السلام عليكم ورحمة الله وبركاته ازيكم يا احلى حوامل انا ولدت يوم الاتنين 20-5 وجبت احلى بنوته فى الدنيا كنزى حبيبة قلبى والحمد لله قمت بالسلامه
انهارده بقى جاية اقولكم على تجربتى مع مستشفى عبد القادر فهمى لتانى مره
انا كنت ولدت فيها ابنى مروان من 3 سنين فى نفس المستشفى وكنت الخدمه فيها ممتازة ومن بعدها كل اللى بيسأل على المستشفى باشكر فيها
لكن لما رحت اولد المره دى شفت العجب هاحكيلكم بقى
رحت المستشفى الساعه7 ونص صباحا حسب تعليمات الدكتور على اساس انى ادخل عمليات الساعه 9 ولحد الساعه 9 الا ربع وانا بهدومى ومحدش عبرنى ولا كشفوا عليا ولا غيرت هدومى ولا عملولى تحاليل ولا ركبوا الكالونه ولا اى حاجه حتى الاوضه اللى دخلت فيها حر نار
المهم اول مالدكتور بتاعى وصل المستشفى جابولى لبس العمليه جرى وعملوا تحليل فى لحظه وشالونى هيله بيله على الترول وجرى على العمليات وانا مخضوضه
المهم بعد مدخلت العمليات فضلت كتير على مركبت الكالونه ودكتور البنج رايح جاى والممرضات عاملين دوشه وانا مرعوبه وشكل اوضة العمليات يخض وخصوصا انى اول مره افضل فايقه كتير جوه كده المهم بعد العمليه دخلونى العنايه المركزه عشان قلبى تعبان وكانوا خايفين من المضاعفات
نجى بقى للعنايه المركزه بجد كلمة زباله قليله عليها محدش عبرنى جوه هما بس مركبلى جهاز الضغط واجهزة القلب والممرضات قاعدين مش معبرنى عمالين يرغوا
كمان المفروض اتمشى كل ساعتين محدش كان بيقولى قومى انا اللى كنت باقوم لوحدى ومن نفسى عشان الجرح يلم واعرف اخرج واروح بيتى والمفروض اصلا ان دكتور القلب قالهم اتمشى عشان ميجيش جلطه فى رجلى ومحدش قاللى ولا اهتم بس الحمد لله انى اتحركت من غير ماعرف تعليمات الدكتور
حتى الشرب والاكل محدش كان معبرنى مع ان الدكتور قايلهم النظام اللى المفروض يتبعوه معايا بس تقولوا لمين لا حياة لمن تنادى
جه الليل وانا كنت زهقت ومن كتر القاعده لوحدى ومامتى وبنتى قاعدين فى اوضه فى الدور اللى فوقى حتى البنت مكانوش مخلينى اشوفها
وجم بقى الممرضات بتوع شفت بالليل عيلتين مكملوش 20 سنه ولسه فى معهد تمريض مخلصوش حتى تعليم لسه ازاى بقى ينزلوهم تدريب فى شيفت بالليل وكمان فى العنايه المركزه طبعا منتهى الاهمال طبعا فى حالات اصعب من حالتى ازاى بقى بيتعاملوا معاهم وهما مش خبره خالص
الانستين الممرضات بقى واحده ماسكه الموبايل طول الليل رغى والتانيه دخلت فى اخر سرير فى العنايه ومديها نوم مع انهم اصلا مستلمين الشفت الشيفت الساعه 8 يعنى مش من الصبح
عدى عليا الليل وانا مخنوقه وهاطق من جنابى واوال مالنهار طلع لسه عينى هتغمض راحت الممرضه مشكشكانى بالابر والكالونه وصحيت مفزوعه وبعدها فضلت اعيط من الوجع لانى مصدقت نمت
الدكتور كان قايل انى هاروح اوضتى الصبح ولما جه الصبح جه الشفت الجديدللممرضات ولقيت خبط ورزع ودوشه وصوت عالى وجيش من الدكاتره للحاله اللى جانبى وكمان عاملات النظافه لما الستاير ومغرقين الارض ميه وبيمسحوا والصوت عالى وانا متعريه وانا نايمه والسرير بتاعى فى وش الباب واللى رايح واللى جاى شايفنى ومفيش اى اهتمام باللى مرميه على السرير
ولما سألت هاطله امتى قالولى لما الدكتور يجى طب وهيجى امتى ردهم كان حسب التساهيل
طب عايزه حد يفضيلى القسطره يسبونى بالساعتين وفجأإه جت حاله جديده للعنايه وبقى الاهتمام كله بها
قمت اتسندت وندهت الممرضه عشان افك القسطره خالص مع ان كانت المفروض تتفك بامر الدكتور فى اليوم اللى قبله لكن الدكتور اصلا مجاش شفنى فطلبت من الممرضه تشيلها وشالتها ورحت الحمام رجعت لقتهم خدوا الفرش اللى على سريرى للحاله الجديده وملقتش مكان انام فيه فضلت قاعده على الكرسى وكمان الممرضه جت خدت الاجهزة اللى جنبى كلها وودتها للحاله الجديده لما سألتها ليه كده قالت مانتى شويه وهتطلعى قررت لوحدها من غير دكتور كده قالتلى ااتصلى بوالدتك عشان تيجى تلملك حاجتك كلمت ماما وماصدقت اطلع وكلمت الدكتور بتاعى وقولتله ععايزه اروح وجيت بقى اطمن على النونه اكتشفت ان محدش قاسلها الصفرا خالص وطلبت الدكتور مع ان المفروض يقيسوها مرتين
جالى الدكتور بعد ساعه واطمنت ومصدقت طرت من المستشفى
انا حبيت اقولكم ان المستشفى بقت زباله غير ان كل الاوض بتتوضب وطوب ودبش وحاجه تقرف
بجد اللىهتولد قريب بلاش تروح هناك
enginnano84 enginnano84 550234_6.gif سوبر فتكات Fatakat 550234 القاهرة – مصر
سبحان الله و بحمده