبى الفتوكات وحشتووووووووووووووونى قووووووووووووى
النهاردة هقدملكم اكلة لذيذة وسهلة جدا وكمان موفرة
اتمنى انها تعجبكم وهى طاجن الخضار بالكفتة
المقادير:
ربع كيلو لحمة مفرومة
بصلة مفرومة
معلقتين بقدونس
نصف معلقة فلفل اسود
نصف معلقة كسبرة ناشفة
نصف معلقة بهارات لحمة
طبعا بالمعلقة بتاعة البهارات الصغيرة
ملح
خضار مشكل
توم مفروم
طماطم معصورة
دقيق لتعفير اللحمة
الطريقة:
نخلط مقادير اللحمة المفرومة مع بعض
هتبقى بلشكل دة نشكلها على هيئة كور وبعد كدة نعفرها فى الدقيق
ونحمرها تحمير خفيف فى الزيت وفايدة التحمير ما بيخلهاش تتهرى فى الطاجن بعد كدة
والصور توضح
بعد كدة نشوح الخضار فى نفس الطاسة الى حمرنا فيها الكفتة وزى ما قولتلكم التشويح بيحافظ على شكل الخضار بتاعنا فى الطاجن
بعد كدة نحط الخضار فى الطاجن ونحط علية كوب عصير طماطم والتوم المفروم
ومكعب مرقة خضار ولو عايزة تزودى شوربة او ماء زودى لو ما بتحبيش الحاجة ناشفة
انا حطيت حتة سمنة بلدى صغيرة علشان الطعم يبقى احلى
طبعا حطى فلفل اسود
بعد كدة نحط الكفتة بتاعتنا فى وسط الخضار وتغطيها وتدخليها الفرن
الصورة النهائية طلعت بايظة معلش
هى نفس الشكل بس الخضار مستوى
وريحتة روووووووووووووعة
الطاجن دة يتاكل مع رز بالشعرية
ومعاه طبق بتنجان مقلى
هقولكم على طريقة البتنجان التحفة دة
هنجيب البتنجان ونشيل بس العنق الاخضر
ونقلية وهو مقفول علشان قلب البتنجان يبقى ابيض ما يبقاش محروق
نجى بقى للخلطة فلفل احمر واخضر نصف راس توم
معلقة ملح ولمونتين
اول ما يطرى وتحسى انة استوى طلعية وشقية وهو سخن
واعصرى بسرعة الليمون وبمعلقة صغيرة احشى
البذنجان وباقى الخلطة حطيها على وش البذنجان
واخيرا وليس اخرا بحبكم فى الله
ولا اطلب منكم سوى الدعاء لى ولبناتى بالستر والصحة فى الدنيا والاخرة
مواضيع هذا القسم برعاية
kokoxx91 kokoxx91 448136_3.gif فتكات ست الكل Fatakat 448136 القاهرة – مصر