السلام عليكم ورحمة الله وبركاته
انا رجعتلكم تاني في ثوبي الجديد انا كنت عاملة الموضوع ده في من سنة وفعلا خسينا لكن انتو عارفين بقي الشيطان وعمايله والحلو ما يكملش اتفرقنا واللي خس رجع تاني
المهم انا رجعت وعايزة مجموعة حلوة كدة ولطيفة واتاكدوا ان اللي هتدخل معايا هتخس ان شاء الله بالذوق بقي بالعافية هتخس اصل احنا مش بنلعب وانا لازم اخس في شهرين عشان فرحي فلازم نشجع بعض كدة والصحبة الحلوة مفيش احلي منها
بس يا حلوين اللي هتشترك معايا لازم تسمع الكلام وانا ديكتاتورة وشريرة
اهيعني اللي هتنوي تعرف انها كدة لازم تسلملي نفسها كدة زي الشاطرة المهم وتعرف انها لو التزمت معايا هتخرج في ظرف شهرين كدة بنيولوك جامد قوي مش بس بالخسسان
انا مش هقعد اقول احنا اكلنا كتير واهملنا كتير وشكلنا في اللبس بقي وحش واننا صحتنا اتاخرت واللي جالها خشونة في الركبة واللي بعد الشر تكيس في المبايض واللي واللي لان احنا عارفين الكلام ده كويس
فياريت بقي والكلام ليه قبلكم نخلي عندنا دم ونرحم نفسنا شوية ونفكر مرة واحدة صح
الواحد ساب نفسه لحد ما لظلظ وكلبظ وبقي شبه البالونة
متهيالي كلامي صح
علي فكرة حتي لو محدش شجعني هبدا لوحدي بس ايد لوحدها متسافش
المهم عشان عايزة اروح استحمي اصل حاطة ماسك وحاسة اني وشي خشب وهيتقطع فمش هطول عليكم
اخر معلومة احب اعرفكم ان في نظام اكل بس خفيف وحلو لاني ضعيفة جدا قدام الاكل وفي رياضة وفي مشاريب كمان
ايه النظام هقول بس لما تيجو لان اللي عايزة تشترك هتدخل عشان تخس ومش ليكو دعوة بالباقي لان الباقي علي الله وعلي اختكم اللي هتوريكم الويل وسواد الليل
المهم بجد عايزين نعمل صحبة قبل كل شيء ونكون اخوات حلوين ونطمن علي بعض وصدقوني مش هتندموا ان شاء الله
يلا هستناكو يا حلوين واه الجديد بقي ان علم النفس هيدخل في الموضوع ومتسالوش ازاي وليه بس هو كدة اصل انا دراستي علم نفس ولازم ادخله في كل حاجة
اوك
هستناكو
البيانات المطلوبة للاشتراك
الاسم
السن
الحالة
الطول
الوزن
اعايزة تخسي ليه
عملتي رجيم قبل كدة وخسيتي عليه ولا دي اول مرة
و7 طوابع بريد
هههههههههههههههههههههههههههههههههههههههههههههههههه هههههههههه
يا بنت انت وهي ياللي ضيعتوا في الاكل سنين
شفتوا وصلنا من كتر حبنا للاكل الكتير لحد فين
طبعا الصحة قليلة وفي الشكل طبعا مش عاجبين
الرشيقة تلبس اي حاجة واحنا للاسف مش قادرين
اصل احنا ضعاف وفي الارادة والعزيمة معدومين
سبنا الفاكهة الحلوة والاكل المغذي ورحنا للاكل السمين
شيبسي ماشي كوكا يلا وبنخسر صحتنا ومش فاهمين
متهيالي ان الاوان نصحح الوضاع ونبقي كويسين
هنتعب يمكن شوية بس مش مهم عشان نكون حلوين
يلا ايدينا في ايد بعض ونشجع بعض يا فتوكات يا طعمين
اختكم المكلبظة سمسمة
احلي سمسمة احلي سمسمة 144551_5.gif سوبر فتكات Fatakat 144551 مدينة الناس الطيبين – مصر