السلام عليكم ورحمة الله وبركاته … ازيكو ياحلوين
نبدأ الموضوع بدعوة حلوة كدة ان ربنا يعافينى من الأنفلونزا اللى هلكانى وربنا يسترها على ولادى وميلقطوش منى العدوى … مش ناقصة أبقى تعبانة وأراعى حد تانى معايا
الموضوع دة كنت عاوزة أنزلة من امبارح بس الصور جننتنى علشان أصغرها ولو انها للأسف متستاهلش بعد ما تعبت وصورت وجيت افتح الصور لقيت كلها طلعت مهزوزة ومش واضحة فأنا هعتمد على سعة خيالكم وانتو هتفهمو الموضوع بغض النظر عن الصور التعبانة دى
ساعات بتلاقى مكتوب كدة على المحلات ( مندى ،مظبى ، كبسة ) وبالذات هنا فى السعودية بنشوفها على المحلات كتير ومكونتش أعرف ايه هو المظبى لغاية ماسمعت بنوتة على الفيس بتحكى عنه ودورت على الوصفة لغاية ما لقيتها ونفذتها وعجبتنى وقولت مش هبخل عليكم بيها
المظبى دة ممكن يبقى عبارة عن لحم ، فراخ ، ريش ، وبتبقى مشوية أساسا على الرمل والحصى الصغير .. بس الطريقة المنزلية بقى اننا نشوى اللحم دة على الملح الخشن أه وربنا وهوريكم كل حاجة بنفسكم دلوقتى
المطلوب .. أنا جيبت ريش ضانى وتبلتها بالتتبيلة بتاعتى ، وانتى تبليها زى ما تحبى
أنا جيبت نص كيلو ريش ضانى ، تبلتهم ببصلة ، فص واحد بس توم ، نص علبة زبادى ، خل ، ملح ، توابل ( فلفل ، سماق ، قرفة ، بهارات لحم ) وركنتها من الفجر لغاية تانى يوم بعد الضهر
ودى صورتها فى التتبيلة
بعد كدة بتجيبى حلة عميقة وملح خشن وتحطيه طبقة كثيفة حوالى تلت الحلة .. من غير ولا نقطة مية .. عاوزين الملح بس لإن دى هتبقى لحمة مشوية مش مسلوقة على البخار .. وكفاية المية اللى هتنزل من اللحمة أصلا
أنا استخدمت حلة ستانلس ستيل عادية .. وهنتكلم عن كل مخاوفكم فى أخر الموضوع
دى الحلة وفيها الملح
بعد كدة بتحطى الحلة على النار وتستنى لما تسمعى صوت الملح بيطقطق وتبدئى ترصى اللحمة على سطح الملح
بس خدى بالك .. حتة اللحمة اللى تحطيها متحركيهاش من مكانها .. لإن اللحمة طبعا متبلة ومبلولة من برة ، فلو حركتيها هتاخد معاها شوية من الملح واحتمال يدوب مع التتبيلة ويملح اللحمة بزيادة أو حتى يلزق عليها من برة
يعنى تحطى الحته ومتنقليهاش خالص وهى لما تتشوى هتنفصل عن الملح دة لوحدها
أنا رصيتها بالشكل دة كدة
بعد كدة بتغطى الحلة بورق فويل وتغطسيه لجوة شوية علشان تعرفى تقفلى غطا الحلة عليها من غير ما يتقطع الفويل
وكدة لما قفلتها
طبعا هى حاجة سخيفة انك تقعدى تلفى الفويل على حرف الحلة وهى سخنة .. بس حاولى بقى وأمرك لله
وتحطى الحلة على نار متوسطة شوية وبعدين تهديها وتسيبيها لمدة ساعه على الأقل ومتقلقيش مش هتتحرق ان شاء الله
وشمى بقى ريحة الشوى الجميلة .. الملح بيديها نكهة جميلة كدة شبه نكهة الشوى على الفحم بس مميزة عنه ، واللحم بيستوى من جوة وبتبقى اخر حلاوة
دى شكلها لما فتحت عليها
معلش أنا قولت لكم ان الصور وحشة وكمان عندى الشباك جنب البوتجاز على طول والشمس كانت معاكسه ومزغللة عينى والصور خالص
طبعا اللحمة اتحمرت من تحت .. واستوت وبقت تمام بس من فوق وشها عاوز بس دقيقتين تحت الشواية … سخنت الفرن ونقلت الريش لصينية صغيرة ودهنت وشها بنقطتين زيت وحطيتها خمس دقايق وبس كدة
والله ما فيه حاجة جننتنى غير الصور التعبانة دى
المهم يعنى قدمتها مع مكرونة وسلطة خضرا وطحينة … وبنتى مكانتش صابرة لغاية ما ألقط الصورة
لحد هنا والموضوع خلص … نيجى بقى لفقرة الأسئلة اللى هتدور فى بال الكل لما يسمعو عن الأكلة دى
مواضيع هذا القسم برعاية
ثومه حمدى ثومه حمدى 276742_1.gif فتكات ست الكل Fatakat 276742 حائل – السعودية – مصر