ازيكوا ياقمرات انا الحمد لله ولدت من 13 يوم وجبت هنا ادعوا لى ربنا يخليهالى هيا ومروان ويجعلهم من الصالحين البارين
مروان ولدته ببنج كلى
وكنت خايفه من النصفى جدا لكن توكلت على الله وطلبت من الدكتور اولد بيه المره دى
وهحكيلكوا اللى حصل بالظبط معايا
انا على اخر لحظه خفت منه وكنت عاوزه ارجع فى كلامى بس عدت الحمد لله
دكتور البنج قاللى اقعدى وخلى دقنك على ركبتك وادانى بنج موضعى عشان ماحسش بالشكه لانها بتتاخد فى الضهر وفى مكان حساس اى حركه بتبقى غلط اخدتها وبعدها نيمنى بالراحه وقاللى ممنوع تحركى راسك ولا ترفعيها نهائى عشان مايجيلكيش صداع وسالنى عاوزه ابقى صاحيه ولا نايمه قلت له افضل صاحيه حطوا لى حاجزعشان مااشوفش العمليه بس كنت سامعه كل حاجه لكن لسانى كان تقيل شويه ومش حاسه باى حاجه ولابنصى اللى تحت كان حد بيمشى ايده على بطنى بس وحسيت بضغط بسيط وهما بيطلعوا هنا وشفتها وهيا مولوده وسمعت اول صرخه ليها وكنت فرحانه اوى
بعد الولاده نلنى الغرفه بتاعتى والدكتور جالى قاللى ممنوع ترفعى راسك قبل 6 ساعات بس الممرضه الله يسامحا كانت فارده السرير اوى ولما مفعول البنج بدا يروح بعد ساعه حسيت بالالم جامد لان بطنى كانت مفروده بسبب السرير ومكنتش عارفه اتحرك خالص
لكن بعدها رفعت لى السرير شويه وادتنى مسكن هون الوجع شويه وقمت بعد 6 ساعات عشان يمشونى شويه ويشطفونى وكده والحمد لله عدت
اما البنج الكلى فطبعا مابتحسيش باى حاجه ساعة ماتاخدى البنج غير وهما بيفوقوكى بعد الولاده لكن بتفوكى اجارك الله على الم رهيب انا فقت فى مروان على ناااااار فى بطنى لدرجة انى مكنتش بفكر اشوفه مكنتش بفكر غير فى الوجع وبتوجع جدااااا
الحمد لله ماصدعتش فى البنج النصفى جه لى صداع تانى يوم واخدت بنادول بقيت كويسه والدكتور قاللى لوصدعتى اشربى حاجه فيها كافين شاى قهوه نسكافيه كده
بس دى تجربتى مع الولادتين ولو حد عاوز يسال على حاجه تحت امركوا ومتنسونيش من الدعاء
ام مروان 2024 ام مروان 2024 50055_2.gif فتكات غالية قوي Fatakat 50055 حضن جوزى وابنى حبيبى – مصر