والله يابنات انا كل اللى كنت عاوزاة اخس شويه وبصراحة زى البعض ولا عندى ارادة وبجوع واكبر دماغى ومكملش الريجيم واعلانات ياما مرة عن لاصقه التخسيس السحريه ومرة عن اعشاب فاقدة الشهيه بتخلى الواحد ميجوعش وبينى وبينكم الغريق ما بيصدق يتعلق بقشايه مكدبتش خبر قلت اجيبهم الاول رحت جبت فاقد الشهيه دة هو عبارة عن مزيج من الاعشاب ومكتوب على العلبه المكونات شاى اخضر وجنزبيل وبابونج قلت كويس ودة بودرة الكيس بيتفضى على نص كوب ماء او عصير وبتاخد وماكلش الا بعد مرور ساعتين بعد ما اشربه ال ايه عشان يتفاعل ويسد النفس وهو طعمة قريب للعرقسوس كدة المهم اخد واحد ورا التانى والاقى نفسى اتفجع اكتر يالهوتى فى ايه رحت كلمت اخت عزيزة عليا وحكيت ليها على المنتج قالتلى دة يااستاذة مكمل غذائى وفى مواد فاتحة للشهيه والمكونات دى بيدوهم للرفيعين عشان يفتحوا نفسهم على الاكل ودة ولا بيخسس ولا بيعمل واضحك عليكى
وانا ياليله سودة فاتح ايه دانا عاوزة اسدها مش افتحها وطبعا خسرت مبلغ وقدرته وادى شكل العلبه
ودى المكونات اهوه على العلبه مكتوبه شاى اخضر وجنزبيل وبابونج
ودة شكل الكيس من جوة ال راسمين فراشه من بره بيضحكوا عالناس
ودة شكل الاعشاب اهوه شكل العرقسوس وطعم العرقسوس وطلعت فاتح شهيه وبيضحكوا على الناس
وادى شكل العلبه مع الاعشاب المقلب عشان تخلو بالكم يابنات والله كله مقالب
وطبعا اخدت مقلب زى اللى فات وعدت وانا لسه بحاول اعمل ريجيم
وجيه اعلان تانى عن الاصقه السحريه للتخسيس العجيبه اللى بتخسس من 2 الى 3 ك فى خلال 10 ايام انا فرحت وعينى زغللت وقلت اجيبها واجرب وبردو مقلب والا مقلب دة لازق طبى بتاع الجروح ولا بيعمل حاجة وللاسف بيلعبوا بنفسيات الناس وكلها عوامل نفسيه
وجبتها بالفعل ولا خسيت جرام وكنت ابقى لزقاها لا تسد النفس ولا نيله ومقلب بردو ودى شكلها جبت صور المنتج من النت عشان تحذروا الكلام الفارغ دة كله لانى رميتها للاسف لانها مقلب
اهوه والله بلاستر عادى وبيعرفوا ازاى بلعبوا بنفسيات الناس
وانا قلت تجربتى لانها كلفتنى حوالى 750 جنيه او اكتر ورميتهم بالارض
والله يابنات ما فى افضل واحسن من الريجيم العادى وبالفعل بعد ما اتنصب عليا مرات لتبعت ريجيم هنا مع البنات وفعلا خسيت 19 ك للان واللى كنت عاوزة اخسهم وهتسالونى خسيتى ازاى هقولكم ريجيم عادى جدا من هنا من فتكات وعدلت النظام الغذائى وطريقه الطهى والبركة فى العضوة نور خبيرة التجميل الصراحة منزله وصفات جميله ومفهاش دهون خالص ولعبت رياضه مش اكتر من كدة وكتبت تجربتى مع المنتجات دى عشان تخلو بالكم وسيبكم من الكلام الفاضى بتاع الاعلانات اللى بتيجى على التلفزيون دة مفيش افضل من انك تعملى ريجيم وتلعبى رياضه وتخسى وحدة وحدة ومتدخليش اى مواد الله اعلم عواقبها ايه فى جسمك
ويارب اكون قدرت افيدكم من منتجات ملهاش لازمة وسحب فلوس عالفاضى
غادة الكاميليا2017 غادة الكاميليا2017 422485_11.gif فتكات ست الكل Fatakat 422485 …………… – بلاد الله الواسعه