السلام عليكم
يوم الاتنين اللى فات كان اليوم الموعود عشان اجيب قماش الانترية بتاعى
كان قدامنا اختيارين
*يا اما ننزل شارع الازهر و دة طبعا معروف
*يا اما ننزل الوكالة و دة انا اقترحتة على خطيبى(مكتوب كتابنا) لان فية بنات هنا فى فتكات قالت علية و ان فية حاجات هايلة اوى للقماش و الستاير و السجاد كمان و ارخص من الازهر
بس للاسف انا عمرى ما رحتها و لا اعرف هى فين
فى الاخر قررنا ننزل الازهر افضل و خصوصا ان من فترة كبيرة كدة كنت بتمشى انا و ماما و خطيبى فى الشارع دة و شوفنا بالصدفة قماش عجبنا اوى لونة و رسمتة و من ساعتها و الشكل دة ثابت فى دماغنا انا و هو
نزلنا بقى الازهر و اتفرجنا و كان هدفنا الاساسى اننا منجبش القماش خشن لاننا احنا الاتنين(انا و خطيبى) بنكرة القماش الخشن و اللى يحرر.. بنحب الناعم دة بس مش لدرجة انة يبقى عامل زى قماش الصالونات
لا احنا كنا عايزين حاجة ناعمة زى انواع معينة كدة من الكتان و كدة و كان فى بالنا بردة ان احنا ندور على القماش التانى اللى كان عاجبنا من كام شهر
دخلنا و اتفرجنا و عجبتنا شوية حاجات و قلنا فى بالنا لو ملقيناش القماش اللى شفناة من كام شهر نبقى نرجع ساعتها للمحلات اللى عجبتنا دية و نقارن ما بينهم و نختار و كنا بنسأل على انواع الاقمشة اللى عجبتنا و اسعارها
كان فية نوع اسمة برينت شوب و الرسمة اللى عجبتنا شوية كان سعرة ب 18 و نص من غير فصال
و نوع قماش تانى اسمة شانيلا و دة كان المتر ب 35 من غير فصال بردة و الراجل قالنا ان نوع القماش دة محترم و راقى و يعيش و مش بيحرر و مش زى البرينت شوب اللى تحس انة قماش مصايف و مش حاجة تشرف(و انا و خطيبى على فكرة كان عاجبنا البرينت شوب اوى هو اة قماش مودرن كدة بس كان عاجبنا)
و خطيبى لما شاف شانيليا دة عجبة و قال علية انة محترم فعلا بس كان سعرة غالى علينا و كمان لقينا معظم الوانة غامقة بس كان لونيين بس اللى فية فاتحيين زى اللون اللبنى و اللون البينك و كان عاجبنا اكتر البينك بس قلنا نكمل فرجة
و اذ فجأة لقينا القماش اللى شفناة قبل كدة و عجبنا و لقينا نفس الرسمة و نفس الالوان
و عرفنا ان نوع القماش دة اسمة برينت شوب
و الراجل قالنا ان سعرة 24 المتر قلنالة لا احنا لسة شايفين قماش تانى برينت شوب و كان المتر فية ب 18 و نص راح قايلنا لا اصل البرينت شوب انواع و النوع دة احسن و بعد الفصال قالنا ممكن ب 20 المتر اخر حاجة
و احنا طبعا كنا فرحانيين اوى الحمد لله اننا لقينا القماش اللى كان مالى دماغنا و مش شايفين غيرة بقالنا شهور
روحنا لكام محل تانى و بعدين لقينا نفس القماش و نفس الرسمة فى محل تانى بس الراجل قالنا 20 المتر بردة و حاولنا ننزل معاة ل 18 المتر و موافقش و فى الاخر اخدناة ب 19 المتر
بس الفرق فى الراجل دة غير انة ارخص ان كمان الرسمة دية لما شوفناها فى المحل الاولانى كان حاطط السادة بتاعة بنى فاتح شوية و كان درجة من ضمن الدرجات اللى موجودة فى المشجر بس الراجل اللى جبنا منة دة بقى كان حاطط السادة بتاعة برتقالى فاتح كدة يعنى و بردة كان الرتقالى الفاتح دة من ضمن درجات المشجر .. فدة طبعا عجبنا اكتر من الغامق
قلت لخطيبى تعالى نتمشى كمان يمكن نلاقية بسعر ارخص قالى لا خلاص كفاية كدة ادام عاجبنا و روحنا لكذا واحد قبلية و كدة يبقى خلاص
هو خفيف اة بس قماشتة ناعمة كدة و مش بتحرر و مودرن شوية بس مش مودرن اوفر يعنى .. يمشى كلاسيك لان اصلا شقتى ان شاء الله كلاسيك
يعنى هو وسط ما بين المودرن و الكلاسيك
و الحمد لله جبنا القماش السادة منة و المشجر و الاتنين كانوا على فكرة بنفس الثمن يعنى المشجر زى سعر السادة
بس فية انواع تانية كان المشجر فية اغلى من السادة
و دية كانت تجربتى و يا رب قدرت اوصلكم فكرة عن الاسعار و انواع الاقمشة
و ادعولى انة يطلع قماش حلو و يعيش معانا و ان ربنا يوفقنا و يسهلها عليا و على خطيبى ان شاء الله
مدام راغب مدام راغب 538876_1.gif فتكات ست الكل Fatakat 538876 كل المدن – مصر