ازيكوا يا فتوكات النهاردة راجعالكوا بعد غياب بالكبدة الاسكندرانى طبعا كلنا بنحاول نطلع الطعم والريحة بتاع محلات الكبدة
واخيرا وبعد محاولات عديدة جايبالكوا الوصفة والتريكات وان شاء الله هتدعولى عليها
انا كان عندى كيس كبدة مقطع شرايح طلعته من الفريزر وبعدين وهو لسة مجمد مافكش مية فى المية قطعته تانى لشرايح دقيقة جدا وده عشان يطلع بقة البهريز الجميل بتاعه
عملت خلطة مكونة من توم مدقوق وشوية ملح خفيف عشان يطرى التوم اثناء الفرم وشوية كمون
وتبلت الكبدة بالخلطة دى وماننساش كمان الفلفل الاسمر
اسيبهم لحد وقت السوا واجيب بقة مقلاه واسعة جدا ولو حد عنده الووك بتاع الاكل الصينى ماشى
احط كمية زيت كتير جدا ودى تريكة مهمة ومعلقة بسيطة سمن معاهم بس زيت طهى مش زيت القلى
اسخن الزيت والسمن بس ماتقدحيهمش وبعدين ترصى الكبدة وتوزعيها كويس فى المقلايةوماتبطليش تقليب لحد مالونها كلها يتغير
بعد كدة احط الملح المناسب واوطى النار عليها
وادوق كل شوية هلاقى الاول الكبدة طرية اوى اوى دى تبقى ناقصة سوا بعد كدة هتمسك نفسها شوية وكدة السوا المضبوط لكن مانسيبهاش اكتر لان بعد كدة هتجلد وتبقى عاملة زى البلاستيك
المهم بعد مانوصل لدرجة السوا دى هنقطع فلفل اخضر ونعصر نص لمونة ونطفى النار وبالهنا والشفا يا فتوكات
طبعا مانستش الصور
شوفى كمية الزيت اد ايه والبهريز بتاعها عامل ازاى
التقييم بقة يا فتوكات
مواضيع هذا القسم برعاية
ام هاجر و عبد الرحمن ام هاجر و عبد الرحمن images/avatars/peppers.jpg سوبر فتكات Fatakat 423655 دمنهور – مصر