السلام عليكم ورحمه الله وبركاته
وحشتونى اوى
انا الحمد لله ولدت وكنت عمله الموضوع دا قبل ما اولد بيومين بالظبط
https://fatakat.univanet.com/#p90659133#post90659133
المهم انا عيزا احكى ليكم تجربتى الاولى علشان بعيد الشر عن اى وحده فيكم وميحصلهاص زى ما حصلى
انا يا جماعه زى اى وحده حامل بروح اتابع مع دكتوره ومشهوره والعياده بتعتها بتبقى متكربسه ومفهاش مكان فاضى
طول حملى تقولى كويسه وحملك كويس والجنين كويس
لحد الشهر التامن وانا جسمى بدا يفور ويورم بطريقه مش طبعيه محدش بقى بيعرفنى خالص
تخنت جدا جدا المهم رحتلها قالت ادام الضغط مظبوط يبقى مش زولال وكل مره تقولى مش زولال
المهم انا حالتى كانت ان عضم الحوض ضيق والرحم مقلوب لتحت يعنى مبيبقاش فى وضع الولاده الطبيعى
هى سبنتى لغايه اما خلصت التاسع ومقلتليش الكلام دا وعديت 3 ايام وبردو مقلتليش
فانا قلت اكشف عند حد تانى فوحده شارت عليا وقالت روحى مستشفى الزهراء الجامعى
خليهم يشوفو حالتك بس انا كنت اسمع ان معملتهم وحشه وكدا
المهم استخرت وملقتش حل غير كدا الكلام دا كان يوم 26 -11 يوم اتنين اخدت امى وجوزى ورحت اول حاجه موضوع الفحص دا حاجه صعبه اوى انا رفض اى حد يفحصنى هى وحده بس فحصتنى وحدتت حالتى وقالت ليا انك مينفعش تولدى طبيعى الحوض بتاعك ضيق خالص وكمان مقلوب لتحت وقالت لو انتى خيفه من القيصرى ممكن احاول معاكى بالطلق الصناعى وكانت كويسه جدا معايا وطمنتنى واعدت تقولى القيصرى مش صعب ولو انتى خيفه من البنج خدى بنج نصفى وكدا
المهم كتبتلى على حجز لان كنت عديت معادى ب4 ايام وقالت انتى محتاجه كيس دم المهم خدو منى عينه علشان يجبولى زيها ملقوش زيها رحنا بنك الدم ملقناش
المهم كان الوقت عدا راحت قالت تيجى بكرا الساعه 9 ونص الصبح
رحت قلت انا استخرت واكيد دا الخير ورحت مشيت اتصلت على دكتوره تانيه غير الى بتابع معاها قالت تعالى بكرا اولدك قلتلها ماشى
واستخرت ربنا بنها وبين الزهراء
ولقتنى تانى يوم رحت الزهراء لقيت طاقم دكاتره غير الى كان موجودامبارح وعيزين يعيدو تانى الكشف والفحص زكدا قلتلها انا معايا تقرير بحالتى متعدوش الكشف تانى رحت صعبت عليهم وخدو منى الورق وقالت طيب بس اقطعى تذكره تانيه وهنعيد بس الحاجه الى بالبؤ يعنى امته اخر دوره عندك امراض قبل كدا قلتلها كان عندى حمه رومتزميه قالت على القلب ولا المفاصل قلتلها كانت على الاتنين بس مشيت من على القلب قالت مين الى قالك قلتلها الدكتور قالت يعنى عملتى ايكو على القلب وعرفتى قلتلها لا بالتحليل راحت قالت ما فيش حاجه اسمها تعرفى بالتحليل وراحت محولانى على عياده القلب راحو كشفو عليا وعملولى ايكو ورسم قلب
وقاسو الضغط لقو الضغط 150 على 90 وفى نسبه حمه على قلبى
المهم قالو لازم تحللى بول علشان نشوف الورم دا طبيعى ولا لا عملت بول طلع فى زولال فى البول بس نسبه واحد
راحت قالت انتى محتاجه عنايه مركزه بعد ما تولدى علشان الضغط ممكن يعلى وانتى عندك حمه على قلبك والزلال وكل دا مينفعش المهم ملقوش مكان فى العنايه راحت قالت معليشى روحى اى مستشفى تانيه هكتب تقرير بحالتك وكدا قلتلها انا جوزى اتبرعلى بدم افرضى احتجت دم مين هيتبرعلى تانى راحت قالت خلاص استنى واتصلت على رئيسه القسم وقالت ليا خلاص هتتحجزى وخلاص جه معاد الزياه الكلام دا يوم التلات الساعه 6 قالو ليا هتولدى يوم الاربع الساعه 9 وماما وجوزى اعدو معايا وقت الزياره والدكاتره جابولى دا وضغط علشان الضغط يظبط والزياره خلصت بس قبل ما تخلص بخمس دقائق طلبو منى تحليل بول وتحليل دم
رحت عملتهم وماما مشيت خلاص على انى هولد بكرا الساعه 9 رحت لقيت الدكتوره جيه بسرعه تقولى رجعى اهلك تانى بسرعه انتى حالتك خطره ومفيش مكان فى العنايه المركزه قلتلها يعنى ايه حرام عليكم اموت انا والى فى بطنى راحت قالت خلاص خلاص اساسا مينفعش نمشيكى تلوقتى انتا كدا فى مسؤليتنا طلع بقى الزلال بقى اعلى نسبه خالص والانميا بقيت 8 ومينفع استنى راحو رجعو دكتوره التخدير تانى وباقى الدكاتره ودكاتره الرمد وقالو هتخشى غرفه العمليات حالا ولبست الروب بتاع العمليات وركبت الكلونات وفجاءه لقيت يجى 15 دكتوره فوق راسى دكتره من كل نوع القلب والرمد ومعرفش بتوع النسا والتخدير ونمت على سرير العمليات وحده مسكه ايدى الشمال بتركب محلو ووحد اليمين ووحده بتركبلى التنفس ووحده بتركبلى الاقسطره ووحده معرفش بتعملى ايه فى بطنى ورحت فى النوم ادونى بنج كلى قالو حالتك متنفعش نصفى خالص انتى ممكن قلبك يقف وطلع عندى تسمم حمل واعلى نسبه وبعد نص ساعه طلعت من غرفه العمليات بس طلعت فيقه ازاى دا معرفش حطولى حاجه فى زورى كدا وطلعت على العنايه المركزه واتوصلت بالاجهزه الى عمرى ما شفتها على الحقيقه بشوفها بس فى الافلام الى لما الواحد يموت تصفر والاكسجين على بوقى وايد مليانه محليل وسلوك مليا صدرى والضغط بقى 220 على 150 واعد 3 ايام فى العنايه المركزه بين الحيا والموت ابنى مشفتهوش الا بعد اربع ايام مش حسه بنفسى جالى فى العنايه تشنجات ولسانى طلع برى وقفلت عليه بسنانى وفى يوم من الى كنت فيهم فى العنايه مش فكراه وبعدين طلعت اعد يومين كمان فى المستشفى حجز وطلعت اليوم السادس ليا فى المستشفى
ومعملتش ريح غير بعد تلت ايام وبردو معملتش حمام غير بعد خمس ايام لان مكنش ينفع امشى ولا اقوم اتمشى لان كنت باخد مهدئات ومنوم وكدا كان جسمى تقيل بس وربنا يشهد المعاملا معايا كانت اخر احترام وكانو مهتمين بيا جدا وكان فى ممرضه اعده فوق دماغى مبتتحركش وكانو بيحمونى وبيغرولى على الجرح والجرح نضيف جدا يعنى انا ولده بقالى 10 ايام مش باين الجرح اساسا ومحستش طبعا بالالم الجرح لان كنت نيمه وعلطول باخد مسكن
والحمد لله رحت لابنى حذيفه واخدو فى حضنى ورضعتو
طولت عليكو بس بالله عليكو متستهونو باى حاجه كانت عندك قبل كدا اكشفى عند دكتور واتنين جربى كذا وحده لو عندك اى مرض لازم تعرفى الدكتور بتاعك وربنا يقوم كل الحوامل بالسلامه
نبراس الحياه نبراس الحياه 249095_1.gif فتكات هايلة Fatakat 249095 القاهرة – مصر