****** بسم الله الرحمن الرحيم ******
ازيكوا يا فتاكيت
دى طريقتى فى عمل شاورمه لحمه
تتعمل فى اى وقت كعشا او غدا
لو مكسله تعملى وليمه ونفسك فى حاجه لذيذة ….اعمليها
انا مش هكتب كميه
الكميات حسب الرغبه
اول حاجه نجيب بصل وفلفل اخضر
نقطعهم صغنن جدا او نفرهم فالخلاط
ونخليهم مكعبات فى حجم السلطه مش نهريهم
ونقطع شويه بقدونس على جمب مش عليهم
وبعدين نجيب لحمه اسكالوب اللى هى لحمه شرايح
ونحط على اللحمه بتاعتنا بعد ماقطعناها
فلفل وكمون وبهارات وعلبه زبادى و ميه بصل
ونسيبها ساعه على الاقل علشان تتشرب الطعم
(((متحطيش ملح )))
نحط اللحمه عالنار لحد ماتنزل شويه ميهتها ونزودها ميه لحد ماتستوى وكل شويه ندوق
ولو نيه نزودلها تانى شويه مايه لحد ماتستوى تماما
عقبال ماتستوى نجهز سلطه الطحينه اللذيذة
وهى عبارة عن طحينه عليها زبادى عليها كمون عليها حبه ملح صغيرين عليها فص توم عليها
(شويه ميه بسيطه لو لزم الامر)
ونقلبها
ونقلى البصل والفلفل بتوعنا على حبه سمنه وسنه زيت قليله يدوب عالقد فى طاسه تيفال
ونقلب لحد مايدبلوا شويه
نحط اللحمه بعد ماتستوى عليهم ونقلب ونفضل نضيف كل فترة
حبه خل صغيرين هنلاقى لونها اغمق زى الشاورمه بتاعت برة وطعمها بقى تحفه
بس مانكترش الخل قووى يدوب حبه حبه
طيب فرضا اتدلق منك كتير غصب عنك تزودى شويه ميه هتلاقى طعم الخل راح
نيههههاااايييييي
ونحط بقى فالاخر البقدونس بتااعنا ونقلب ونطفى النار
انا سبته للاخر علشان مايتلسعش ويبقى لونه اخضر وباين وطعمه يبان
زى كدة وفالاخر نحط شويه ملح حسب الرغبه
اخيرا نجيب عيش شامى ونحط على طرفه معلقه من الطحينه اللى عملناها ونحط فوقها اللحمه ونبرمها
ونقدمها مع بطاطس وسلطه كوجبه سريعه
واطفالك هيحبوها جدا بدل اكل برة
او نعملها ونحطها فى طبق ونقدمها مع ملوخيه ورز وتتغمس اللحمه بالعيش
او تتحط عالرز ياسلااااام
وبالهنا والشفا
يارب تجربوها وتعجبكم
وياريت لو عجبكم الموضوع تقيموة لانى اول مرة احط وصفه طبخ وتعبت فى تصويرة وتنزيله فعلا
مواضيع هذا القسم برعاية
lolo 2024 lolo 2024 30691_3.gif فتكات ست الكل Fatakat 30691 Cairo – Egypt