بسم الله الرحمن الرحيم
حبايب قلبى الفتوكات
مش عارفة من ساعة ما عملت رجيم و انا كل يوم بعمل اكل بحبه
و اروح مبوظة الرجيم
من ساعة ما بدات الرجيم و انا مبوظاه عااااااااااا
الموهيم انا بقه انهارده عملت الكسكسى
انا بعمله من زمان حماتى ربنا يديها الصحة علمتهولى
انا قبل ما اتجوز كان الكسكسى عندى مسكر بس
بس بعد الجواز لقيت اهل جوزى بياكلوه حادق
يعنى ياكلوه اكنه رز و جمبريه شوربة و فرخ و سلاطة
او ياكلوه مع خضار سوتيه و لحمة
كده يعنى
بصراحة قولت اجربه و عجبنى اوى و علشان جوزى بيحبه اتعلمته
هوه كان فى الاول غلبة الصراحة
لكن مع التطور التكنولجى مبقتش اتعب فيه خالص
هههههههه اه والله التطور التكنولجى
يعنى فى الاول كنت بلحم مصفة فى حلة بعجينة و كانت بتقرفنى فى الغسيل بعد كده علشان بتنشف عليها
لكن مامتى ربنا يديها الصحة اشترتلى حلى الكسكسى لما لقتنى بعمله و بيطلع حلو
و طبعا كنت بقعد انزله من غربال و دراعى ده بيوجعنى
اصلى مش بعمل نص و لا كيلو دقيق لا ده اقل كمية 3 كيلو
اصلنا بنفترى ههههههههه و ببعت منه كمان لحماتى هيه مبقتش تقدر تعمله
المهم دلوقتى و بعد ما الحمد لله جبت الكيتشن ماشين بقه عمايله سهلة اوى
و علشان كده عرفت اصور الخطوات لانه بقه بيتعمل بسهولة خالص
انا رغاية مووووووووووووووووت بس المفروض انكم عرفتونى و ختوا على رغيى
ندخل بقه على الخطوات لحسن حاسة انكم هتشتمونى و تقوليلى الله يخرب بيت الكسكسى الى هيخلينا نستحمل رغيك
هههههههههههههه
بهزر طبعا انتم مؤدبين و مش هتقولوا كده انتوا حبايبى و هتقيموا من غير ما ازغورلكم
نبدأ بسم الله
طبعا مقادير الكسكسى
دقيق الكمية الى تحبيها
معلقة خميرة جافة
معلقة صغيرة ممسوحة ملح
زبدة صفراء او بلدى الى تحبيه (انا بفضل الصفراء)
اول حاجة يا قمرات انا الكمية الى عملتها 3 كيلو دقيق
استخدمت مج بس مج كبير اوى كندى مليته مية دافية و دوبت فيه معلقة خميرة
الى هيسال ليه الخميرة انا هجاوب من قبل ما تسالوا
طبعا ممكن يتعمل من غير خميرة بس الخميرة بتديلوا هشاشة و كمان بتخليه خفيف لان الدقيق الابيض متعب فى اكله لكن الخميرة بتريح المعدة و تمنع الانتفاخ 
المهم دوبت الخميرة فى مج مية كبير انا احتجت مجين مية كبار للكمية ديه
ديه صورة المية مدوب فيها الخميرة
ببدأ اخد شوية مية بايد و بالايد التانية اقلب فى الدقيق و انا برش عليه المية
الخهطوة ديه مش صورتها علشان ايدى بتبقه مشغولة بس اكيد انتوا فاهعمين
ايد بترش المية على الدقيق و ايد بتقلبه
الهدف اننا نوصل لدقيق مبلول مش عجينة او يكون شبه لما تكون ايدك عليها عجين
و تفركيه عارفة بينزل ازاى اهو احنا هعايزين شكل الدقيق يكون كده
هنا بعد ما خلصت المية و بليت الدقيق كله و بقه كله مفروك
و ادى صورة قريبه اهو
بعدين يا قمرات بجيب المصفاة بتاعة الحلة بتاعة الكسكسى
و احط فيها قماشة بيضاء نظيفة
انا كان عندى مفرش كده طبقتين ابيض ففتحت جمب منه بقه عامل زى الشوال بحط جواه الكسكسى علشان يبقه سهل فى الشيل
ممكن تستخدمى كيس مخدة نظيف
و بعدين نحط الجزء التحتانى من الحلة على النار و فيه مية لحد نصها كده
( ملحوظة الى مش عندها حلة تجيب مصفاة معدن او استنلس
و تشوف حلة تكون مقاسها بحيث المصفاة تغطى الحلة كانها غطاها يعنى و تجيب قماشة و تعجن هتة عجينة مية و دقيقو تفردها على القماش و بعدين تلحم المصفة فى الحلة علشان البخار ميتسربش)
بعد كده ناخد الدقيق المفروك ده شوية بشوية كده نحطة فى الكبة على قد ما تاخد انا عملت الكمية على 5 مرات هنه شكله و هوه بيتعمل فى الكبة
( طبعا الى معندهاش كبة تعمله عادى فى الغربال اشتريه من اى موان بتاع حدايد و بويات بس اغسليه كويس اوى )
و نحط الى يتعمل فى القماشة الى محضرنها و لم نخلص الكمية كلها كده
تكون الحلة الى على النار المية غليت فيها نحط المصفاة الى فيها القماشة و الكسكسى عليها بالشكل ده
هنسيبه على النار 45 دقيقة
يتبببببببببببببببببببببببببببببببببع يا قمراااااااااااااااااااااات
مواضيع هذا القسم برعاية
مسلمة227 مسلمة227 178557_2.gif فتكات غالية قوي Fatakat 178557 القاهرة – مصر