السلام عليكم ورحمة الله وبركاته
اخباركم يا حلوات
وكل سنة وانتم طيبين
اولا هعرفكم علية للى ما يعرفنيش .. انا متجوزة من 7 سنين
اول ما اتجوزت ربنا رزقنى ببنتى علطول الحمد لله من غير مشاكل .. وبعدين استعمل وسائل لمنع الحمل لمدة 3 سنين
ولما بطلتها علشان اجيب طفل تانى .. فضلت سنة اكشف واروح للدكترة ووعملت أشعه بالصبغه فى الاخر وربنا رزقنى بولد
الحمد لله.. هو قارفنى من يوم ما اتولد بسبب حساسية الصدر ومناعته الضعيفة .. ربنا يبارك فيه ويخليه
وبعد ما ولدت ابنى ب 9 شهور ربنا رزقنى بحمل تانى
الحقيقة كانت صدمة لية ولجوزى بالزات .. لان ابنى كان صغير وتعبان علطول وجوزى كان حمد ربنا على كده
ومرت الست شهور الاولى من الحمل بين قلق وتوتر وعياط وكأبة .. جوزى مكنش معايا وابنى علطول تعبان بسبب حساسية الصدر وانا للعيال ام واب فى نفس الوقت
وفى الفترة دى ظهر فى جسمى كدمات زرقة وكانت كتيرة
سالت الدكتور بتاعى قالى ده ضعف فى الشعيررات ومفيش مشكلة .. وبعدها حللت صورة دم وطلعت الصفائح 150
الصفايح الدموية دى جزء من الدم بسيط وشفاف بس مهم جدا لانها بتمنع النزيف بتعمل تجلط فى الجرح وتوقف النزيف
والطبيعى بتاع الصفائح من 400:150 الف
ومن اليوم ده بدأت رحلة نقص الصفائح فضلت تقل على مدار التلت شهور الاخيرة للحمل لحد ما وصلت 23 الف قبل الولادة بيوم
واتحجزت فى القصر العينى الفرنساوى ونقلت صفائح كتير لحد ما وصلت ل 150 الف وولدت والحمد لله عدت على خير ويوميها الدكتور نقلى صفائح تانى بس ما عليتش برده خاااالص
وفى المستشفى كانو عايزين يحجزونى ويخدو عينة من النخاع لكن انا خفت وكنت عايزة اروح علشان العيال
وبعد الولادة بيوم حللت ولقيتها 30 وتابعت مع دكتور باطنة وامراض دم
عملت تحاليل كتير واشعه والحمد لله طلعت الكبد والطحال كويسين وطلع المناعه موجبة بس النسبة احسن من الحمل (بس انا اصلا مش فاهمهحاجة فى موضوع المناعه ده خالص )
واستعملت كورتيزون وقتها وبقالى شهرين على كده لما اخدت الكورتيزن فى خلال شهر زادت من 30 الى 60 ولما وقفته نزلت تانى من 60 ل 20 حاليا
طبعا ما تتخيلوشالكورتيزون عمل فيه ايه.. اثر على جهازى العصبى لدرجة انى مكنتش بقدر اشيل كوباية ماية من الارض
وانا ام لطفلين يعتبرو توأم وطفلة فى مدرسة ونفخنى وأثر على اجهزة جسمى كلها ومكنتش بنام وعلطول متنرفزة وعصبية
انا فى دوامة بقالى 5 شهور ومش عارفه هترسي على ايه .. جسمى مليان كدمات زرقة ونقط شكل القرص ونزف احيانا من الانف والفم
روحت لدكتور (علاء حداد) امراض دم واورام وطلب منى تحاليل للغدة ولجرثومة المعدة والمناعه وادينى مستنية النتائج
انا طول عمرى صحتى الحمد لله كويسة وعمرى ما اشتكيت من مشكلة فى المناعه او اى حاجة تانية
لكن انا ولدت مرتين قيصرى وعملت زايدة وكشفت نسا كتير وخايفة يكون اتنقلى عدو لا قدر الله
وخصوصا انى حملت مرتين قبل كده ودى التالتة واول مرة يحصلى كل ده
اللهم لا اعتراض .. انا وجوزى طول الوقت مكتئبين ومحبطين وخصوصا انه مسافر وقلقان علينا علطول
ده غير ماما واخواتى
انا كان نفسي اكتب الموضوع ده وانا حالتى احسن من كده علشان يكون موضوع متكامل لاى واحدة مرت بالتجربة دى
وخصوصا انى لما دورت على الموضوع ده مالقتش ناس كتير عندها فكرة
ادعووووووووووووووووووووووووووووولى
ولو اى واحدة عندها فكرة عن حالتى تحكيلى
سلام ومستنية ردودكم
سحورة الحبوبة سحورة الحبوبة 187489_5.gif فتكات رائعة Fatakat 187489 مملكتى الخاصة مع بنتى وجوزى حبيبى – الكويت