السلام عليكم و رحمة الله و بركاته
النهاردة خرجت مشوار طويل و كان معايا الاستاذ امجد
و جيت من برة خلصانة لاني ما نمتش خالص فنمت و قولت اتصرفوا في الاكل بقا كويس اني عرفت اوصل للبيت
نمت عقبال عندكم و شبعت نوم و صحيت علي الساعة 7
لقيت زوجي و الاساتذة احمد و امجد هياكلوني تقريبا مع انهم خلصوا علي الاخضر و اليابس في التلاجة و برة التلاجة
ما هم مش متعودين علي كده لازم يتغدوا الغدا التمام و الا
المهم عاوزين نتعشي طيب اعملهم ايه
فتحت الديب فريزر و تنحت قدامه عاوزة حاجة سريعة نبقا نطلع السريع سوسيس طيب هاعمل ايه بيه
ما انا لازم اعوضهم عن الغدا و اسد بقهم عشان يناموا
و هنا طقت الفكرة اعمل جلاش مين هينزل يشتري الحاجات اللي عاوزاها ما التلاجة فضيت قالي زوجي عاوزة ايه قولتله فلفل رومي و لفتين جلاش و طماطم ناشفة و جبنة رومي
و الباقي الحمد لله عندي و هو ايه السوسيس و لبن و بيض و جبنة موتزاريللا و بصل
و بسم الله نبدأ
قطعت بصلتين وسط و حوالي ربع كيلو طماطم قطعتها مكعبات و الفلفل قطعته صغير و بشرت الجبن و قطعت حوالي 7 وحدات سوسيس طرنشات
حطيت شوية زيت في الطاسة و دبلت فيهم البصل و بعدين ضيفت عليه الفلفل و شوية تشويح و بعدين الطماطم و شوية تشويح كمان و رشة فلفل بس
بعد كده قسمت الخلطة نصين
نص حطيت عليه السوسيس وعلي النار وسويته تقريبا و ملحته
و النص التاني هنحط عليه الجبن بس من غير النار
و نشوف لو عاوز ملح نظبته لان الجبنة بتملحه
كده نبتدي نرص الصينية ندهنها زيت خفيف
و نرص اول لفة ورقتين ورقتين و ندهن بينهم زيت
نحط الحشوة و اي حشوة تانية نحبها
ان شالله 10 حشوات و نرص اللفة التانية زي الاولانية
دلوقتي نقطعها و ندهن وشها زيت و عذرا انا باحب اقطعها كبيرة
و القطع اللي في النص فيها الحشوتين سوا و علي الفرن علي طول
دلوقتي نعمل البيض و اللبن انا باحط في المج بيضة و باكمل المج لبن
و الصاجة بتاخد مجين من دول و طبعا باقلبهم كويس و باحطلهم ملح و فلفل
نروح للصاجة في الفرن بقالها شوية نخرجها
و نحط البيض باللبن و ندخلها الفرن تاني
كده خلصت الصينية و ريحتها تجنن
و دول حتتين كل حتة بحشوة شكل
و ده بقا طبق مخلل من صنع ايديا ريحته و طعمه جنان
مشهورة بيه بس حاسبوا احسن المخلل موحوح اوي
و الحمد لله كلنا و شبعنا
نسيت اقولكم انهم كانوا عمالين ياكلوا الحشو
و كانوا معجبين قوي بيه
ياللا سلام بقا و متنسوش التقييم
مواضيع هذا القسم برعاية
molo_s2016 molo_s2016 277585_1.gif فتكات رائعة Fatakat 277585 القاهرة – مصر