ازيكوا يافتوكات ياقمرات
انا طبعا عارفة ان المدونة ماشاء الله فيه فنانات ومبدعات فى المطبخ وانا كمان بتعلم منهم
وكمان بقول يمكن حد يستفاد منى عشان كده لما بعمل حاجة بصورها عشان انزلها
وطبعا مش هقول على التريقة اللى باخدها من بعلوعلى
بس بعمل ودن من طين والتانية من عجين
حتى الواد ميزو ابنى بيعمل زى ابوة ولما يشوفنى بصور يزمزا
بلاش رغى بقى وندخل على المفيد
طبعا فيه كتير مش بيرضوا يعملوا الممبار عشان تنظيفة
بس انا بصراحة مش ممكن اكله الا لما اكون انا اللى منضفاة بايدى ايوة بتعب شوية بس النتيجة هايلة
ودى بقى الممبار وهو لسه جاى من عند الجزار……طبعا تحفة
وهنا قلبتة
وطبعا بقلبة بالمعلقة ….والمية جارية علية من الحنفية
وبعد مااخلص قلبة …احط علية خل….شوية حلوين كده …
الخل بقى مش بيخلى اى ريحة زفارة وبيخلى الخملات اللى احنا بنشيلها دى تجمد ويبقى شيلها سهل
وادى بعد ماخلصت الكمية …وطبعا قطعته
شايقين…..فلة شمعة منورة
ودى بقى الخلطة …انا بزود فيها الطماطم والبصل والخضرة…بيفرق فى الطعم قوى
وخلصت حشو الكمية
وادى الممبار محشى…وخلى بالك مش تملى الحشو قوى عشان الرز بيزيد
سلقت الممبار فى مية سخنة كنت حطها على النار وانا بحشى
واهو بعد السلق ..طلعته فى مصفى عشان مش يكون فيه مية ويفرقع وانا بحمرة
وادى الممبار محمر
ودول شوية مسلوقين عشان جوزى بيحبة كده ومعاه السلطة
وكده اكون خلصت
يارب اكون افدت …وحد يستفاد من موضوعى
وماتنشوس ….دعوة حلوة
فى امان الله
مواضيع هذا القسم برعاية
تونة555 تونة555 295489_32.gif Fatakat 295489 الجيزة – مصر