السلام عليكم يا بنات
اولا احب اديكم فكره عني انا بنت عندي 25 سنه مش تخينه بالعكس كل اللي يشوفني يقول رفيعه وزني 63 وطولي 163 بس عندي جناب ودي وراثه للأسف مهما بعمل رجيم مش بتخس المهم انا بقي اتعقدت في عشتي وقررت التغيير قاعدت ادور واسأل بس الموضوع خد مني سنين لحد ماربنا اكرمني واخدت القرار انا سمعت وقريت كتير علي الشفط باليزر smart lipo واقتنعت بعد ماعرفت انه مالوش اثار ولا اضرار رحت عند دكتور مشهور شويه واكدلي ان حالتي حالها الوحيد العمليه دي وسبحان الله القرار اخد معايا اسبوع بس طلب مني تحاليل اعملها واروحله المهم عملت التحاليل وهي عباره عن صوره دم كامله و سرعه تجلط وجهزت الفلوس واستخرت ربنا وحديدلي معاد العمليه ورحت اعملها الكلام ده كان يوم الخميس اللي فات يعني من اسبوع رحت الساعه 10 الصبح طبعا صايمه قاعدت فالاستقبال عقبال مامضيت اقرارت انا وماما وماقلوكوش ماما كانت حالتها ازاي يلا الحمد لله المهم طلعوني الاوضه بتاعتي علي اساس اني هاستعد لحد مالدكتور يجي بيني وبينكم انا قلت ايه ده دي قلبت بجد ولا ايه المهم فات ربع ساعه لاقيت الممرضه جات وجايبه معاها قميص العمليات وقالتلي اقلعي قلتلها هااااااااااه !!!!!!!!! قالتلي يلا عملت زي الاطفال واتحججت طب لما الدكتور يجي عشان عاوزه اتكلم معاه راحت شخطت فيا قالتلي ماكيد الدكتور هايقعد معاكي ويتكلم هي شخطت الشخطه وانا قلت اتلم واقلع ماما ساعتها جالها سكر وقتي ياعيني واصفرت قلت اقلبها تهريج عشانها دخلت قلعت بس فضلت بالملابس الداخليه " بستهبل فيها " :] المهم جات واحده تانيه عشان تركبلي الابره اللي هايحطوه فيها المحاليل ركبتها وعلقتلي محاليل واديتني فنجان اشربه بتاع كده غريب المهم شويه ولاقت الدكتور جه قالي مستعده وراح وقالهم ابعتوها رحت الكلام ده كان الساعه 12 الا ربع دخلت العمليات لاقت الدكتور مشغل قرأن وقالي سمي الاول اطمنت بيني وبينكم المهم راح موقفني علي حيطه وقعد يصور و يخطط بالقلم وانا مكسوفه المهم قالي يلا توكلنا علي الله اطلعي علي السرير وفجأه لاقت فالاوضه 6 دكاتره قلت يانهار ابيض كل دول ليه بس بصراحه كلهم الله يكرمهم كانوا اخلاق قالولي هانخضرك بس نصفي بس قلت اشطه عشان ابقي شايفه راح جه دكتور جنبي تاني قالي انا هاديكي مهدء اعصاب عشان التوتر هو حط الحقنه من هنا وقالي انتي خريجه ايه وانا ماحستش بحاجه …
لما فقت كانت الساعه 3:30 لاقتهم لافين رجلي ببلاستر عمليات كلها زي الموميه وملبسني كورسيه من تحت الركبه لحد تحت الصدر المهم قاعدوا يفوقوا فيه وعلائولي محاليل تاني لحد الساعه 7 وراح الدكتور جايبلي برطمانين ماليانين دهن وقالي مبروك العمليه نجحت الحمد لله وفالولي تقدري تروحي انا كل ده وعادي مش حاسه بحاجه خالص غير دوخه قمت لبست هدومي عشان امشي ولاقتني بشور دم قالولي لا دا عادي هايفضل يومين المهم اخدت بعضي وروحت وبعيد عنكوا انا وصلت البيت من هنا وحاسيت بوجع فظييييع ولا عارفه اقعد ولا انام يالهوي كان يوم صعب
عدا اليوم تاني يوم وانا عماله اتوجع اكتر وحاسه اني منفوخه ومنمله نسيت اقولوكم ان كان الاختلاف باين بعد ماخرجت وكانوا موصيني اني ماقلعش الكورسيه خالص والبلاستر هافكوا بعد 5 ايام المهم مش قادره اوصفلكم الوجع ومش متخيلين مش عارفه اتحرك ولا انام ولا اي حاجه المهم عدت الايام لحد 5 يوم الدكتور قالي ادخلي فكي البلاستر تحت الدوش واستحمي والبسي الكورسيه ومايتقلعش
انا دخلت الحمام افك البلاستر ماستحملتش الوجع والمنظر كان اول مره اشوف منظر رجلي عارفين والله كلها كدمات زرقه كبيره والجلد لونه اصفر ومكرمش انا شوفت كده اغمي عليا المهم ماما فوقتني ولما فدرت اقوم لاقت فتحات صغيره يمكن اقل من سنتيمتر في كذا مكان المهم شدت حيلي وقمت لبست بس وانا بتوجع من الالم الشدييييييييييييد كلمت الدكتور حاكتلوه قالي معلش عادي متخفيش انا النهارده اليوم السادس مش هاكدب عليكوا انا موجعه موووووووووووت هو جلدي بدأ يشد شويه بس الزرقان صعب كاني وخده عالقه بس الحمد لله حاسه بفرق شويه انا حبيت احكلكم تجربتي بالتفصيل عشان تبقوا عابشين معايا التجربه وهابقي اقولكم الجديد ادعولي انا بتوجع اوي ومش بعرف انام بس اهه تجربه وان شاء الله ربنا كريم استنوني تاني عشان اقولكم علي التطورات ……
hasbyALLAH hasbyALLAH images/avatars/theworld.gif فتكات متميزة Fatakat 559840 cairo – مصر