على اجمل واحلى فتوكات
فى احلى مدونة
النهارده هقولكم على طريقتى فى عمل شوربة الخضار بالطماطم
دى صورة الطبق
ياللا نبدا بسم الله
المقادير
كوسة مغسولة ومتقطعة مكعبات
بطاطس مغسولة ومتقطعة مكعبات
و بستسهل بصراحة واجيب كيس خضار مشكل مجمد
بيبقى فيه بسله وجزر و فاصوليا وذرة صفراء
وساعات بعملها كلها طازجة
بصلة مبشورة
2 طماطم مبشورة
2 كوب شوربة فراخ او لحمة ( بكون شايلاها فى الفريزر )
وملح وفلفل
الطريقة
1- بشوح البصلة المبشورة فى معلقتين زيت
2- اقلب الخضار مع البصلة
3- اقلب الطماطم المبشورة مع الخضار واسيبها شوية
4- ازود الشوربة واغطى الحلة واخلى النار على درجة متوسطة لحد ما تستوى
وده شكل الطبق
بجد جربوها هاتعجبكم جدا جدا جدا إن شاء الله
وممكن تعملوا معها فرخة محشية ومسلوقة ومتحمرة فى الفرن
وده لينك الفرخة المحشية بالفريك
https://forums.fatakat.com/showthread.php?p=51459156&posted=1#post51459156
وارز بالشعرية
ملحوظة صغنتوتة
ممكن مش تحطوا طماطم مبشورة وتبقى شوربة بيضاء
وممكن بعد ما تستوى تضربوها فى الخلاط
و تزودوا كريمة وتحطوها 5 دقايق على النار تانى ها تبقى روعة
وفيه طريقة تالتة احلى
بزود صلصة واقلل الشوربة شوية
ولما تستوى نصف سوا
احطها فى طاجن وادخلها الفرن
وممكن يبقى معاه اللحمة
وبيبقى احلى طاجن تورلى
اتمنى تكون الطريقة عجبتكم
وتكون طريقة سهلة وسريعة
وما تنسونيش من صالح دعواتكم
لى ولأسرتى بصلاح الدين والدنيا وحسن الخاتمة
واشوفكم على خير إن شاء الله فى وصفة جديدة
استودعكم الله الذى لا تضيع ودائعه ابدا مواضيع هذا القسم برعاية
ام كروان ام كروان 124965_2.gif فتكات ست الكل Fatakat 124965 المطبخ – المنزل