بسم الله الرحمن الرحيم
يا جماعة انا عملة عملية تسليك الانابيب امبارح والحمد لله بخير وقلت اجي اكتبهالكم علشان الاستفادة
اولا فيه فرق بين عملية التسليك وعمل اشعة بالصبغة اللي بتكشف عن وجود الانابيب ( قناتي فالوب اليمين والشمال والمسؤلتان عن انتقال البويضه من المبيض الي الرحم) وتكشف ايضا عن انها مسدودة ام لا
تجربتي كالاتي
1 بسبب تأخير الحمل الدكتور طلب مني عمل اشعة بالصبغة على الرحم وقنوات فالوب ودي بتتعمل في مراكز اشعة كبيره طبعا …. فيه ناس بتاخدها ببنج وناس بتاخدها من غيره وفيه ناس بتاخد يادوب مسكن بعدها …. الاشعه عباره عن ضخ نوع معين من الصبغات داخل الرحم من خلال عنق الرحم … ويبدا الدكتور تصوير حركه الصبغه داخل الرحم واذا كانت بتصل للمبيض من خلال القناة الخاصة بيه ام لا …. بالنسبالي الموضوع كان متعب جدا لاني اصلا كنت داخلة متوتره جدا …. وهي وجعها عامل زي وجع البريود بس ضعفه مرتين كده …. فيه ناس والله بتدخل بتعملها عادي تعب بسيط …. كل واحده بتفرق عن التانيه
2نتيجة الاشعة عندي : انسداد قناة فالوب اليمين نتيجة اني عملت زمان عملية الزايده وتقريبا حصل ترسبات حوالين الانبوب وانسد … مش معني ده ان اي واحده عملت الزايده يبقي عندها انسداد لا طبعا ربنا يعافينا جميعا
3طبعا فيه ناس بتحمل حمل عادي من مبيض واحد وده اللي حاول الدكتور يعمله معايا اني اصبر واشوف التبويض من الناحيه الشمال المفتوحه … وانتظرت حوالي 3 شهور وربنا مكرمنيش بحمل
4 استخرت الله واخدت القرار بعمل عملية تسليك الانابيب ودي عباره عن عملية ببنج كلي … بتتصور طبعا زي اي عملية محترمه …العملية معايا كانت كالاتي … عملت قبل العمليه تحليل سكر عشوائي وسيولة دم … ورحت الساعه8 الصبح المستشفي وكنت طبعا صايمه … الساعه 12 الظهر دخلت اوضه العمليات واخدت طبعا بنج كلي …. مده العمليه تقريبا ربع ساعه …. الجراحه عباره عن 3 فتحات واحده اعلي الفخد الايمن والتانيه اعلى الفخد الايسر والتالته عند السره …. الفتحه مش كبيره كل فتحه حوالي سم او سم ونص … طبعا غرز ….ورجعت الاوضه بتاعتي في المستشفي وفوقت من البنج خلال ساعه تقريبا ….. وبدات اتحرك في الاوضه بعد ساعتين بس الم طبعا مكان العمليه والحوض ومنطقة الرحم …. وخرجنا الحمد لله الساعه 6 المغرب
5العملية كانت عباره عن ادخال المنظار من خلال الفتحات ومحاولة تسليك الانبوب المسدود
6النهارده اليوم الاول بعد العمليه التعب نوعا ما اخف من امبارح بس امبارح لما رجعت كنت قادره اتحرك عن النهارده ازاي معرفش …. التعب بدا يحل علي النهارده تقريبا …. فك السلك الثلاثاء اللي جاي باذن الله
7دكتور البنج ربنا يحفظه حسيت انه بروفيسور … ادالي بنج على قد مده العملية وده ريحني انه شخص فاهم
8الدكتور اللي عمل العمليه لا ازكية على الله لكن احسبه شخص كويس يكفيني انه بيحدث معلوماته يوم عن يوم … وعموما هو طمني ان العملية الحمد لله حلت 80% من المشكلة والباقي هيبقي ادويه
دي تجربتي اللي ليها استفسار تسالني وانا تحت امركم بس اسالكم الدعاء لاني تعبانه …. ربنا يرفع عني ويجعله في ميزان حسناتي ويرزقني الذرية الصالحة انا والمسلمات اجمعين
sama.mo2a sama.mo2a 366550_1.gif فتكات نشيطة Fatakat 366550 المكان اللي جوزي فيه – بيتي الصغنون