ازيكم يافتوكات يارب تكونو كلكم بالف خير
بصو بقا المكرونة اللى هقولكم طريقتها دلوقتى دى اختراع
هى مكرونة بالبشاميل بس من غير لا زبدة ولا لبن ولا لحمة ولا جبنة بس بجد طعمها تحفة تحفة
وكمان مفيدة لاننا هنعملها بالخضار وكمان تنفع تتعمل لما نلاقى الميزانية اخر الشهر
مش متظبطة لانها بصراحة موفرة وطعمها يجنن كمان واللى هتجربها هتدعيلى
ندخل اول حاجة على
المقادير
نصف كيلو مكرونة فرن
للبشاميل
زيت
دقيق
شوربة خضار
مكعبين مرقة خضروات
للحشوة
ربع كيلو خضار مشكل
بصلاية متوسطة
3 او 4 حبات طماطم
1 فلفل رومى كبيره
معلقة كبيرة صلصة طماطم
على فكرة الكمية دى تكفى لعمل صينيه متوسطة مقاس 25
الطريقة
اول حاجة هنجيب حلة ونسلق الخضار المشكل نصف سلقة اللى هو عبار ة عن جزر و بسله وفاصوليا خضرا
ونحط فى الميه بصلايه كاملة مش متقطعة وملح وفلفل وورق لاورا ومكعبين مرقه خضار ونسيبهم يغلو شويه
تقريبا ربع ساعه او تلت ساعةبس اهم حاجة منسويش الخضار هنطلعه نصف تسويه لاننا لسه هنعصجه
بعد كده ناخد الخضار ننشله من الشوربه ونشيل الشوربه دى على جمب لاننا دى اللى هنعمل بيها
البشاميل
دلوقتى بقا هنعصج الخضار اه هنعصجه متستغربوش وبيطلع طعمه اكتر من تحفة
هنجيب طاسه نخرط فيها بصلاية متوسطة ناعم ونشوح البصله فى الزيت لحد ما تصفر
وبعدين ننزل بالخضار اللى سلقناه نشوحه مع البصله ونحط معاهم الفلفل الرومى المقطع
لحد ما يدى لون حلو ويتحمرو
بعد كده هنجيب الطماطم نقطعها مكعبات صغيرة وننزلها على الخضار والبصل ونسيبهم
يتسبكو شويه وممكن نحط معاهم مكعب مرقة خضار ونسيبهم يتسبكو براحتهم على
نار هاديه ومنقلبش فيهم كتير علشان الخضار ميتهريش ودى الحشوة بتاعتنا
هنجيب بعد كده حلة ونسلق المكرونة
دلوقتى بقا هنعمل البشاميل
هنجيب حلة ونحط فيها كميه زيت ونحمر الدقيق زى البشاميل اللى متعودين عليه
وبعد كده هنزل عليه بالشوربه اللى سلقنا فيها الخضار بس لازم نصفيها الاول
ونقلب نقلب لحد ما يبقا زى الكريمة زى البشاميل العادى بالظبط ونظبط بعد كده
الملح والفلفل بس خلو بالكم فى الشوربه مرقة الخضار بتفرق فى الطعم بشكل
رهيييييييييييب بس وبعد كده هنخلط البشاميل بالمكرونة ونسيب حبة بشاميل
للوش ونحط نص كميه المكرونة وفى النص الحشوة وباقى كميه المكرونه من فوق
وعليهم حبه البشاميل اللى خليناهم للوش وهندخلهم الفرن لحد ما وشها يتحمر
بجد طعمها تحففففففففففة وكمان فرصه نخلى ولادنا ياكلو الخضار المفيد
وبطريقه جديده ومش مكلفة صدقونى كل اللى داقها قال انها تحفة
جربوها وانشاء الله هتدعولى وبالف هنا وشفا مقدما
انا مش هقولكم عايزه تقييم بس عايزه دعوه حلوة ربنا يخليلى جوزى وابنى
ويحفظ بلدنا مصر مواضيع هذا القسم برعاية
koki_85 koki_85 فتكات هايلة Fatakat 896796 luxor – egypt
سبحان الله و بحمده