السلام عليكم ورحمة الله وبركاته
ازيكم يا أمهات انا كتبت الموضوع ده لأنى وقعت فى أخطاء كتير لما كنت بجهز شنطة بنتى الكبيره مريم لما كنت حامل فيها واد ايه حاجات مهمه جدا ماهتمتش بيها خالص وحاجات تانيه مش مهمه اهتميت بيها اوى وده لأنى مالقيتش حد ينصحنى ويقولى أعمل ايه فصرفت مبلغ كبير وجبت حاجات مش مهمه برغم طبعا احنا عارفين مصروفات الولاده والعقيقه والسبوع اد ايه فانك تصرفى مبلغ كبير علشان هدوم النونو حاجه بايخه اوى بصراحه
المهم ما طولش عليكم
فيه شوية حاجات مفروض انها من مستلزمات لبس النونو انا شايفه ان مالهاش اى لازمه انها تيجى بصراحه وشوية هدوم معموله مخصوص علشان تخنقه وتزهقه وتقرفه فى عشته وانا معرفش اخترعوها ليه برده وبيبقى اهم حاجه عندنا اننا نزوق العروسه اللى خلفناها ونخليها ميرى بصرف النظر الهدوم دى بتضايقه ولا لأ
زى مثلا البفته اللى اللهى ماعرف ايه لازمتها نلبسها لنونو يوم واحد وزى الستات اللى بتلبس ولادها لكلوك مع انه مش بيمشى برده مش فاهمه وكمان الطاقيه اللى والله ماعرف ليه اخترعوها
ومن هنا قررت أقولكم اشتريت ايه بالظبط
فيه حاجات لازم تراعيها لما تيجى تعملى الشنطه
1انك لو هتشترى لوازم شنطه صيفى هتختلف تماما عن الشنطه الشتوى
2\ هدوم البيبى كلها قطن ميه فى الميه بدرجه عاليه جدا من النعومه درجه لو حطتيها على خدك تنامى
لان جلده حساس ماينفعش هدوم فيها بوليستر
3\ الهدوم تكون واسعه شويه ولو اشتريتى حاجه ضيقه معلش ارميها اوعى تلبسى البيبى ضيق فى أطفال بيتولدوا ما شاء الله وزنهم محترم وأطفال تانين لأ علشان كده خليكى فى المضمون كمان لأن حقيقى الهدوم الضيقه بتزهق البيبى اوى وتخليه يعيط بدون سبب ويتألم
نبدأ بقى التجهيزات
انا هولد كمان 21 يوم بأذن الله هولد فى الصيف وهنفضل فى الصيف فتره كمان علشان كده جهزتها صيفى واستعنت بشوية صور علشان أوضحلكم
1\ أول وأهم شئ الفانلات
انا جيبت 6 بنص كم جنيورز ودى ماركه محترمه اوى فى هدوم البيبيها قطن 100% وناعمه جدا ولطيفه على بشرة البيبى ومريحه وتنفع كل الاوزان هاتى منها نمره
وكمان 6 فانلات كت زى بتاعة بباهم كده قطونيل يعنى
قطن برده 100%
والبامبرز طبعا بامبرز الاصلى نمره 1 علشان ناعم ولطيف
ومابفضل اننا نشترى بنطلونات لوحدها وجلبيات لوحدها عن تجربه واللهى أريح حاجه لنونو طقم النونه العادى جلابيه وبنطلون شكل بعض كده بالظبط
انا جبت منهم 5
وكبت 3 بناطيل وطبعا قطن ميه فى الميه جونيورز برده زى التيشيرتات
وطقمين سلوبيت للسبوع وواحد للنوم عادى
وكمان حاجه مهمه اوى ماتغفليش عنها وهو حزام البطن لنونه وده بقى مهم أوى يحافظ على طفلك وماتخليهوش يتمزق او بلغة الفلاحين يعنى ما يتلوحش لأن عضمه طرى واى شيل غلط ممكن يخلى جسمه يتلوح وده هيتعبه وهيفضل يعيط بدون سبب ومش هايعرف ينام مرتاح لكن حزام البطن بيخليه يصلب طوله وتقدرى تشيليه بسهوله من غير ما تضريه
والكوفرته الصيفى بقى ودى علشان نشيله فيها ونخليه برده ماسك نفسه كده انا بجيب واحده بيبى كير للخروج وواحده عاديه خالص وبحبهم برده قطن ميه فى الميه وبحرص على ده جدا
دى العاديه
ودى الخروج وبحبها اوى وعمليه جدا بجد
وطبعا مجموعة جونسونالاصليه لعناية فائقه بطفلك
وكمان كرات قطن ولوازم العنايه بأنفه وأذنه
طبعا هى دى تقريبا مستلزمات الشنطه الصيفى علشان ربنا يعدى الصيف بخير وسلام ارجوكى بلاش الحاجات اللى مش مهمه زى الكلوك والجزمه والشراب لان ده بيبى ومش بيستخدمهم وبيخنقوه وبيزهق منهم ومالهمش لازمه لو عايزه تغطى رجله غطيها بالبنطلون وكمان البافتات مش مهمه لانه مش بياكل والطاقيات لأ حتى اللى بتيجه مع هدوم النونو بلاش لأنها بتخليه يبرد
وبلاش تشترى البتاع ده اللى صورته دىانا بكرههمش عارفه اخترعوه ليه ابنك شيليه على صدرك وضميه وحسسيه بأمان اصله مش كيلوا جوافه هنشيله فى شنطه
وكده خلصنا اول حاجه وهى تحضر الشنطه
طيب علشان تحاولى بقدى الامكان ماتخليش ابنك يبكى وتوفريله يوم جميل فى الصيف اللى هو أغلس فصول السنه تعملى ايه وتلبسيه ازى
قبل ما تبدأى فى تلبيسه ازم يكون شبعان جداا وراضع كويس وبيلعب ومعندهوش مغص علشان تستمتعى بده معاه
1لازم يكون قدامك على مستوى سطحى وفى حجره نفس درجة حرارة الجو يعنى من غير مروحه أرجوكى علشان ظهره يفضل مفرودتجيبى كرات القطن البيضا وطبق ميه دافى
2تاخدى كرة قطن وتغمسيها فى الميه الدافيه وتعصريها خفيف وتبدأى تمسحى جسم رضيعك بمنتهى الحنان الرقبه مهمه وبعد ما تمسحيها ارمى كرة القطن وهاتى كره تانيه واغمسيها وامسعى الزراعين وتحت الابط وارميها واهتى واحده تانيه واغمسيها وامسحى البطن وهكذا المهم انك تمسحى مساحه صغيره وترمى الكره على طول
3 زيت جونسون اللى هو بيبى اويل تضعى فى ايدك شويه وتدلكى جسم صغيرك وتدلعيه كده تحت الابط والرجلين وجسمه ببطنه وبعدين قلبيه على بطنه وتدلكه ظهره وجسمه بالكامل بالبيبى اويل
4 حطى بودره بين الفخذين للأخر برفق ورشى كمان تحت الابطين علشان الحراره
5ابدئى لبسيه بالرحه فانلته الكات وبعدها تى شيرت النص كم القطن وبعدين البامبرز وبعدين البنطلون وحزام البطن وخليه كده مبحبح حاجه بسيطه بلاش تربطيه جامد على بطنه وبعدين الجلابيه
وبعدين سيبيه بقى على السرير يلعب قدامك لحد ما يروح فى نومه هنيه
وأحلام سعيده
سلاااام
ملكة بلاد العجائب ملكة بلاد العجائب 984637_5.gif فتكات رائعة Fatakat 984637 اوز – بلاد العجائب