السلام عليكم ورحمة الله وبركاته
ازيكم يا احلى فتوكات كل عام وانتم بخير ورمضان كريم
انا عارفه انى مقصره معاكم جدا لكن والله غصب عنى
لان احمد بيه ولدى شاغلنى جدا ومش مدينى اى فرصة اعرف انزل اى موضوع جديد
لكن النهارده انا جايبه لكم اكله خطيييييييييييييره مش هتقدروا تقاوموها طعمها خرافه
من غير ما اطول عليكم الاكله دى ماما زوبه ربنا يبارك لى فيها هيا اللى بتعملها لنا فى العزومات المتينه زى اول رمضان
اول ما عملتها لنا السنة دى قولت لازم اصورها لفتوكاتى واقول لهم كل سنة وانتم طيبين
ندخل فى الموضوع علطول
الخطوات سهله وبسيطه جدا
اول حاجه بنغسل كوب ارز مصرى عادى
وبنحط عليه حوالى 4 كوب شوبه سمينه …
مهمه اوى ان الشوربه تكون سمينه و دسمه
يعنى النهارده هيا عملتها على شوربه بط مبطبط محترم جداااااااااا ما شاء الله
وبعدين نحطهم على نار هاديه ونقلب كل شويه علشان الرز ما يلزقش لحد ما نحس ان الرز استوى لكن مهم ان يكون لسه فيها شوربه فوق الارز بحوالى عقلة اصبع يعنى الرز ما يشربش الشوربه كلها
الخطوة اللى بعد كده بندوب معلقه دقيق فكوب لبن
ونضيفه على الارز اللى سلقناه فى الشوربه الدسمه
ونقلب طبعا بسرعه علشان ما يكلكعش مننا لحد ما قوامه يتقل ونطفى النار
هنا بقى نخرط بصله كبيره ونحطها مع شويه زيت ذره ونحمره
( طبعا لان الشوربه دسمه فكفايه مش هنحط البصل كمان فسمنه )
بعد ما البصله تتحمر خالص ويبدأ السكر اللى فيها يتكرمل ويبقى لونه بنى نضيفها على الكشك ونقلب كويس علشان يتغلغل البصل فكل الكشك ويلونه بلون دهبى جميل
ونغطيه ونسيبه شويه والنار مطفيه طبعا علشان يشرب من البصل كويس وهتلاحظوا هنا شكله اتغير ازاى
وبالهنا والشفا
صدقونى خطواته سهله جدا انما طعمه خطييييييير
انا ما اقدرش اكون عند ماما زوبه وتكون عامله بط وما يكونش فى كشك لانها اكله عظييييييييييمه على راى ماما زوبه ربنا يبارك فيها ويديها الصحة
لو عجبتكم الوصفه ما تنسوش ماما زوبه اللهلوبه من صالح دعائكم
وكل عام وانتم بخير
ورمضان كريم
مواضيع هذا القسم برعاية
شيكولاته بيضاء شيكولاته بيضاء 175092_2.gif فتكات متميزة Fatakat 175092 طنطا – مصر