فتوكاتى حبايبى وحشتونى من زمان معملتش حاجه جديده فقولت اجرب فيكوا الصفيحة الشامية بتاع منال العالم
اليومين دول انا عند مامتى حبيبتى ربنا يخليهالى ويقومها بالسلامة عشان عاملة عملية من كام يوم ادعولها دعوة حلوة يا بنات
والحمد لله هيا احسن دلوقتى فاحتفالا بسلامتها قررت ادوقهم حاجه جديدة خصوصا انى لاقيت كل مكوناتها متوفرة عند ماما
يالا نسمى الله ونبدا
بصوا بقى نركز مع بعضينا كده عشان هنعمل مقادير حاجتين ( العجينة والحشو ) مش عايزين ننام من اولها الله يخليكوا
مقادير العجينة : 3 كوب دقيق ( انا بعاير بشوب المية يا بنات )
1 معلقة صغيرة ملح
1معلقة كبيرة سكر
1 معلقة كبيرة خميرة فورية
2 معلقة كبيرة لبن بودرة
ربع كوباية زيت درة
1 معلقة صغيرة بيكنج بودر
ماء دافى للعجين
هنخلط المقادير الجافة الاول ( الملح والسكر والخميرة واللبن والبيكنج بودر والدقيق طبعا ) وبعدين الزيت وبعدين المية بالتدريج لحد العجينة متلم نعجنها كويس تقريبا ربع ساعة وندهن الطبق زيت وهيا كمان ندهنها زيت خفيف ونسيبها تقريبا نص ساعة تريح.
لحد العجينة متريح هنجهز الحشو بتاعنا او اللى هنحطه على وش الصفيحة
الحشو : نص كيلو لحم مفروم نااااعم جدا ( وحطوا تحت ناعم دى مية خط )
2 يصلة وسط مقرومة ناعم
1 طماطم كبيرة مبشورة ناعم
2 قرن فلفل رومى مفرومين ناعم
2 فص توم مفروم
ربع كوب ديس رمان ( لو مفيش انا استخدمت ربع كوباية عصير ليمون )
ربع كوباية زبادى
ربع كوباية طحينة
نص كوباية صنوبر ( مش ضرورى )
1 معلقة صغيرة قرفة
1معلقة صغيرة بهارات لحمة
1معلقة صغيرة ملح
ربع معلقة صغيرة فلفل اسود
هنخلط المقادير كلها ماعدا البصل والطماطم واللحمة
وبعدين هنفرم البصل والطماطم ونضيفهم على باقى التتبيلة
واللحمة بقى انا ضربتها مرة فى الكبة عشان اضمن انها تبقى ناعمة جدا لان ده مهم عشان لو خشنة مع السوا هتلاقيها وقعت من فوق الصفايح
هنخلط اللحمة مع باقى التتبيلة كويس قوى
بعد كده هنقطع العجينة بتاعتنا بايدينا كور صغيرة ونبدا نفرد كل واحده بايدينا على سطح مرشوش دقيق خفيف ومهم بايدنا يا بنات مش بالنشابة عشان مكان ضغط صوابعنا ده اللى هيشيل اللحمة
هنرص الصفايح فى صينية مدهونة زيت ونبدا نوزع خلطة اللحمة على الوش وندخلها فرن سخن على 180-200 وبعدين تحت الشواية دقيقتين واول متطلع هنرشها ببخاخة المكوة رشة مية خفبفة ونغطيها بفوطة نضيفة ونسيبها تهدى
وادى الصفايح وهيا خارجة من الفرن الحرف مقرمش وهيا من جوه طرية وخفيفة خالص
وده شكلها من تحت لزوم الشفافية [/b]
بجد بجد يا بنات ريحتها رووووووعة وطعمها تحفة خصوصا الليمون اللى فى اللحمة مخليها مززة كده وتجنن
تعالو دوقوا بقى مواضيع هذا القسم برعاية
moramady moramady 840614_1.gif فتكات رائعة Fatakat 840614 المدينة المنورة – المملكة العربية السعودية