اهلا وسهلا بكم رواد قسم المطبخ الرائع كل الفتوكات المبدعين
اسمحوا لضيفه من قسم تاني تقولكم علي وصفه صغنونه
احسن بقيت متاكده ان كل قسم عايش مع نفسه علي والمواضيع مش بتلاقي رواج زي ما بعملها ف قسم الاعمال اليدوية ههههه(عايزه اغير فكرتي النفسوية)
جربت ف الديكور والتجميل وكام حاجه كمان بس اول مره اجرب معاكم انا وحظي
نخش ف المفيد علي طول
انهرده هقولكم علي الريزو بطريقتي طبعا كتير عملوه واكيد تحفه بس دي اكتر طريقه عملتها وظبطت
اول حاجه هنجيب سكر ونضيف عليه ملعقتين ميه ونسيبه يغلي علي النار لحد ما يبقي كراميل
بعد كده هنجيب بصله نحمرها (انا كان عندي بصل محمر خدت معلقه لكل كوبايه رز)
ومعاها ملح وفلفل وماجي وطبعا الميه كوب لكل كوب رز
وبعد كده هنزل علي الكراميل بالبصله والفلفل والملح والماجي والميا عشان الكراميل يفك تاني
لما يغلي الخليط ننزل عليه بالرز المغسول ونسيب الغطا مكشوف لحد ما يتشرب
وده بعد ماتشرب طبعا لونه بقي كراميل وتسيبيه علي راحته تغطيه وعلي الرداده وانسيه (تقليبه واحده بعد ربع ساعه)
جبت فراخ بانيه سبايسي او عادي وبعدين اقطعها مكعبات قبل ما اقليها عشان يكون كل قطعه شبه البوب كورن دجاج
تمام هنا قليتها وحطيتها علي مناديل مطبخ
الرز بتاعي الخطير لما استوي غرفت طبق وعليه صوص باربيكيو وبعدين قطع الفراخ واللي يحب يحط كاتشب علي الوش او هوت صوص حسب الرغبه
بس بجد طعمه روعه وكمان مسكر سنه زي الكنتاكي تمام
نخش علي السلطه بتاعتنا انهرده وممكن كتير عارفينها بس نقولها للي مش عارفينها
التبوله الشاميه
المقادير برغل حوالي نص كوب-طماطم جامده نشيل القلب بتاعها -بصل اخضر الجزءالعلوي الابيض فقط-بقدونس كتيررررررررر
نعناع فريش او بودر-زيت زيتون -ليمون-ملح
هنا انا نقعت البرغل تلت ساعه وصفيته وكمان قطعت الخضروات صغير كتير
نصفي البرغل جدا باليد عشان بيكون مليان ماء ونضيفه علي السلطه بتاعتنا ونقلب جيدا
نضيف النعناع (الملح وزيت الزيتون والليمون يضاف ساعه التقديم فقط)
ودوقي احلي تبوله وبتشبع جامد وطبعا الخضره مفيده للهضم والريجيم
وطبعا ده اهداء مني لكل اللي نوروني وشجعوا ونفسهم اتفتحت لدرجه نفسهم في طبق
احلي ريزو وتبولة مني ليكم
لاتنسوني من ردودكم وتقييماتكم الحلوة
لو في تشجيع هعمل صنفين سهلين كمان
مواضيع هذا القسم برعاية
توتا الفتوكة توتا الفتوكة images/avatars/pattern.gif سوبر فتكات Fatakat 215282 دمياط – مصر