ازيكم يا فتوكات
انا اول مرة اكتب موضوع ويارب يعجبكم
انا بحب المطبخ جدا وباستفيد من الطرق الجديده اللي بتكتبوها ولقيت اخت بتسأل علي القراميط
اولا:ازاي تشتريها ؟
ما تجيبيش اللي حجمها صغير هاتيها كبيره شوية بتكون اطعم
ثانيا :ازاي تنضفيها؟
انتي بتجيبي المقص وتقصي الزعانف والحاجات اللي في الراس وحاولي تشيلي الخياشيم وتفتحي بطنه زي ما بتنضفي السمك اللي هيتقلي
وتقطعيه قطع ممكن 3 او 4 لو حجمه كبير حسب ما تحبي وتغسليه كويس وتحطيه في ميه فيها ملح وليمون وممكن معلقة دقيق نص ساعه او ساعه مثلا قبل التحمير
ثالثا : طريقة الطهي
نحط القراميط في الدقيق بعدين تحمريها في الزيت لمدة 5 دقايق بس لانه هيستوي في الفرن وتسيبها او تحطيها علي مناديل مطبخ تشرب الزيت
نجيب بصل جوليان (شرايح) تدبلي البصل (ما تحمريهوش عشان تحسي بطعمه) دقيقتين ع النار في زيت طبعا
بعدين تضيفي الطماطم المضروبه في الخلاط بعدما تصفيها وتسبكيها وضيفي بهاراتك:ملح ورشة فلفل وكمون بعدين تضيفي شوية ميه حسب ما انتي عاوزاها تقيله ولا خفيفه وبعدما تغلي تحطي القراميط فيها وتدخليها الفرن تقريبا تاخد ربع ساعه او حسب ما تلاقيها استوت
لاحظي ان القراميط ما تكونش مستخبيه في الصلصه عشان وشها يتحمر وتطلع روووووعه
ياريت تعجبكم مواضيع هذا القسم برعاية
ملك 501 ملك 501 فتكات حبوبة Fatakat 393852 المنصورة – مصر