صباحكم زى العسل
ازيكو يقى
عاملين ايه كده
طب وكده ههههههههههه
انا النهارده عملاكم موضوع سيرته بتغم كل البنات
هو موضوع عن الرجيم طبعا
انا بقى يا بنات فكرت 8000 مره اعمل رجيم وفشلت 9000 مره
بس اللى مش بيزعلنى ان انا طويله وعودى مفرود فالتخن مش باين فيا يعنى والحمد لله
انا عايزه اخس اول عن اخر 5 كيلو كده بس للتظبيط بس
المهم انا فكرت فى فكيره والله العظيم طلعت تحفه
ايه هى بقىىىىىىىىى
هى يا بنات
اننا فعلا مبنقدرش نعمل رجيم ودى حقيقه وواقع ملموس ولا انتو لسه هتقاوحوا
احنا فشله فشله فشله ههههههه
طيب انا جيبتلك بقى فكره من الاخر
عن سلق الرز
ودى صوره تشجيعيه فى الاول اهو
بذمتكن ده وحش ههههههههههههه
انا قولت تقومى يا صفصوفه تعملى حاجه مفيده فى حياتك ليكى ولوطنك عشان تخسى شويه ومتاخديش مساحه كبيره وانتى ماشيه فى الشارع وشافطه الهوا من بق الناس ههههههههه
المهم قومت سلقت الرز ويالهوى ع اللى شوفته
تعالو بقى نتكلم ونشرح بالصور
اولا انا جيبت الرز بتاعى اللى هعمله وغسلته غسله محترمه اهو
وبعدين جيبت حله ومليتها ميه لحد ما غليت وقومت حطه الرز اللى غسلته من شويه اللى فوق ده ههههههه
اهو
وقومت ضيفاله نص معلقه ملح لان الملح بيمسك قوامه شويه وبيتحكم فى شكله ده غير اننا لسه هنغسله بالميه ونسبه كبيره من ملوحته بتضيع فى الميه فحاولى تاكترى الملح شويه ومتخافيش
والصوره اللى جايه دى لكى ان تتخيلى بقى شوفتى اللى بيطلع على وش الفته ده
قصدى اللى بيطلع على وش الحله
استنوا ده المصايب لسه جايه ورا
وبعدين سيبته يغلى شويه وكل شويه كنت ببص عليه كده
لانه بيستوى بسرعه اوى اوعى تحطيه وتروحى تقعدى على فتكات
هترجعى تلاقيه فطير مشلتت ولا قرص من بتاعه العيد دى
وهو هنا لسه مستواش يا بنات
وده يا بنات بعد ما استوى اهو
بصى كده تح ت المعلقه وشوفى كميه النشا
ده دمار شامل مش نشا ده ابدا
وقومت بقى انا كمان حطاه فى مصفه تحت الميه السخنه تانى اوعى تنسى
سيبيه تحتها حوالى 3 دقايق كده هتنزلى منه كمان كميه كبيره من النشا لحد ما تلاقى ان الميه اللى بتنزل منه بقت شفاهه وبيضا خالص وخفيفه لكن لو لسه تقيله اعرفى ان لسه فيه نشا
ده الرز ده طلع جبار بعد السلق ده كله ولسه بينزل نشا
يا سنه سوخه يا ولاه
اه نسيت اقولك انتى هتغسليه بالميه السخنه الاول ليه ؟
لان انتى لو غسلتيه بالميه الساقعه علطول كميه النشا اللى لسه متبقيه فيه حتى لو كانت صغيره هتتجمد من البروده اللى نزلت على قفاها
فانتى الاول لازم تاخديه على خوانه
تغسليه بالميه السخنه الاول وبعدين الساقعه عشان يمسك نفسه بقى ويبقى شكله معقول
هى سده النفس يعنى لازم تبقى من كل ناحيه
وانا هنا اهو بغسله تانى بالميه الساقعه
وده بقى يا بنات شكله النهائى
بالله عليكو
ده وحش
ودى صوره كمان للرز بتاع الرجيم اهئ اهئ اهئ
اصل كلمه رجيم بتقلب عليا المواجع
انا عايزاه اقولك معلومه ع الماشى
الرز ده فار منى
لا مش فار ابو ديل ده
انا قصدى فار ع البوتاجاز
والله العظيم انا شوفت قرص نشا ممكن تشبليه بايدك وكنت هصورهولكو لولا العيبه بس
فانا بقول اهو
الرز المسلوق ده عامل مساعد
هيساعدك كتير بالذات للناس اللى ارادتهم ضعيفه فى عمل الرجيم فانتى كلى منه فى الوجبه جنب قطعه الفراخ او اللحمه بتاعتك وطبق سلاطه خضرا وطبق خضار وياريت يكون سوتيه كده يعنى
وان شاء الله هتحسى بنتيجه حلوه
اهم حاجه المتابعه
ما تجيش تاكليهولى بقى يومين وتيجى تقوليلى انى بق بس
ولا تاكليه وجنبه طبق خضار متسبك تسبيكه تودى اللومان ولا طبق سلطه وفى الاخر الاقيكى حطالى ديك رومى فى السلطه وترجعى تقولى انا مبخسش ليه
الامانه يا بنات شرط مطلوب فى الرجيم هههههههه
اصل انا كنت بعمل رجيم ادام ماما واخواتى واروح ابات فى التلاجه بالليل وهما نايمين
يعنى الامانه فى الرجيم
والامانه فى التقييم
قيمى يا حاجه عشان قفايا اللى وجعنى من الكتابه ده
مواضيع هذا القسم برعاية
سنوات الضياع 2 سنوات الضياع 2 729913_1.gif برنسيسة فتكات Fatakat 729913 طنطا – مصر