حبيت انزلكم طريقتي في تحضير وعمل الروستو
يا رب يعجبكم
اول صورة هتنزل للمقادير
هناخد اللحمة ( لازم تكون ناعمة قوي .. يعني لو لاقيناها خشنة ممكن نفرمها في الكبة مرة تانية ولازم ما يكونش فيها دهون) وهناخد البهارات (الملح والفلفل والقرفة وجوزة الطيب) والبقسماط وهنقلبهم مع بعض كويس قوي …
وبعد كده هنقسم اللحمة نصين زي الصورة رقم 1
وهناخد اول الجزء ونحطو بين ورقتين نايلون (وممكن كيس نفتحه اتنين ) ونفردهم بالنشابة كويس زي الصورة رقم 2
بعد كده هنجيب التوم والجزر اللي متقطعين بالطول وهنحطهم على اللحمة اللي فردناها زي الصورة دي
وهنبدا نلف .. هنمسك الورقة النايلون ونلف اللحمة بيها وبعدين نسحبها ونلف تاني ونسحبها لغاية ما نلفها كويس .. ونعمل الجزء التاني بنفس النظام .. ونلفهم بالورقة كويس ونحكمهم
الصورة هتوضح الطريقة
كده نكون جهزنا لحمة الروستو
هنيجي بقى لتسويتها
هنحط شوية زيت (او زبدة او سمنة ) وهنحط فوقيها لفائف اللحمة وورقة "غار او لاوري" ونفضل نقلبها بالراحة خاالص على كل الجهات عشان تمسك نفسها وما تفكش( زي الصورة اللي فوق)
واول ما نلاقيها بدات تتشوح ننزل عليها بمكعبات البطاطس وفصوص التوم والبصل ونقلبهم معاها كويس لغاية ما يتشوحوا هما كمان وبعدين هنضيف المية عليهم ونغطي الحلة واول ما يغلوا هنوطي النار خااالص لمدة تقريبا ساعة وبعدين هتكون اللحمة استوت كويس .. زي الصورة اللي تحت
كده اللحمة استويت هنشيلها من الشوربة بتاعتها
وهناخد الشوربة نحطها في اي كاسرولة صغيرة وبالشوكة هنهرس المكونات اللي جواها (البطاطس والتوم والبصل) عشان تبقى صوص تقيلة شوية ..
وهناخد اللحمة نحطها على القطاعة وبسكينة مشرشرة (باسنان) هنقطعها
نشوف الصور اللي تحت
الصورة رقم 1 : الصوص بعد ما هرسنا مكوناتها
الصورة 2 و 3 : تقطيع الروستو
كده احنا خلصنا الروستو
_________________________________
هنعمل الخضار سوتيه ان شاء الله
هنحتاج بطاطس وجزر وبسلة (بازلاء) مسلوقين
.. هنحط حتة زبدة في الحلة مع شوية زيت صغيرين ونقلب الخضار بالراحة قوي لغاية ما الزبدة تغلف كل الخضار هنرش الملح والفلفل الاسمر ونقلب تقليبتين ونطفي عليهم
وده شكل الخضار سوتيه مع الروستو
___________________________________
هنعمل بقى الرز بالشعرية
هنجيب كوبايتين رز ونغسلهم كويس
كوباية الا ربع شعيرية
3 كوبايات ميه
مكعب مرقة ماجي
1-هنحمر الشيعيرية في شوية زيت او سمنة
2- وبعدين هنحط الرز ونقلبه مع الشعيرية وهنحط مكعب ماجي
3- هنحط المية ونقلب كويس عشان المكعب يدوب
4- وكده يكون الرز بالشعيرية بقى جاهز…
____________________________________
هنيجي بقى للتقديم
الطريقة الاولى لو عندنا عزومة
" ممكن نغرف الروستو والسوتيه جنب بعض في سيرفيس
وجنبهم سيرفيس الرز
وسلطانية كبيرة فيها الصوص
الطريقة التانية
نغرف الرز والسوتيه واللحمة في طبق
وجنبهم سلطانية (كاسة) فيها الصوص
ودي صورة للتوضيح
_________________________________________________
يا رب الموضوع يكون عجبكم
واظن انه يستاهل يتقيم ويثبت عشان تعبني جداااااااا في التحضير والتصوير وتظبيط الصور والتنزيل والطبيييييييييييييييخ
ما تبخلوش عليا بردودكم وتقييمكم
واحلى طبق لاول فتوكة هتقيملي وترد عليا
مواضيع هذا القسم برعاية
om nabil om nabil images/avatars/diceroll.jpg فتكات حبوبة Fatakat 773106 صيدا – لبنان