السلام عليكم
ازيكم ياحوامل يارب تكونوا كلكوا بخير ويرزق كل مشتاقه بالذريه الصالحه عاجلا غير اجلا يارب
انا حبيت اكتبلكوا التجربه دي عشان كل واحده حامل تاخد بالها من حملها وتدوس على اي حاجه ممكن تزعلها او تضايقها
وترميها ورا ضهرها
انا عارفه وقريت كتير هنا في المدونة عن حوامل اللي تعبانه نفسيا بسبب مشكله مع جوزها او حماتها او قرايبها
واللي بتتعصب وبتتنرفز وعلى اخر اليوم بليل تحس بمغص رهييييب او اللي تلاقي كم نقطة دم نزلوا وحاجات تانيه كتير
وطبعا ده كله نتيجة الزعل من ناس مش هتنفعنا لو لاقدر الله جرالنا احنا او البيبيهات اي حاجه
بل بالعكس ممكن جدا يشمتوا
انا اختى كانت متجوزه وحملت علطول من تالت شهر تقريبا بس جوزها ده كان فيه كل العبر الوحشه
ومكتشفناش كده الا بعد الجواز للاسف
المهم هو كان منكد عليها عيشتها ليل ونهار خناق وكان بتاع امه جدا
ولما عرفت انها حامل قولنا يمكن يغير معاملته او طباعه تتغير شويه
لكن كأن شيئاً لم يكن زي ماهو في كل حاجه نفس اسلوبه ونكده وقرفه هو واهله
واختي هاديه ورقيقه ومالهاش في المشاكل بس هو كان مستفز جدا وبيعرف يستفزها ازاي فكان بيخليها تزعق وتتعصب وتتنرفز
ليل ونهار على كده وطبعا بليل بتنام معيطه ومقهوره
المهم اما ماما لقت حالتها كده صممت انها تيجي تغير جو عندنا وهو ماكنش بيرضى خالص جت كم يوم بالعافيه غير ت فيهم جو
ورجعت تاني للهم والغم والنكد والمشاكل
مش عايزه اطول عليكوا
المهم كانت في الشهر السابع لقينا جوزها بيتصل بينا وبيقولنا ان اختي تعبانه اووي وانهم في الطريق للمستشفى
روحنالها والدكتور كشف عليها وقال ولاده!!!!
تخيلوا جالها طلق مبكر من الزعل والعصبيه والنرفزه وجهزوا بسرعه اوضة العمليات ودخلت عشان تولد
هى كانت حامل في بنوته وولدت طبيعي بس البنت نزلت تعبانه جدا والرئه مش مكتمله ونازله ياحبيبتي جسمها كله ازرق زي الكبده من المشاكل والقرف وحطوها في الحضانه حوالي 3 ايام
كانت بتتنفس عن طريق خرطوم وحالتها كانت صعبه اوي والدكاتره كلهم قالوا ان ده كله بسبب الحاله النفسيه للام
وبعد كده ماتت ياقلبي كانت زي الملاك وهما رايحين يدفنوها (الحمد لله على كل حال)
وبعديها بفتره اختي اتطلقت من جوزها ده ودلوقتي ربنا عوضها واتجوزت واحد احسن منه 100 مره
انا كتبتلكوا القصه دي يابنات لما لقيت موضوع الزعل والنرفزه والعصبيه زاد اوي بين الحوامل
ولقيت كذا واحده بتسأل انا امبارح اتعصبت واتنرفزت لاني كنت متخانقه مع جوزي وبليل حسيت بمغص ياترى ممكن يكون حصل حاجه؟؟
واللي تقول كنت زعلانه مع اخويا واتعصبت وصوتي علي وعيطت ياترى يحصل حاجه؟؟
واللي تقول في مشاكل بيني وبين اهل جوزي وكنت بتخانق معاهم وضميري انبني بليل ليكون حصل حاجه للبيبي
عايزه اقول لكل واحده فيكوا محدش هينفعك اه والله بجد
انتي والبيبي اللي هو المفروض اغلى حاجه عندك اللي هتتضروا
واللي كنتي بتتخانقي وبتتعصبي وبتتنرفزي بسببهم لو لاقدر الله حصلك حاجه هيزعلوا يوم ،يومين، اسبوع
وهينسوا بعد كده
ولو كانوا بيكرهوكي يبقى الطبيعي انهم هيفرحوا فيكي وهيقولوا يلا الف بركه
عرفتي بقى ان محدش بينفع حد وان محدش هينفعك غير نفسك؟
دوسي على كل حاجه تضايقك وتزعلك وطنشي وكبري دماغك ع الاخر وخلييييييكي بارده على قد ماتقدري
على الاقل في فترة حملك بس
ده ربنا رزقنا بنعمه غاليه اوووي يبقى اقل واجب اننا نشكره ونحافظ عليها مش نضيعها بنفسنا
وعايزه من هنا ورايح كل واحده حامل تمشي بمبدأ ( طنش تعش تنتعش )
اتفقنا ياحوامل ؟؟ وربنا يقومنا بالسلامه ويرزقنا باطفال سليمه معافاه
ويارب يرزق كل مشتاقه بالذريه الصالحه
ومتنسوش بقى ياحبايبي تدعوا لاختي ان ربنا يعوض عليها ويرزقها بالذريه الصالحه
واوعـــوا تنســـوا التقييــــم يافتوكــات
Mamet Omar Mamet Omar 457709_139.gif فتكات رائعة Fatakat 457709 القاهره – مصر