تجربتى فى تصليح شعرى بعد ماكان باظ خاااااااالص للعناية بالشعر

https://platform.ak.fbcdn.net/www/app…1284348530.gif

أزيكم يا أحلى فتوكات

بصو بقا النهاردة حتكلم عن شعرى الغلبان اللى اتبهدل معايا

شعرى كان مبهر و رائع من ثقلة و قوتة و نعومتة

لحد ماأتحدست علنى كدا مرة و واحدة قلنتلى اية الشعر الحلو دا كل دا شعر

و الله العظيم يا بنات من يومها و شعرى فى النازل بدئت اكرة و قصيتة كرية بعد ماكان طويل لحد اخر ظهرى

و بدأ يخف و يتقصف و بينى و بينكم انا ليا يد فى المووضوع دا بسبب الصبغات المستمرة

المهم

انة يعنى كان شغال برضة حلو مش سىء قوى لحد من حوالى6شهور استعملت شامبو من شركة ماى واى بالثوم و الجرير و كريم التصفيف بتاعة و حمام الكريم كمان شفتو الهنا

و من اول مرة فى استعمالة لحظت انة بقا شبة مفرد من غير بيبى ليس ولا سيشوار و شكلة حلو

فرحت قوى و لكن مع الوقت بدأ شعرى يتساقط بغزارة

و اقسم بالله يا بنات ان شعرى كان بينزل بطولة خصل كاملة و خف جداااااااااااااا فى فترة صغيرة حوالى 4شهور و شوية من استعمالى للشامبو

فشكيت فى الشامبو و مجموعتة و حسيت و لم أتأكد ان هو السبب (( و ربما يكون فى نسبة فرد أثرت على شعرى ))

و بدأت ادور على علاج لحد ما دكتور صديق زوجى جبلى ادوية و الحمد لله جابت نتيجة قوية و شعرى بطل يقع و بقا ناعم و يجنن

و طبعا لانى بحبكم قلت لازم أحذركم من الشامبو الزفت دا و افيدكم بالعلاج

شوفى يا اختى

اول حاجة الشامبو و هو جبلى الشامبو دا

1/هير ستابيل

و هو شامبو طبى و بتغسلى شعرك بية مرتين كل اسبوع سعرة 20جنية و هى زجاجة صغيرة بس بتقعد مدة حوالى شهر او اقل حاجة بسيطة و هو مكتوب علية انة من خلاصة الزيوت الهندية

2/ تونيك هير ستابيل

و دا تونيك للشعر نفس نوع الشامبو بيتحط بعد غسيل الشعر و مش بيتشطف بعدها و ريحتة حلوة بس بيعمل سخونة فى الرأس شوية متقلقيش دا لانة بيجذب الدورة الدموية للرأس و بينشط فروة الرأس

سعرة 20 جنية تقريبا برضة

3/ لسيون روتاج + لسيون الو بانثين + امبلات ايفا بالصبار

لوسيون روتاج ب20 جنية
لوسيون الوبانثين ب9 جنية
امبولات الو ايفا ب13 جنية (( 4 أمبولات ))

بتخلطيهم مع بعض كلهم و ترجيهم كويس و تحطيهم فى بخاخ و تحطى منهم مرتين فى اليوم
و الدكتور قالى اهم حاجة انك تعملى مساج مع اللسيون لشعرك حولى 5 دقائق كل مرة

و طبعا قالى انى لازم اسرح بمشط خشب (( ضررررورى ))

باقية النصايح بقا

1/ مربطش شعرى جامد بأى توكة

2/ اعمل حمام كريم مرة فى الاسبوع بعد غسيل الشعر (( و انا اخترت حمام كربم بانويل بالقمح ))

الانبوبة ب8 جنية تقريبا و فى باكت ب3 جنية بيكفى مرتين

3/ اعمل حمام زيوت طبيعة مرة فى الاسبوع مع فوطة سخنة (( و انا اخترت زيت الزيتوت و زيت الخردل و زيت جوز الهند ))

الازازة بحوالى 4 جنية

بجيبهم من فتح الله من ماركة الحواج و بلاش الزيوت السابية مغشوشة

3/ بلاش بلسم نهااااااااااااائى

و استخدم كريم تصفيف ألو ايفا و جبتة من كارفور ب12 جنية تقريبا كبير حوالى 250 جرام

و فى كمان بديل الزيت الو ايفا ب6جنية 75 قرش

وبس

و النتيجة

::::

بسم الله ماشاء الله بعد شهر واحد السقوط قل بنسبة 75% و بقا ناعم جدا و الحمدلله التقصف قل كثير بس لسة مش حاسة انة تقل بس طول حوالى 2 سم و الله يا بنات الحمدلله النتيجة مرضية جداااااااااا

و الصراحة بينى و بينكم انا مكنتش منتظمة 100% فى العلاج كنت بقطع يعنى

بس الحمدلله النتيجة هايلة و الدكتور قال مع المداومة ان شعرى حيتحسن و يطول و يثقل تانى

و كمان جوزى سأل هل اللسيونات امنة على طفلة 3 سنين قال ايوة فبحط لبنتى من اللسيونات

يلا بقا جربوة و ادعولى و ربنا يجعل شعوركم اجمل من شعور حور الجنة و يجعلكم اجمل النساء فى أعين ازواجكم

الصور كلها من على النت مع السماح من صاحبات الصور

بحبكم فى الله و متنسوش التقيم

أم كنزى أم كنزى 2225_35.gif فتكات ست الكل Fatakat 2225 اسكندرية – فى مملكتى مع زوجى حبيبى و بنتى الحلوة كنزى

سبحان الله و بحمده