السلام عليكم
انا صاحبه الموضوع ده https://fatakat.univanet.com/#3137395
و كتير منكم طمنونى و ساعدونى و دعولى لكن
القدر و مشىئه الله قبل كل شئ
انا كنت قولتلكم انى بقالى شهر فى دوخه و تحاليل و دكاتره كتير و الله ذراعى بقى عامل زى المدمنين
الحمد لله على كل حال
المهم روحت يوم الخميس عشان اعمل العمليه ملقيتش الدكتور نسأل يقولوا تعب و دخل العنايه المركزه يالهوى من اولها
انا انهرت طبعا و رجعت مش شايفه من العياط جوزى قال نروح لدكتور تانى
روحت قالى اعملى تحليل تانى ياربى عملت و طلعت نسبه عاليه برضه المهم رجعتله كتبلى ورقه و تقرير انه لازم ينزل و حددلى 4 مستشفيات اروحلهم
تانى يوم من 7 الصبح انا و جوزى فى الشارع بنلف على المستشفيات روحنا واحده واحده محدش راضى يقلولولى حرام ده لسه عايش منقدرش ننزله ياجماعه المفروض و كلام الدكتور يقولولى انت صح و احنا لازم ننزله بس ده قانون سبحان الله القانون لسه مطبق من شهر 5
و دكتور يقولى روحى الحته الفلانيه و هما حيعملوا اللزم نروح و مافيش فايده و من هنا لهنا 3 ايام كنا بنخرج من 7 الصبح لحد 8 بالليل لف و دوران و مافيش فايده لحد اخر مستشفى روحنالها دكتوره مافيش فى قلبها رحمه و لا حاسه بيا تقولى انت اللى غلطانه نزليه زى مالستات بتنزل لوحدها اقولها معرفش و كبير انا دهلت الشهر الرابع تقولى ماهو ولاد الحرام بتنزل عادى بس ده ابن حلال باين جوزى كان حيديها على وشها و فى الاخر تقولى لو ربنا بيحبك يموت فى بطنك و تخلصى انا انهرت زياده و كنت حاسه ان قلبى حيوقف
بعدها جوزى خدنى عند دكتوره بنت حلال ربنا يكرمها طيبه و عاقله و هاديه اتكلمت معايا بالراحه و هدتنى و قالتلى فعلا فيه حالات مبتستناش بس احنا لسه فيه وقت و هو اصلا كده كده كبر خلاص يعنى ممكن تستنى اسبوعين كمان خدت عينه من الدم و حتعمل تحليل محدش من الكلاب اللى مرمطونى طلبه قبل كده و حاتبعته فرنسا وده بيبن تاريخ الاصابه بالظبط ممكن يطلع قبل الحمل و تبقى دى مناعه و ممكن يطلع فعلا اصابه و ده اللى لازم ننزله ساعتها و قالتلى الحكايه سهله حنديكى محلول فيه دوا ينزل البيبى و بعد كده حنعمل تنضيف و تروحى بعدها بساعه و متقلقيش بس النتيجه حتطلع بعد 15 يوم و قالتلى انسى الموضوع لحد مالتحاليل تطلع يمكن تكون قديمه و ربنا يكرمك و تكملى حملك على خير وربنا يسهل
شوفتوا بقى قضاء ربنا و رحمته و ماتشاؤن الا ان يشاء الله رب العالمين و كل شئ مقدر و على الانسان انه يسعى و نصيبه حيصيبه و كل قضاء ربنا خير و رحمه
nousa86 nousa86 images/flowersavatars/avatar0026.jpg فتكات رائعة Fatakat 83760 وحشتنى مصر – اعيش فالجزائر حاليا
سبحان الله و بحمده