السلام عليكم فتوكاتى حبايبى
فى حد يعرف معنى (الكفتة المكسية)
دى عبارة عن كفتة بالرزواللحمة وبنعملها خلطة تكسيها وبنقليها
ودى عندنا فى البلد مشهورة بس بجد تجنن وكل مااعملها لحد من عندى ميعرفهاش بيتجنن عليها
مش عايزة اطول عليكم وندخل فى الموضوع بس …..قبل مدخل عايزاكم توعدونى بالدعوة الحلوة والتقييم لوسمحتم
(المقادير)
1كيلو ارز مغسول ومنقوع لمدة نص ساعة
نص كيلو لحمة مفرومة
ربطة شبت
ربطة بقدونس
شوية دقيق صغيرين حسب الاحتياج
ملح _فلفل_بهارات مشكلة
ولو عندك شوربة لحمة
(مقادير الخلطة للكسوة)
كوب لبن
بيضة او اتنين
دقيق
كربونات الصوديوم
ورشة ملح ورشة فلفل
(الطريقة)*
بنحط الرز فى صينية ينفع ندق فيها المكونات وبنحط على الرز اللحمة المفرومة وبنقطع الخضرة (الشبت والبقدونس)
عليها برضه وبنحط الملح والفلفل والبهارات المشكلة
ونبدا ندق على كل المكونات دى مع بعضها ونحاول نقلبهم واحنا بندق عليهم لحد ميوصل
الرز انه يكون انصاف ومكسر كله ومتقلب مع اللحمة والخضرة
تحاولى تكبسيها علشان تعملى منها صوابع وكل متلاقيها بتتفرط منك
تحطى عليها رشة دقيق وتكبسيها تانى وهكذا لحد متلاقى ان الكفتة مسكت معاكى
بتصبعيها صوابع متوسطة مش تخينة ولا رفيعة وبعدين تتكى عليها وتبططيها
يعنى تعمليها زى شكل الهمبرجر
وترصيها فى الحلة اللى هتسلقيها فيها فوق بعض عادى متخافيش مش هتبوظ
وتصبى عليها الشوربة من جنب الحلة براحة وسويها كأنك بتسوى رز عادى
مش هتاخد وقت ان شاء الله *بعد متستوى استنى عليها تبرد شوية وبعدين حاولى تشيليها واحدة
ورا التانية وفرديها على صينية مفرودة وبكده تكون الكفتة جاهزة
نحضر بقى ليها خلطتها
(طريقة الخلطة)
سهلة خالص ما عليكى غير تحطى كل مكوناتها على بعض وتخلطيهم كويس
وتفضلى تزودى فى الدقيق واحدة واحدة لحد متتقل معاكى وتبقى مثلا زى البشاميل
التقيل وبعدين بتحطى الكفتة المسلوقة فيها وبتكونى مجهزة زيت غزير على النار
وبطلعى منها وتحطى فى الزيت لحد متتحمر اللون اللى تحبيه
*****وبالهنا والشفا عليكو****
يااااااااااااااااااااارب تجربوها وتعجبكوا والله هتدمنوها::
ارجو منكو الدعوة بالرزق الحلال وربنا يخليلى اولادى
والتقيييييييييييييييييييييييييييييييييييم
مواضيع هذا القسم برعاية
بسمة رقيقة بسمة رقيقة 372027_4.gif فتكات نشيطة Fatakat 372027 الزقازيق – مصر ام الدنيا