بصو يا بنوتات
الموضوع دا لكل بنوته لسه بتتجهز سواء اتخطبت او لسه
بصو هقول باختصار
ساعة لما اتخطبت
كانت ظروف اهلى على أد حالهم اوى اللى رايح على أد اللى جاى
أخدت على نفسى عهد انى مش هرهقهم ابدا ف جهازى على أد م اقدر
على الرغم انى اتجوزت ف الفلاحين
وانتو عارفين يعنى ايه
موال جهاز عرايس الفلاحين كام ملاية وكام بطانية و3 غسالات و….و ,,,, و,,,
ماشى
هحكيلكم امثلة يا بنات
لا رحت اشتريت ماركة ولا وبتاع هو التوحيد والنور حبيبى
لما جيت اشترى وانا بتفرج على الالحفة والله نقيت واحد بس وكان ارخص حاجة كان باقل من 130 او 120 كمان مش فاكرة
وماما تقولى يا بنتى مش هيعيش وانا واقولها بس نقشته حلوة اوى وعاجبنى شكلة
ومشترتش غيره
ولما جينا نشترى البطانية اشتريت وحدة بس مش المجوز كمان(عشان مكلفهاش)
وماما تقولى مش هينفع ومش هتبقو دفيانين
اصلى اتجوزت ف الشتا
قلتلها اصل بصراحة الوان البطاطين هنا مش حلوة هبقى اجيب وحدة تانية بس من فرع تانى وكانت نيتى انى مش هجيب حاجة بس عشان ارضيها
والله يا بنات جالى لحاف هدية وبطانية هديه وبطانية ولحاف ف بعض وش ووش !!!!!!
جبت كوفرته وحدة بس
التانية جاتلى هدية !!!!
4 ملايات و4 جولى هديه!!!
دفايات السرير مش فاكرة بس تقريبا جالى بردو ييجى 4 وانا بردو كنت جايبة 4 تقريبا مش فاكرة
مشترتش غير قمصان النوم وروب وجلاليب للبيت عشان انا بيت عيلة وازدالين للصلاة
والله البراهات والاندرات جم لى هدية للأمانة كنت اشتريت بس برا واندر الفرح وطقم كمان كان اندر وبرا كان طالع من عينى .. وجالى كمان العباية السورى بتاعة الصباحية هدية وف الاخر متلبستش …
ومشترتش عبايات خروج .. كنت قبل م اتجوز لمااجيب حاجة جديدة او تجيلى هدية كنت بوفرها ومرضاش البسها غير ف المناسبات اقول عشان اوفر على اهلى لما اجى اتجوز
وكذلك الخمارات
باقى لبسى اللى ف البيت البلوفرات والبناطيل وكدا اخدت اغلبها من اللى صغرو على اخواتى وشكلها نضيف اه والله بجد زي بقول كدا
كانت بردو نيتى انى اوفر على اهلى
وبالنسبة للمطبخ كنت جايبة 4 حلل استانلس و2 المونيوم وطقم معالق اللى هو العلبه دي (بالمناسبة العلبه دي كنت جبتها ايااااااااام م خلصت الثانوية العامة جبتها بالنقطة اللى جاتلى اختى اللى اقترحت علي ربنا يكرمها) اى نعم زعلت بعدها قلت ياريتنى كنت فرقعتها بس نفعت
والله جالى طقم حلل المونيوم هدية و3 اطقم تلاجة هدية
انا جبت جايبة طقم تلاجة واحد وطقم توزيع خشب واستانلس
جبت ارخص طقم صينى بحجة ان الله دا نقشته تحفو وحلوة اوى مع ان كان طالع من عينى حاجات تانية كانت تحفة طبعا
جالى طقم اركوبال هديه !!!!
يا بنات سبحان الله يمكن عشان كانت نيتى كدا ربنا بعتلى حاجات كتيرررررررررر اوى اظن مفيش حد زيي جاله حاجات كتير كدا ؟؟ مش كدا بردو ؟
ومش عشان انا احس انى جايبة حااجات جديدة وعروسة ومعرفش ايه اضغط على اهلى واحملهم اكتر من طاقتهم
وربنا رضانى بعتلى حاجات من حيث لا احتسب والله
يعنى ف الاخر يا بنات اوعو تكلفو اهاليكم حاجة
حاولو بقدر الامكان يا ما بنشوف ناس بتستلف وتخش جمعيات ويفضوا شايلين هم ديون وف الاخر مش بيكون فى بركة ف الجوازة
وافتكرو الحديث اللى ما معناه أقلكن مهورا أكثركن بركة
ومفيش احلى من البركة ف البيت
هتعملى ايه ببيت مليان عفش وزحمة ومفهوش بركة ربنا ولا فيه سعادة
همسة يا بنوتة اوعى ترهقى اهلك بالمصاريف عشان ربنا يباركلك فى حياتك
اه وحاجة كان يا بنات بالنسبة لتشطيب البيت مهما كان فظيع واوفر ومعمول احلى حاجة فيه هو انتى اخرك شهر وف الاخر عينك بتتعود عليه
كل اللى بتكسبيه ان اللى بيجيلك ممكن يرجع بيته متضايق عشان نفسه يبقى بيته زيك
او ممكن يطسك عين
وبسسسسسسسس دا اللى بتكسبيه
الحاجة كلها شهر وبيتعود عليها سواء كانت واو او متواضعة
لو عجبكم الموضوع مش هقولكم قيمو …
هقولكم بالله عليكم ادعو باللى ف توقيعى …
عابدة الودود عابدة الودود 767120_3.gif فتكات رائعة Fatakat 767120 مصر – مصر