السلام عليكم ورحمه الله و بركاته
طبعا بنات كتيير بيسألو عن الحلل السيراميك و يستفسرو عن انواعها.
حعرفكم خلاصه تجربتي لمده سنتين لاكتر من نوع سيراميك. و النتيجه دي و انا بحافظ عليهمو مش بستخدملهم الا المعالق الخاصه بيهم و محدش بيستخدمهم غيري.
ده النوع الاول
فالز التركي حبيب الملايين
جبته من اولاد نصار.. و طبعا كان اسوأ مما توقعت. اولا الوصله اللي مابين الايد و المقلايه بلاستيك. فمن اول استخدام لونها اتغير حتى لو النار مش عايه و بعيده عنها. و بالوقت اسودت خالص.
تانيا لون السيراميك الابيض بالتدريج بهت و اصفر جدا.
رغم المحافظه لاقيت خدوش سخيفه
و ده الفرق بين اللون بين لون المقلايه و الووك اللي مستخدمتهوش غير مره واحده
للاسف انا كنت جايبه قلايتين و ووك و 2 سوتيز
و طبعا لونهم بيتغير من بره و جوه و بجد اتخدعت فيهم..
تاني نوع ده تركي برضو اسمه CMC ده جيباه من محلات 6 اكتوبر وراء كليه هندسه عين شمس.
ده كويس الحمدلله جيبه منه حله كبيره بسلق فيها اللحوم و بطبخ احيانا فيها لو كميه و جربتعا للرز في عزومه كويسه الحمد لله رغم انها اخف كتير من فالز الا انها الحمدلله متجرحتش زيها.
و الحمدلله اليد وصلتها معدن فلونها متغيرش
ثالث نوع اسمه DOMO ايطالي برضو من محلات 6 اكتوبر. ده بقي زباااااله لابعد الحدود
بيقشر من غليه المايه من غير مجهود
عملت فيه الرز مرتين ثلاثه و والله مش بستخدم الا معالق التيفال و مش بغسلها الا بسفنجه ناعمه و شوفو منظرها
اخر نوع ده بجد حبيبي. اسمه ازوردي. ده تركي بس يعتبر تيفال ابيض مش سيراميك. جيباه من الابياري اللي في ابوداوود الظاهري مدينه نصر.
بجد ما شاء الله وهمي
الحمدلله متغيرش لونه من بره ولا جوه ولا خدوش الحمدلله و بيسوي زي الفل عندي حله واحده نفسي استخدمها لكل حاجه بجد الحمدلله نفدت بيها.
اكيد في ناس بتقول مالها مرقعه الحلل بتعتها كل واحده نوع. بس ساعت ماجبت فالز من عند اولاد نصار مكنش عنده حلل نفس اللون – الحمدلله طبعا جات مصلحه- وانا الثييم بتاعي ازرقات فكان يهمني اللون و قلت اديني بجررب. و بالمناسبه كلهم اسعارهم متقاربه مفيش نوع اغلى من التاني كتيير. بس مش فاكره الاسعار معلش.
و حماتي كان عجبها السيراميك عندي جبتلها مقلايتين من البدريني الايطالي الاحمر . كويس كاا سيراميك بس برضو ايده اتحرقت و لونه اتغير من بره. من استخدامين تلاته.
معلش معرفتش اصورهم عندها احسن تفتكرني عيني فيهم
في نوع بقى كوري اسمه نيوفلام ده اللي اعتقد انه حالل مشاكل معظم النواع بس للاسف برضو منزلش ازرق الا قريب لو اتزنقت في مقاس حله حبقى اجربه و انقللكم التجربه.
يارب يكون تعبي في الموضوع بفايده ولا اسألكم الا الدعاء
و شكرااا
amatol amatol 198277_1.gif فتكات متميزة Fatakat 198277 Cairo – Egypt