السلام عليكم ورحمة الله وبركاته
سبحان الله وبحمده عدد خلقه ورضا نفسه ومداد كلمته زنة عرشه————————————————————————————————————————————————
إزيكم يا أحلى فتوكات وأحلى عضوات فى أحلى مدونة
كل سنه وإنتم طيبين وبصحة وسعادة ورمضان كريم
طبعا كلنا بنعمل صينيه الفراخ بالبطاطس
بس أنا حبيت أعملها على الطريقه السريعه اللى مافيهاش تحضير مسبق وكمان بتدى نتيجه حلوة وبتنفع لعزومات رمضان وشكلها حلو عالسفرة ودة طبعا طبق سهل وبسيط جدا
وحبيت أجدد فيه فاستخدمت ورشستر صوص وهو صوص صينى لونه بيكون غامق بيتباع فى السوبر ماركت شبه الصويا صوص بس فيه تمر هندى فى مكوناته بس ممكن الطبق ننفذه بالصويا الصوص الغامق عشان اللون يكون مختلف شويه عن العادى
وأضفت عليه باربكيو هاينز العادى ودة طبعا عشان أغير النكهة المعتادة ويكون فيه نوع من التجديد
المكونات:
– وراك فراخ حسب الرغبه
– راس توم متفصص ومدقوق ناعما
– الملح باحتراس لإن كل الصوصات المستخدمه فيها ملح
– فلفل –زعتر أو شبت أو روز مارى أو بردقوش أو أى نكهة مفضله
– كيلو بطاطس مكعبات
– حزمه بقدونس مفروم ناعما أو كسبرة حسب الرغبه
– مكونات الصوص المستخدم :
– 4 معالق كبيرة ورشستر صوص – معلقتين كبار زبادى – معلقتين كبار باربكيو صوص هاينز- معلقه واحدة صغيرة مستردة وما نزودش المستردة عشان أنا عايزة اللون يكون غامق
–
الطريقه:
– نسخن الفرن كويس نحميه يعنى
– نتبل الفراخ باستخدام معلقتين ورشستر صوص +معلقة مستردة+ فلفل
-بنشوح التوم مع ملعقه سمن كبيرة لحد أما نشم ريحتها
– ننزل بالفراخ والنار عاليه عشان تاخد لون وماتنزلش ميتها
-ودة شكلها بعد ما تشوحت نحطها فى صينيه منفصله
ونحضر الصوص اللى وحنستخدم نصف الكميه منه فقط مع الفراخ وندهنها من كل ناحيه وندخلها الفرن ممكن نغطيها أول 10 دقايق بالفويل وبعدين نشيل الفويل ودة شكلها بعد ما خرجت من الفرن
– وفى نفس الصينيه اللى شوحنا فيها الفراخ ننزل بالبطاطس ونضيف النصف التانى من كميه الصوص المستخدم (وممكن نضيف زعتر أو أى نكهة إحنا حبينها ممكن شبت أو بردقوش أو روز مارى أو نعناع حتى بس نختار حاجة واحدة بس) بس بلاش كل حاجة على بعضها عشان نحس بطعم كل حاجة لوحدها على البطاطس
و نضيف شويه ميه صغيرين بس مش كتير ونغطيها عشان تشرب ميتها
ودة شكلها بعد ما إستوت
أنا المرة دى أضفت زعتر بس المرة الجايه حاضيف شبت
– نضيف البقدونس على البطاطس بس بعد ماتهدى شويه عشان يفضل لونه أخضر جميل
– ودة شكل الطبق النهائى باقلب الصوص الموجود فى الصينيه مع البطاطس بس باحاول أتخلص من السمن الزايد اللى بيكون موجود فى صينيه الفراخ
وكالعادة حازعل كتير جدا من الفتوكة الحلوة اللى تقراالموضوع
وماتكتبليش رد عليه لإن الفتوكة لما بترد بتدى فرصه أكبر لأكبرعدد ممكن من الفتوكات إنهم ياخدوا بالهم من الموضوع ويستفيدوامنه
وكمان حازعل خالصلو ما قيمتوش الموضوع اللى باتمنى إنه يكون
حازإعجابكم
بحبكم كلكم فى الله
وكل سنه وإنتم بخير وصحة وسعادة مواضيع هذا القسم برعاية
ردينى ردينى 107140_3.gif فتكات ست الكل Fatakat 107140 الرماية – مصر