فتكوكاتى الحلوين الطعمين يا رب تكونوا بالف خير ان شاء الله و جمعة مباركة عليكم و علينا
بمناسبة الجو المتقلب دا اللى ولا صيفى و لا شتوى و بالليل تحسوا صوابع رجلينا هتقع من البرد
انا قلت نعمل بقى العدس اللول حبيب الكل نتدفى و نستمتع بيه و هو اسهل ما يكون و مش بياخد
ولا وقت ولا مجهود ولا حتى مكلف و مغذى جدا و بيدى طاقة و كمان كله خضروات يعنى فايدة مضاعفة
و من فوائد العدس عشان نعرف قيمته بردو
1ـ يحتوي على نسبة عالية من البروتين الضروري لبناء الجسم 02ـ يحتوي على فيتامينات عديدة وخاصّة فيتامين(ب) المرّكب 03ـ غنّي بالمعادن مثل الحديد , الفسفور , والكالسيوم 04ـ يلعب دورا هاما في تقوية الجهاز العصبي 05ـ يساعد في تقوية العظام والأسنان 06ـ يساعد في تقوية الدّم 07ـ قشور العدس تفيد في مكافحة الإمساك 08ـ يفيد في زيادة وزن الأطفال ويساعد على الوقاية من تنخّر الأسنان
نيجى بقى لشوربتنا اللذيذة و المقادير كالتالى:-
نص كيلو عدس اصفر متنقى
بصلة كبيرة متقطعة جوانح
2 طماطم متقطعة
2 جزرة متوسطة و متقطعة صغير
زبدة و دا اختيارى
5 فصوص توم و يا سلام لو تغسليه بقشره و يتحط كده عشان ما يتهريش بسرعة و تفضل الفايدة فيه
نيجى بقى للطريقة السهلة ان شاء الله
هنغسل كل دول طبعا كل على حدا و نغسل العدس كويس اوى و نغير الميه لحد ما يبقى لونها تقريبا
شفاف احنا بنحاول ننزل النشا اللى فيه و كمان عشان ما يعملش ريمة جامدة على الوش و نحط العدس
و الخضار و معاهم ميه تغطيهم فى حلة على النار و اول ما يبتدى يغلى نهدى النار عليه و نغطيه و طبعا
ما تنسوش كل شوية تقلبوا عشان القعر ما يلسعش مننا و يبقى طعمه مغير شوية صور بقى و نكمل
ما تنسوش كل شوية تشيلى الريمة ولو المية نشفت تزودى ميه سخنة عليه حبة حبة و بعد حوالى
ساعة تقريبا هتبصى تلاقى العدس استوى و اتهرس خالص فى الحلة و كمان الخضار اللى معاه زى
الصورة كده
انا بسيبه يهدى شوية و بعدين بضربه فى الخلاط و اصفيه بمصفى واسعة عشان ينزل كله و معاه فتافيت
الجزر احنا بنصفيه عشان قشر الطماطم غلط على المعدة لانه بيلزج فى الجدار و كمان يبقى شكل
الشوربة بيوريه مفيهاش قطعن انا نسيت اصور المرحلة دى معلش بقى
المهم تكملة التسوية دى راجعة لزوق كل واحدة فينا يعنى فيه ناس تحب تحمر شعيرية و بعدين تزودها
عدس لحد ما العيرية تستوى و فيه ناس بتحب تعمله فتة و دى جبارة انك تحمرى العيش او تحمصيه و
تبقى غالية العدس و محدقاه و تحمرى تومة فى زبدة كويس و لما تصفر تحطى خل و تطفى و تسقى
العيش شوربة العدس و تحطى طشة التوم على الوش و الريحة تملى الشقة بقى اعذرونى انا
ملحقتش اعمل كل دا عشان اوريكم النتيجة النهائية انا بس عملت شوربة سادة متزوقة ببصل محمر
عشان جوزى بيحبها كده و انا بحبها بالزبدة كل دا رغى فوق نرجع تانى للشوربة بقى
بعد ما تتصفى بحطا تانى على النار تاخد غلوة و بزود الملح و الفلفل الابيض المطحون او اسود و شطة
عشان الدفا بقى و ممكن بابريكا او جوز الطيب و جنزبيل كل واحدة و زوقها بس هى مش بتحتاج توابل لان
الخضار مديها طعم حلو و نقلب لحد ما تغلى اكون قطعت بصلة صغير و حطيت عليها ملعقة دقيق و دا
عشان يشرب المية اللى فيها و تاخد لون حلو لما تتحمر و اسخن المادة الدهنية اللى هحمر فيها البصلة
و احط البصلة و اهدى النار شوية لحد ما تتحمر و احطها على وش الشوربة و دا طبق الاستاذ
انا بقى طبقى حبيبى انى بعد ما املح الشوربة و اغليها احطه فى الطبق و فوقيه ملعقة زبدة صغيرة اوى اوى و اسيبها تسيح و دا زيادة فى الدفا طبعا مش طفاسة ولا حاجة و كمان بيبقى طعمها تحفة
و دى بقى صورة مجمعة للطبقين اتفضلوا معانا بقى
يا رب تكون عجبتكم سهلة اهو و بسيطة خالص و معلش بجد مالحقتش اصور الطريقتين التانيين جوزى جه
و انتو عارفين الرجالة و فتكات بقى خصوصا لما بصور
اذا عجبكم الموضوع قيميه يا فتوكة و ادعيلى ان ربنا يهدى زوجى و بنتى و يبعد عنا كل شر و نفس سيئة
و لكم بالمثل ان شاء الله
مواضيع هذا القسم برعاية
maya.shahin maya.shahin 327310_10.gif سوبر فتكات Fatakat 327310 cairo – egypt